1. Maromak mak halo ita terus ka lae?

Tanbasá importante atu hatene resposta?

Ema barak lakohi hakbesik ba Maromak tanba sira hanoin katak Maromak mak halo ita terus.

Hanoin toʼok

Ulun-naʼin relijiaun barak hanorin katak Maromak mak halo ita terus. Porezemplu, balu hatete:

• Dezastre naturais mak kastigu husi Maromak.

• Labarik sira mate tanba Maromak presiza tan anju iha lalehan.

• Maromak apoia funu neʼebé hamosu terus barak.

Maibé oinsá se durante neʼe, ulun-naʼin relijiaun sira hanorin buat neʼebé sala kona-ba Maromak? Oinsá se Maromak la simu sira?

Saida mak Bíblia hatete?

Maromak la halo ita terus.

Se Maromak mak halo ita terus, neʼe kontra ninia hahalok sira neʼebé temi iha Bíblia. Porezemplu:

“[Maromak nia] dalan sira hotu mak loos. . . . Nia iha hahalok loos no laran-loos.”​—DEUTERONÓMIO 32:4.

“Maromak neʼebé loos nunka halo buat neʼebé aat, Ida neʼebé Kbiit Boot Liu Hotu nunka halo sala!”​—JOB 34:10.

“Ida neʼebé Kbiit Boot Liu Hotu sempre halo tuir justisa.”​—JOB 34:12.

Maromak la simu relijiaun sira neʼebé hanorin buat neʼebé sala kona-ba nia.

Neʼe inklui relijiaun sira neʼebé hanorin katak Maromak mak halo ita terus, no mós relijiaun sira neʼebé envolve an iha funu no violénsia.

Maromak dehan: “Profeta sira hatoʼo lia-bosok hodi haʼu-nia naran. Haʼu la haruka sira, la fó mandamentu ba sira no la koʼalia ba sira. Sira hatoʼo ba imi vizaun bosok, . . . sira fó sai liafuan ho laran-makerek.”​—JEREMIAS 14:14.

Jesus koʼalia makaʼas hasoru ulun-naʼin relijiaun sira neʼebé laran-makerek.

“Laʼós ema hotu neʼebé dehan mai haʼu: ‘Naʼi, Naʼi’, sei tama ba Ukun lalehan nian, maibé ema neʼebé halo tuir haʼu-nia Aman iha lalehan nia hakarak mak sei tama ba Ukun neʼe. Iha loron neʼebá ema barak sei dehan mai haʼu: ‘Naʼi, Naʼi, ami fó sai profesia no duni sai anju aat sira, no ami mós halo milagre barak hodi Ita-Boot nia naran, loos ka lae?’ Maibé haʼu sei hatete ba sira: ‘Haʼu la hatene imi! Hadook an tiha husi haʼu, imi neʼebé halo hahalok aat!’”​—MATEUS 7:21-23.