Hatudu domin
Problema
Susar tebes atu halakon sentimentu diskriminasaun. Hanesan ita presiza tempu atu halakon virus, nuneʼe mós presiza tempu atu halakon sentimentu neʼe. Saida mak Ita bele halo atu halakon diskriminasaun husi Ita-nia laran?
Bíblia nia prinsípiu
“Tau domin nuʼudar imi-nia roupa, tanba domin mak kesi ita hamutuk iha dalan neʼebé perfeitu.”—KOLOSO 3:14.
Neʼe katak sá? Halo buat diʼak ba ema seluk bele hametin unidade. Se ita hatudu domin ba ema seluk, neʼe mós sei ajuda ita atu la hatudu diskriminasaun. Kuandu ita aprende atu hadomi ema seluk liután, la iha tan fatin iha ita-nia laran atu rai odi.
Saida mak Ita bele halo
Hanoin kona-ba dalan oioin neʼebé Ita bele hatudu domin ba ema neʼebé Ita sempre hanoin negativu. Ita bele halo buat neʼebé simples deʼit. Koko atu halo buat balu tuirmai:
Hahalok kiʼik ida-idak neʼebé ita hatudu ho domin sei ajuda ita atu hadook an husi hahalok diskriminasaun
Koko atu hatudu laran-diʼak ba ema husi grupu neʼe hodi loke odamatan ba sira, ka fó fatin ba sira atu tuur kuandu saʼe transporte públiku.
Koko atu koʼalia uitoan ho sira, maski karik sira la hatene ho didiʼak Ita-nia língua.
Hatudu pasiénsia bainhira sira hatudu hahalok neʼebé Ita la komprende.
Hatudu katak Ita hanoin sira bainhira sira konta sira-nia problema.