5. Terus sei remata ka lae?

Tanbasá importante atu hatene resposta?

Se iha razaun atu fiar katak terus sei remata, esperansa neʼe bele ajuda ita sente kontente iha moris ohin loron, no halo ita hakbesik ba Maromak.

Hanoin toʼok

Ema barak hakarak atu halakon terus, maibé sira-nia kbiit la toʼo atu halo nuneʼe. Haree toʼok ezemplu sira tuirmai:

Maski ema aprende barak liután kona-ba saúde, maibé . . .

• Moras fuan mak nafatin razaun primeiru neʼebé halo ema mate.

• Kankru oho ema rihun ba rihun tinan-tinan.

• Dr. David Bloom hakerek iha livru ida (Frontiers in Immunology) dehan: “Doutór sira nafatin labele kura moras barak. Moras uluk nian mosu fali, no iha mós moras foun neʼebé mosu.”

Maski rai balu iha osan barak, maibé . . .

• Tinan-tinan, labarik rihun ba rihun mate. Baibain neʼe akontese iha fatin neʼebé kiak.

• Ema rihun ba rihun hela iha fatin neʼebé la moos tanba sentina la iha.

• Ema rihun ba rihun la iha asesu ba bee moos.

Maski ema barak liután hatene kona-ba direitus umanus, maibé . . .

• Relatóriu husi Nasoins Unidas hatete katak tráfiku umanu kontinua iha rai barak no ema balu la hetan kastigu tanba autoridade sira “la hatene buat neʼebé akontese, ka la iha buat neʼebé sira presiza atu kaer kriminozu sira”.

  APRENDE LIUTÁN

  Haree vídeo Saida mak Maromak nia Ukun? iha jw.org/tdt.

Saida mak Bíblia hatete?

Maromak hanoin ita.

Nia hanoin ita bainhira ita triste no terus.

“Maromak la hakribi no la taka matan ba terus neʼebé ema ida hasoru; Maromak la subar oin husi nia. Bainhira nia halerik hodi husu ajuda, Maromak rona nia.”​—SALMO 22:24.

“Entrega imi-nia laran-susar hotu ba nia, tanba nia hanoin imi.”​—1 PEDRO 5:7.

Terus sei iha rohan.

Bíblia promete katak Maromak nia hakarak ba ema sei sai loos.

“Maromak . . . sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras.”​—APOKALIPSE 21:3, 4.

Maromak sei halakon terus hotu nia hun.

Nia sei halo ida-neʼe liuhusi ninia Reinu, neʼebé Bíblia esplika nuʼudar governu, ka ukun ida.

“Maromak iha lalehan sei harii ukun ida neʼebé sei nunka lakon. No ukun neʼe sei la entrega ba povu sira seluk. . . . Ukun neʼe mesak mak sei hamriik ba nafatin.”​—DANIEL 2:44.