TAHAN HASORU PROBLEMA EKONOMIA

Kontente ho buat neʼebé Ita iha

Ema neʼebé kontente ho buat neʼebé sira iha, baibain prontu atu halo sira-nia moris simples bainhira sira-nia situasaun troka.

TANBASÁ IMPORTANTE?

Matenek-naʼin neʼebé estuda kona-ba ema nia emosaun hatete katak ema neʼebé kontente ho buat neʼebé sira iha baibain iha hanoin neʼebé pozitivu. Sira mós ladún sente laran-moras ba ema seluk. Tan neʼe sira sente kontente liu no ladún sente estrese. Tuir loloos, baibain ema neʼebé ladún iha rikusoin mak sente kontente liu. Neʼe tanba sira tau fokus ba buat neʼebé importante liu, hanesan gasta tempu ho família no belun.

“Se ita iha ai-han no roupa, ita tenke kontente ho buat sira-neʼe.”—1 Timóteo 6:8.

SAIDA MAK ITA BELE HALO?

Keta kompara Ita-nia moris ho ema seluk. Se Ita kompara Ita-nia moris neʼebé simples ho ema neʼebé iha sasán barak, ikusmai Ita sei la sente kontente no sente laran-moras. Karik Ita hanoin katak ema neʼebé iha sasán barak mak ema riku, maibé tuir loloos sira barak iha debe boot. Nicole neʼebé hela iha rai-Senegál hatete: “Haʼu la presiza sasán barak atu bele sente kontente. Haʼu kontente ona ho buat neʼebé haʼu iha, no neʼe ajuda haʼu atu la sente estrese bainhira ema seluk iha sasán barak liu fali haʼu.”

Sujestaun: Hakaʼas an atu la haree beibeik iklan sira no mós buat neʼebé ema tau iha média sosiál kona-ba sira-nia moris, osan, no sasán neʼebé folin karun.

“Maski ema ida hetan rikusoin barak, ninia moris la mai husi buat neʼebé nia iha.”—Lucas 12:15.

Hatudu agradese. Ema neʼebé toman atu hatudu agradese baibain sente kontente ho buat neʼebé sira iha no la sente katak sira tenke hetan buat barak liután. Roberton husi Haití hatete: “Haʼu uza tempu atu hanoin kona-ba laran-diʼak neʼebé ema seluk hatudu mai haʼu no haʼu-nia família. Tuirmai, haʼu fó sai haʼu-nia agradese ba sira. Haʼu mós hanorin haʼu-nia oan-mane neʼebé tinan ualu atu dehan obrigadu bainhira nia simu buat ruma.”

Sujestaun: Loroloron, se Ita sente agradese kona-ba buat ruma, hanesan saúde neʼebé diʼak, família no belun neʼebé hadomi Ita, ka loro-matan tun neʼebé furak, hakerek ida-neʼe iha kadernu ida.

“Ema neʼebé laran-kontente, nia moris ho ksolok loron ba loron.”—Provérbios 15:15.

Dala ruma, la fasil atu sente kontente ho buat neʼebé Ita iha. Maibé keta rende an. Kuandu Ita kontinua hakaʼas an atu halo ida-neʼe, Ita sei sente haksolok. Ita la presiza iha osan barak atu bele sente kontente neʼebé loos.