Koʼalia hamutuk kona-ba problema sira

TANSÁ MAK SUSAR?

Kuandu Ita koʼalia kona-ba problema ruma ba Ita-nia kaben, dala ruma Ita sente laran-tun tanba Ita-nia kaben la komprende Ita, loos ka lae? Se nuneʼe, Ita bele hadiʼa Ita-nia situasaun. Mai ita buka-hatene uluklai diferensa kona-ba dalan neʼebé feto no mane koʼalia.a

BUAT NEʼEBÉ ITA PRESIZA HATENE

Baibain feto sira hakarak fó sai hotu sira-nia problema antes sai prontu atu rona ba solusaun. Dala ruma, hodi fó sai buat neʼebé sira sente mak dalan ida atu rezolve sira-nia problema.

“Kuandu haʼu fó sai haʼu-nia sentimentu no hatene katak haʼu-nia laʼen komprende ona, haʼu sente kmaan. Depois koʼalia tiha, haʼu sente neʼe laʼós problema ona—haʼu bele sai kontente kedas.”​—Sirpa.b

“Haʼu tenke esplika haʼu-nia sentimentu ba haʼu-nia laʼen, se lae, haʼu la bele haluha haʼu-nia problema no la bele kontinua halaʼo moris.”​—Ae-Jin.

“Koʼalia mak haʼu-nia dalan atu rezolve problema, tanba bainhira haʼu koʼalia hela, haʼu bele analiza didiʼak problema neʼe nia hun mak saida.”​—Lurdes.

Mane sira gosta hanoin kona-ba solusaun. Kuandu mane ida konsege hadiʼa problema, nia sente katak nia iha folin duni. Hodi fó solusaun ba feen nia problema, nia hakarak hatudu katak ninia feen bele sadere ba nia. Tan neʼe, kuandu ninia feen lakohi simu ninia sujestaun, neʼe halo nia konfuzaun. Laʼen ida naran Kirk hatete: “Haʼu la komprende, tansá mak ema koʼalia sai ninia problema se lakohi atu rona ba solusaun!”

Maibé se Ita hakarak fó konsellu neʼebé diʼak ba Ita-nia kaben, Ita tenke komprende uluk ninia situasaun. Livru ida (The Seven Principles for Making Marriage Work) hatete: “Antes Ita fó sujestaun, Ita presiza fó-hatene Ita-nia kaben katak Ita komprende ho didiʼak ninia situasaun no Ita hanoin loos nia. Dala barak, Ita-nia kaben la hein Ita atu fó solusaun ruma, maibé hakarak deʼit Ita atu sai rona-naʼin neʼebé diʼak.”

SAIDA MAK ITA BELE HALO?

Ba laʼen sira: Treinu Ita-nia an atu rona ho didiʼak ba Ita-nia feen, no koko atu komprende ninia sentimentu. Laʼen ida naran Tomás hatete: “Depois haʼu rona tiha, haʼu hanoin: ‘Rona deʼit la bele rezolve buat ida.’ Maibé dala barak neʼe mak buat neʼebé haʼu-nia feen presiza duni.” Estevão mós dehan: “Haʼu hakaʼas an atu la korta haʼu-nia feen nia liafuan bainhira nia fó sai ninia sentimentu. Kuandu haʼu rona ho didiʼak, haʼu-nia feen sempre sente kontente fali.”

Koko toʼok: Kuandu Ita-nia feen koʼalia kona-ba problema ruma, keta buka atu fó kedas sujestaun. Nuʼudar Ita rona didiʼak, Ita mós presiza hateke ba nia, no liuhusi Ita-nia jeitu, hatudu katak Ita simu ninia hanoin. Koʼalia fali buat neʼebé nia hatete atu hatudu katak Ita komprende nia. Laʼen ida naran Carlos hatete: “Dala ruma haʼu-nia feen presiza deʼit atu haʼu komprende ninia situasaun no nafatin apoia nia.”​—Bíblia nia matadalan: Tiago 1:19.

Ba feen sira: Fó-hatene Ita-nia laʼen se Ita hakarak nia atu rona didiʼak ba Ita. Feen ida naran Elena hatete: “Dala ruma ita hein deʼit atu ita-nia laʼen siʼik saida mak ita presiza, maibé tuir loloos ita mak tenke fó sai.” Ines mós hatete: “Haʼu hatete ba haʼu-nia kaben: ‘Haʼu iha problema ida. Maibé haʼu hakarak ó atu rona deʼit. Ó la presiza rezolve problema neʼe, tanba haʼu hakarak ó atu komprende haʼu-nia sentimentu deʼit.’”

Koko toʼok: Se Ita-nia laʼen fó kedas solusaun ruma ba Ita, keta hanoin katak nia la hanoin Ita. Karik nia hakarak deʼit atu hamenus Ita-nia problema. Feen ida naran Ester hatete: “Duké sai hirus, haʼu koko atu komprende katak haʼu-nia laʼen hanoin haʼu no nia mós hakarak rona no atu ajuda haʼu.”​—Bíblia nia matadalan: Roma 12:10.

Ba feen-laʼen hotu: Baibain, ita-nia toman mak buat hotu neʼebé ita hakarak ema halo ba ita, ita mós halo ba sira. Maibé atu Ita bele koʼalia ho didiʼak ho Ita-nia kaben, Ita presiza hanoin uluk buat neʼebé Ita-nia kaben hakarak Ita atu halo. (1 Korinto 10:24) Laʼen ida naran Miguel dehan: “Se Ita mak laʼen, rona bá buat neʼebé Ita-nia feen koʼalia. Se Ita mak feen, sai prontu bá atu rona ba solusaun neʼebé dala ruma Ita-nia la’en fó. Kuandu imi naʼin-rua hakaʼas an, imi-nia moris kaben nian sei sai kontente liu.”​—Bíblia nia matadalan: 1 Pedro 3:8.