Ema balu nia fiar

Indú

Ema Indú fiar katak ita hasoru terus tanba konsekuénsia husi ita-nia hahalok rasik iha moris agora ka uluk nian. Sira fiar kona-ba moksa, katak ema ida bele livre husi siklu mate no moris fali hodi husik tiha buat hotu neʼebé liga ho mundu neʼe.

Izlaun

Ema Izlaun fiar katak terus mak hanesan kastigu ba ema nia sala, no mós atu koko ema nia fiar. Dr. Sayyid Syeed, prezidente husi asosiasaun Izlaun iha Amérika parte norte hatete: “Terus mak hanesan avizu mai ita atu hatudu agradese ba Maromak nia bensaun sira, no katak ita tenke apoia ema neʼebé presiza ajuda.”

Tradisaun Judeu nian

Tuir tradisaun Judeu nian, terus mosu tanba ema ida nia hahalok. Ema Judeu balu fiar katak sira sei moris-hiʼas atu bele hetan fali justisa. Fiar balu neʼebé místiku husi Judaízmu hanorin kona-ba reenkarnasaun, katak ema bele moris fali nuʼudar buat seluk atu hetan oportunidade hodi hadiʼa fali ninia sala sira.

Budista

Budista sira fiar katak terus sei kontinua akontese iha siklu moris ida-idak no akontese toʼo tempu neʼebé ema ida halakon ona ninia hahalok, emosaun, no hakarak negativu. Liuhusi matenek, hahalok neʼebé diʼak no dixiplina an, ema ida bele hetan nirvana, katak kondisaun ida neʼebé la iha tan susar no terus.

Konfusionizmu

Livru ida (A Dictionary of Comparative Religion) hatete katak: “Terus mosu tanba ema nia sala no tanba ema labele hetan susesu.” Doutrina neʼe hanorin katak, maski ita bele hamenus terus liuhusi ita-nia hahalok neʼebé diʼak, maibé terus barak mosu tanba espíritu sira neʼebé iha forsa boot liu fali ema. Neʼe katak, ema presiza simu deʼit saida mak kriatura espíritu sira-neʼe deside ona.

Relijiaun husi suku iha rai balu

Relijiaun sira-neʼe fiar katak terus iha ligasaun ho espiritizmu. Tuir fiar neʼe, buan sira bele lori sorte diʼak ka bele lori dezastre, no liuhusi rituál oioin mak sira bele hamenus susar. Bainhira ema ida hasoru susar tanba moras, matan-dook sira-nia serimónia no ai-moruk bele kura no kontra buan sira-nia atividade.

Kristaun

Ema Kristaun fiar katak terus mosu tanba sala neʼebé mai husi Adão no Eva, hanesan temi iha livru Génesis. Maski nuneʼe, iha relijiaun kristaun balu neʼebé kahur hanorin neʼe ho sira-nia ideia rasik. Porezemplu, ema balu neʼebé Katólika dehan katak ita bele ‘hasaʼe ita-nia terus ba Maromak’ atu nia bele fó bensaun ba igreja, ka uza terus neʼe atu bele lori salvasaun ba ema seluk.