12 Halo Planu

NEʼE KATAK SÁ

Halo planu la hanesan ho mehi deʼit. Planu neʼebé diʼak mak envolve hanoin ho didiʼak, halo mudansa, no hakaʼas an atu kumpre ida-neʼe.

Planu balu bele kumpre iha loron ka semana balu nia laran, fulan balu nia laran, no mós presiza tinan ida ka liu. Atu bele kumpre planu ba tempu naruk nian, ita presiza kumpre uluk planu kiʼik oioin.

TANBASÁ IMPORTANTE

Hodi kumpre Ita-nia planu bele ajuda Ita atu fiar an liután, hametin relasaun diʼak ho belun, no halo Ita kontente.

Fiar an: Bainhira Ita halo planu kiʼik no kumpre ida-neʼe, neʼe sei ajuda Ita fiar an liután atu kumpre planu neʼebé boot. Ita mós sai fiar an liután atu hasoru susar oioin loron-loron, hanesan tentasaun husi kolega.

Belun: Se Ita hatene didiʼak Ita-nia planu no hakaʼas an atu kumpre ida-neʼe, ema sei kontente atu ransu ho Ita. Dalan ida atu hametin Ita-nia relasaun ho belun mak hodi hakaʼas an hamutuk atu kumpre planu neʼebé hanesan.

Kontente: Bainhira Ita halo planu ruma no kumpre ida-neʼe, Ita sei sente kontente.

“Haʼu gosta atu halo planu. Planu sira halo haʼu okupadu nafatin no hakaʼas an atu halo buat ruma. Bainhira haʼu kumpre haʼu-nia planu, haʼu sente kontente no hatete: ‘Wow, haʼu bele duni kumpre haʼu-nia planu.’”​—Christopher.

BÍBLIA NIA PRINSÍPIU: “Ema neʼebé hateke deʼit ba anin sei la kari fini, no ema neʼebé hateke deʼit ba kalohan sei la koʼa buat ida.”​—Eclesiastes 11:4.

SAIDA MAK ITA BELE HALO

Halo tuir hakat tuirmai kona-ba halo planu no kumpre ida-neʼe.

Buka-hatene. Halo lista ida kona-ba planu sira no hili planu ida neʼebé mak Ita hakarak atu kumpre primeiru, segundu, terseiru, no tuirmai.

Planu. Ba planu ida-idak, halo tuir hakat tuirmai:

• Hili data atu kumpre.

• Hakerek hakat sira atu kumpre.

• Hanoin kona-ba susar neʼebé bele mosu no prepara Ita-nia an.

Halo tuir. Keta demora atu kumpre Ita-nia planu. Husu Ita-nia an: ‘Saida mak haʼu presiza halo uluk atu kumpre haʼu-nia planu?’ Tuirmai halo tuir. Haree fali hakat sira neʼebé Ita kumpre ona no kontinua hakaʼas an.

BÍBLIA NIA PRINSÍPIU: “Ema badinas nia planu sei hetan duni susesu.”​—Provérbios 21:5.