Respeitu ema seluk

TANBASÁ IMPORTANTE ATU RESPEITU EMA SELUK?

Bainhira ita hatudu respeitu ba ema seluk, neʼe bele hanetik situasaun neʼebé la diʼak atu la sai aat liután.

Lia-dadolin iha Bíblia dehan: “Hatán ho liafuan mamar sei hatún hirus, maibé liafuan neʼebé makaʼas halo ema hirus liután.” (Provérbios 15:1) Bainhira ita koʼalia no hatudu hahalok neʼebé la respeitu, neʼe hanesan ita fui gazolina ba ahi, no neʼe bele lori rezultadu aat.
Jesus hatete: “Buat neʼebé sai husi ema nia ibun mai husi laran.” (Mateus 12:34) Bainhira ita koʼalia la ho respeitu ba ema, neʼe bele hatudu sai oinsá ita sente kona-ba ema neʼebé mai husi rasa, suku, nasionalidade, no situasaun moris neʼebé la hanesan ho ita-nian.

Ema naʼin-32.000 husi nasaun 28 hola parte iha peskiza ida, rezultadu mak porsentu 65 husi ema sira-neʼe fó sai katak ohin loron ema neʼebé la hatudu respeitu mak barak liu fali tempu uluk.

ITA BELE HALO SAIDA?

Hatudu respeitu ba ema hotu iha eskola ka serbisu-fatin, maski ita iha hanoin neʼebé la hanesan. Buka tópiku neʼebé ita bele konkorda malu. Neʼe sei ajuda Ita atu la kritika no tesi-lia ba ema.

“Keta tesi-lia ba ema, atu nuneʼe imi mós la hetan tesi-lia.”—Mateus 7:1.

Trata ema seluk hanesan Ita hakarak sira trata Ita. Se Ita hatudu laran-diʼak no la diskrimina ema seluk, sira mós sei halo nuneʼe ba Ita.

“Buat neʼebé imi hakarak ema halo ba imi, halo mós nuneʼe ba sira.”—Lucas 6:31.

Fó perdua. Hatudu katak Ita la duvida ho ema seluk nia motivu hodi la hanoin nafatin kona-ba sira-nia liafuan no hahalok neʼebé hakanek Ita.

“Ema nia matenek sei ajuda duni nia atu la sai hirus lalais, no buat furak neʼebé nia halo mak nia la hanoin fali kona-ba ema nia sala.”—Provérbios 19:11.

Ema ho idade no rasa oioin konversa ba malu iha Reuniaun-Fatin husi Testemuña ba Jeová antes reuniaun hahú.

SAIDA MAK TESTEMUÑA BA JEOVÁ HALO?

Iha fatin neʼebé ami hela ka serbisu, ami hatudu respeitu ba ema seluk no mós anima ema atu halo ida-neʼe.

Ami oferese kursu Bíblia gratuitu ba ema hotu, maibé ami la obriga ema atu simu ami-nia fiar no opiniaun. Duké halo nuneʼe, ami hakaʼas an halo tuir Bíblia nia matadalan atu fahe Bíblia nia mensajen “ho laran-maus no respeitu kleʼan”.—1 Pedro 3:15; 2 Timóteo 2:24.

Ami la halo diskriminasaun no ema husi situasaun moris oioin bele tuir ami-nia reuniaun no aprende kona-ba Bíblia. Ami hakaʼas an atu hatudu toleránsia no “hatudu respeitu ba ema oioin”.—1 Pedro 2:17.

Ami hatudu respeitu ba governu nia podér iha rai neʼebé ami hela. (Roma 13:1) Ami halo tuir lei no selu taxa. No maski ami neutrál iha buat polítiku nian, ami nafatin respeitu ema seluk nia direitu atu foti desizaun kona-ba buat polítiku nian.