Uza planu espirituál atu hahiʼi Ita-nia Kriadór
“SE EMA ida neʼebé lori ró la hatene atu bá neʼebé, entaun diresaun anin nian hotu mak la loos.” Liafuan sira-neʼe hatoʼo husi matenek-naʼin ida kona-ba filozofia husi Roma iha tempu antigu, no neʼe hatudu katak se ita hakarak ita-nia moris iha objetivu, ita presiza iha planu.
Bíblia fó sai ezemplu barak husi ema neʼebé kaer metin ba sira-nia planu. Noé serbisu makaʼas maizumenus ba tinan 50 atu “halo ró hodi salva ninia umakain”. No profeta Moisés “hateke deʼit ba kolen neʼebé nia atu simu”. (Ebreu 11:7, 26) Josué neʼebé halaʼo fali Moisés nia knaar mós iha objetivu ka knaar husi Maromak, neʼe mak atu manán rai-Kanaan.—Deuteronómio 3:21, 22, 28; Josué 12:7-24.
Apóstolu Paulo mós halo planu espirituál hodi hetan influénsia makaʼas husi Jesus nia liafuan neʼebé dehan “ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu”. (Mateus 24:14) Tanba Paulo hetan korajen husi liafuan no vizaun neʼebé nia simu rasik husi Jesus, inklui mós knaar atu ‘lori Jesus nia naran ba nasaun sira’, Paulo kumpre knaar importante atu harii kongregasaun Kristaun barak iha Ázia Menór toʼo iha Europa.—Apóstolu 9:15; Koloso 1:23.
Sin, Jeová nia atan sira sempre halo planu no kumpre planu sira-neʼe hodi fó hahiʼi ba Jeová. Oinsá mak ita neʼebé moris ohin loron bele halo planu espirituál? Ita bele hakaʼas an atu kumpre planu saida, no hakat saida deʼit mak ita bele halo atu kumpre planu sira-neʼe?
Importante atu iha motivu neʼebé diʼak
Ita bele halo planu ba atividade oioin iha ita-nia moris, no iha mundu neʼe ema sempre iha sira-nia planu rasik. Maibé planu espirituál la hanesan duni ho ema iha mundu neʼe nia planu. Ema barak halo planu oioin tanba hakarak sai riku no hetan kbiit ka pozisaun. Se ita halo planu atu hetan buat sira-neʼe, neʼe mak motivu neʼebé sala. Planu neʼebé lori hahiʼi ba Maromak Jeová liga metin ho ita-nia adorasaun ba nia no apoia ninia Ukun. (Mateus 6:33) Ita halo planu hanesan neʼe tanba ita hadomi Maromak no ema seluk. Planu sira-neʼe nia objetivu mak atu fó hahiʼi ba Maromak.—Mateus 22:37-39; 1 Timóteo 4:7.
Ita presiza iha motivu neʼebé diʼak atu halo no kumpre ita-nia planu espirituál, maski ita-nia planu mak atu hetan knaar oioin ka atu laʼo ba oin iha dalan espirituál. Maibé dala ruma ita-nia planu balu la sai loos. Oinsá mak ita bele halo ita-nia planu no mós oinsá mak ita bele hakaʼas an atu kumpre neʼe?
Ita presiza hakarak makaʼas atu kumpre planu sira
Hanoin toʼok oinsá Jeová kumpre ninia planu atu kria universu. Jeová uza liafuan sira “iha kalan no iha mós dadeer” atu refere ba tempu kriasaun ida-idak neʼebé tuituir malu. (Génesis 1:5, 8, 13, 19, 23, 31) Kuandu atu hahú tempu kriasaun ida-idak, Jeová hatene ona ho klaru ninia planu ba tempu neʼe. No ikusmai nia kumpre duni ninia planu atu kria buat oioin. (Apokalipse 4:11) Job dehan: “Bainhira [Jeová] hakarak halo buat ruma, nia sei halo duni.” (Job 23:13) Ita bele fiar katak Jeová sente kontente tebes ho ninia serbisu kuandu nia haree filafali “buat hotu neʼebé nia halo ona” no hatete katak “ida-neʼe diʼak tebes”!—Génesis 1:31.
Hodi bele kumpre ita-nia planu sira, ita mós tenke iha hakarak makaʼas atu kumpre planu sira-neʼe. Saida mak bele ajuda ita atu haburas hakarak makaʼas hanesan neʼe? Iha tempu neʼebé mundu seidauk iha buat ida no mamuk deʼit, Jeová imajina ona rezultadu ikus husi ninia projetu kriasaun, hanesan planeta mundu neʼebé furak iha universu neʼebé sei lori glória no hahiʼi ba nia. Ita mós bele haburas hakarak makaʼas atu kumpre ita-nia planu sira hodi hanoin kleʼan kona-ba rezultadu no benefísiu neʼebé ita sei hetan. Porezemplu, irmaun ida naran Tony neʼebé tinan 19 hanoin-hetan didiʼak loron neʼebé nia vizita Testemuña ba Jeová nia sukursál iha Europa Oeste. Husi tempu neʼebá Tony hanoin beibeik kona-ba pergunta, ‘Atu hela no serbí iha fatin hanesan neʼe mak oinsá?’ Nia hanoin beibeik kona-ba oportunidade atu serbí iha sukursál no kontinua hakaʼas an atu kumpre ninia planu neʼe. Liutiha tinan barak, nia sente kontente tebes bainhira nia simu konvite atu serbí iha sukursál!
Hodi ransu ho ema seluk neʼebé kumpre ona planu ruma, neʼe mós bele book ita atu hakarak kumpre planu neʼe. Jayson neʼebé agora tinan 30, hatete katak uluk nia sei joven nia la gosta atu bá haklaken. Maibé kuandu nia remata eskola sekundária, nia ho laran-manas hahú serbí nuʼudar pioneiru hodi uza ninia tempu barak liu atu haklaken. Saida mak ajuda Jayson haburas ninia hakarak atu sai pioneiru? Nia hatete: “Hodi koʼalia no haklaken hamutuk ho ema seluk neʼebé sai ona pioneiru fó impaktu boot mai haʼu.”
Hakerek planu sira bele ajuda ita
Se ita-nia ideia seidauk klaru, ita bele hakerek ka fó sai ita-nia ideia neʼe tanba ida-neʼe ajuda ita atu halo klaru buat neʼebé ita hakarak. Salomão dehan katak liafuan matenek bele dirije ita hanesan ai meik neʼebé dirije karau sira. (Eclesiastes 12:11) Se ita hakerek liafuan sira-neʼe, neʼe bele fó impaktu boot ba ita-nia neon no laran. Tan razaun neʼe mak Jeová haruka Izraél nia liurai sira atu hakerek fali Ukun-Fuan ba sira-nia an rasik. (Deuteronómio 17:18) Entaun, diʼak ba ita atu hakerek ita-nia planu sira no oinsá atu kumpre planu sira-neʼe. Hakerek mós kona-ba problema sira neʼebé bele hanetik ita-nia planu no mós dalan atu rezolve problema sira-neʼe. Diʼak mós atu rekoñese buat balu neʼebé ita tenke hatene liután, abilidade ruma neʼebé ita presiza haburas no mós ema balu neʼebé bele anima no ajuda ita.
Irmaun ida naran Geoffery, neʼebé kleur ona serbí nuʼudar pioneiru tempu-tomak iha fatin izoladu iha Ázia, konta katak planu espirituál ajuda tebes nia. Nia hasoru situasaun susar tebes kuandu ninia feen mate derrepente deʼit. Tempu balu liutiha, Geoffery deside atu halo ninia an okupadu ho serbisu haklaken nuʼudar pioneiru hodi halo planu foun. Depois nia hakerek tiha ninia planu balu, nia halo orasaun no planu atu hetan estudu Bíblia foun tolu iha fulan neʼe nia laran. Loroloron nia hanoin fali kona-ba ninia atividade, no kada loron sanulu nia haree didiʼak se ninia planu laʼo ba oin ka lae. Nia kumpre planu neʼe ka lae? Sin, ikusmai nia hetan estudante foun haat, no neʼe halo nia kontente tebes!
Halo planu kiʼik-kiʼik sira atu kumpre planu boot ida
Foufoun karik ita sente susar demais atu kumpre planu balu neʼebé ita halo. Irmaun Tony neʼebé ohin temi ona, foufoun sente katak atu serbí iha Testemuña ba Jeová nia sukursál mak hanesan mehi deʼit. Iha tempu neʼebá ninia moris mak runguranga, no nia mós seidauk dedika an ba Maromak. Maibé Tony deside atu halaʼo ninia moris iha dalan neʼebé tuir Jeová nia hakarak, no nia halo planu atu hetan batizmu. Tuirmai, bainhira nia hetan ona batizmu, nia halo planu foun atu foti pioneiru estra no tuirmai pioneiru regulár, no nia marka data iha kalendáriu atu kumpre planu rua neʼe. Kuandu nia serbí ona nuʼudar pioneiru ba tempu balu, nia la sente tan katak atu serbí iha sukursál mak susar demais.
Ita mós bele fahe ita-nia planu boot ba planu kiʼik-kiʼik balu. Planu kiʼik sira-neʼe bele ajuda ita hakat ba oin hodi toʼo ita-nia planu boot. Kuandu ita haree fali beibeik oinsá ita laʼo ba oin, neʼe bele ajuda ita atu fokus nafatin ba ita-nia planu boot. Halo orasaun beibeik ba Jeová hodi fó sai kona-ba ita-nia hakarak mós sei ajuda ita atu tau fokus nafatin ba ita-nia planu. Apóstolu Paulo dehan: “Halo orasaun beibeik.”—1 Tesalónika 5:17.
Deside metin no keta rende an
Maski ita halo ona planu oioin ho didiʼak no hakarak tebes atu kumpre planu sira-neʼe, maibé dala ruma ita labele kumpre buat balu. Ita bele fiar katak dixípulu João Marcos sente laran-tun bainhira apóstolu Paulo lakohi lori nia hamutuk iha viajen misionáriu segundu. (Apóstolu 15:37-40) Marcos presiza aprende lisaun husi situasaun neʼe no halo mudansa ba ninia planu atu aumenta ninia serbisu, no nia halo nuneʼe duni. Liutiha tempu balu, Paulo gaba Marcos nia hahalok diʼak, no Marcos mós sai besik ho apóstolu Pedro iha Babilónia. (2 Timóteo 4:11; 1 Pedro 5:13) Karik priviléjiu boot liu neʼebé Marcos hetan mak simu espíritu santu nia ajuda atu hakerek istória kona-ba Jesus nia moris no ninia serbisu iha rai.
Nuʼudar ita hakaʼas an atu kumpre ita-nia planu espirituál, ita mós bele hasoru problema balu. Kuandu ida-neʼe akontese, duké rende an deʼit, ita tenke haree didiʼak ita laʼo ba oin ona toʼo neʼebé, tetu didiʼak ita-nia planu, no se presiza, halo mudansa ruma. Kuandu problema mosu, ita presiza hakaʼas an liután atu laʼo ba oin ho desizaun metin no la rende an. Liurai Salomão neʼebé matenek dehan: “Entrega buat hotu neʼebé ó halo ba Jeová nia liman, no ó-nia planu sira sei laʼo ho diʼak.”—Provérbios 16:3.
Maibé, dala ruma ita-nia situasaun bele hanetik duni ita-nia planu. Porezemplu, ita iha problema ho saúde ka aumenta responsabilidade iha família, neʼe bele hanetik ita atu kumpre planu balu. Maibé ita labele haluha katak prémiu neʼebé boot liu mai ita mak moris ba nafatin, iha lalehan ka iha mundu paraízu. (Lucas 23:43; Filipe 3:13, 14) Oinsá mak ita bele hetan ida-neʼe? Apóstolu João hakerek: “Ema neʼebé halo Maromak nia hakarak sei moris ba nafatin.” (1 João 2:17) Maski ita-nia situasaun la husik ita atu kumpre planu espesífiku ruma, maibé ita bele nafatin “hamtaʼuk Maromak loos no halo tuir ninia mandamentu”. (Eclesiastes 12:13) Planu espirituál sira ajuda ita atu tau fokus nafatin hodi kumpre Maromak nia hakarak. Entaun, mai ita uza planu sira-neʼe atu fó hahiʼi ba ita-nia Kriadór.
[Kaixa]
Planu espirituál balu
○ Lee Bíblia loroloron
○ Lee hotu Livru Haklaken no Matan-moris bá!
○ Halo diʼak liután ita-nia orasaun
○ Haburas hahalok sira neʼebé mai husi Maromak nia espíritu
○ Aumenta liután ita-nia serbisu ba Maromak
○ Aumenta liután matenek atu haklaken no hanorin
○ Aumenta matenek atu haklaken liuhusi telefone, haklaken iha dalan la formál, no haklaken iha área negósiu nian