Ita “aprende ona segredu” atu sai kontente ka lae?

1. Kontente katak sá? Esplika toʼok.

ITA mak ema neʼebé kontente ka lae? Ema neʼebé kontente sente haksolok no dame hodi fokus deʼit ba bensaun neʼebé nia simu daudaun. Nia la sente estrese ka hirus kona-ba buat neʼebé nia la iha. Maibé, kontente la dehan katak ita la halo buat ida ho ita-nia moris. Porezemplu, diʼak ba ema Kristaun ida atu buka oportunidade hodi bele aumenta ninia serbisu ba Jeová. (Rom 12:1; 1 Tim 3:1) Maski nuneʼe, se nia mak ema neʼebé kontente, nia sei la lakon ninia ksolok bainhira nia seidauk hetan knaar neʼebé nia hakarak.

2. Se ita la kontente ho buat neʼebé ita iha, oinsá mak neʼe lori perigu?

² Se ema ida la kontente ho buat neʼebé nia iha, neʼe bele lori perigu. Ema hanesan neʼe karik halo serbisu ba oras barak demais atu hetan buat neʼebé nia la presiza. Triste mak iha ona ema Kristaun balu neʼebé naʼok osan no sasán neʼebé sira hakarak. Karik sira hanoin: ‘Haʼu merese hetan ida-neʼe’ ka ‘Haʼu hein ona ida-neʼe ba tempu kleur’ ka ‘Loron seluk haʼu sei fó fali’. Maski nuneʼe, hahalok naʼok naran deʼit mak la halo Jeová kontente no la respeitu Jeová. (Prov 30:9) Ema balu fali sai triste demais tanba la hetan priviléjiu neʼebé sira hakarak iha kongregasaun, tan neʼe sira lakohi tan serbí Jeová. (Gal 6:9) Oinsá mak ema ida neʼebé dedika an ona ba Jeová bele sai hanesan neʼe? Karik tanba ema neʼe la haburas hahalok kontente ho buat neʼebé nia iha.

3. Filipe 4:​11, 12 hanorin saida mai ita?

³ Ita hotu bele haburas kontente. Apóstolu Paulo hakerek: “Iha situasaun naran deʼit haʼu aprende ona atu sai kontente ho buat neʼebé haʼu iha.” (Lee Filipe 4:​11, 12.) Nia hakerek ida-neʼe bainhira nia dadur hela. Maski nuneʼe, nia la lakon ninia ksolok. Nia “aprende ona segredu” atu moris kontente. Se ita sente susar atu sente kontente, Paulo nia liafuan no esperiénsia hatudu katak ita mós bele kontente. Ita labele espera katak ita-nia kontente sei mosu mesak deʼit. Tuir loloos, ita tenke aprende atu sai kontente. Oinsá? Mai ita buka-hatene segredu neʼebé ajuda ita atu sente kontente.

HABURAS SENTIMENTU AGRADESE

4. Kuandu ita hatene fó agradese, oinsá neʼe ajuda ita sente kontente? (1 Tesalónika 5:18)

⁴ Ema neʼebé hatene fó agradese bele sente kontente. (Lee 1 Tesalónika 5:18.) Porezemplu, bainhira ita agradese ba buat báziku neʼebé ita iha, neʼe ajuda ita atu la hanoin barak kona-ba buat neʼebé ita la iha. Se ita agradese ba knaar neʼebé ita halo daudaun ba Jeová, ita sei hakaʼas an atu halaʼo knaar neʼe ho didiʼak duké hanoin beibeik kona-ba knaar seluk neʼebé ita hakarak. Tan neʼe, Bíblia anima ita atu sempre hatoʼo agradese ba Jeová kuandu halo orasaun! Sentimentu agradese ajuda ita atu iha “Maromak nia dame neʼebé aas liu ema nia hanoin hotu”.—Flp 4:​6, 7.

5. Ema Izraél presiza agradese kona-ba saida deʼit? (Haree mós dezeñu.)

⁵ Hanoin toʼok saida mak akontese ba ema Izraél. Dala barak sira muramura ba Jeová tanba hakarak hahán neʼebé uluk sira han iha Ejitu. (Núm 11:​4-6) Klaru katak moris iha rai-fuik mak la fasil. Saida mak bele ajuda sira atu sente kontente? Sira presiza hanoin kona-ba buat neʼebé Jeová halo ona ba sira no fó agradese ba ida-neʼe. Iha Ejitu, ema trata sira nuʼudar atan no Jeová halo susar sanulu kona ema Ejitu no salva sira. Depois ema Izraél sai livre, sira “husu ema Ejitu atu fó” osan-mutin, osan-mean, no roupa oioin. (Éx 12:​35, 36) Bainhira tropa Ejitu duni tuir sira toʼo Tasi Mean, Jeová halo tasi neʼe fahe ba rua. No nuʼudar sira laʼo iha rai-fuik, Jeová fó sira maná loroloron. Se nuneʼe, tanbasá sira muramura? Laʼós tanba sira falta hahán, maibé tanba sira la agradese ba buat neʼebé sira iha.

6. Iha dalan saida deʼit mak ita bele haburas agradese?

⁶ Oinsá mak ita bele haburas agradese? Primeiru, loroloron buka tempu atu hanoin kona-ba buat diʼak neʼebé ita iha. Karik ita bele hakerek buat rua ka tolu neʼebé ita agradese. (Lam 3:​22, 23) Segundu, hatudu sai agradese. Buka dalan atu hatoʼo obrigadu ba ema neʼebé halo ona buat diʼak ba Ita. Maibé importante liu mak sempre fó obrigadu ba Jeová. (Sal 75:1) Terseiru, habelun ho ema neʼebé hatene agradese. Maibé keta ransu ho ema neʼebé sempre muramura, tanba ita mós bele sai hanesan neʼe. (Deut 1:​26-28; 2 Tim 3:​1, 2, 5) Bainhira ita buka oportunidade atu hatoʼo agradese, neʼe sei ajuda ita atu la hanoin barak kona-ba buat neʼebé ita la iha.

7. Oinsá mak irmán Aci haburas sentimentu agradese, no rezultadu mak saida?

⁷ Hanoin toʼok kona-ba irmán Aci neʼebé hela iha Indonézia. Nia hatete: “Durante pandemia COVID-19, haʼu komesa kompara haʼu-nia situasaun ho irmaun-irmán sira. Neʼe halo haʼu la kontente.” (Gal 6:4) Saida mak ajuda nia atu troka nia hanoin? Nia hatete: “Haʼu komesa fokus ba bensaun neʼebé haʼu hetan loroloron no hanoin kona-ba buat diʼak barak neʼebé haʼu simu tanba sai parte ba Jeová nia organizasaun. Tuirmai haʼu fó agradese ba Jeová. Rezultadu mak haʼu sente kontente duni.” Se Ita la kontente ho Ita-nia situasaun, Ita bele halo hakat sira-neʼe atu haburas sentimentu agradese.

HATUDU HARAIK AN

8. Saida mak akontese ba Baruc?

⁸ Ba tempu balu, Jeremias nia sekretáriu Baruc la kontente ho ninia situasaun. Baruc hetan knaar neʼebé susar, neʼe mak atu ajuda Jeremias hatoʼo mensajen tesi-lia nian ba nasaun Izraél neʼebé ulun-toos. Ba tempu balu, Baruc lakon ninia fokus ba knaar neʼebé nia simu husi Jeová, no hanoin demais kona-ba ninia an no ninia hakarak. Tan neʼe, liuhusi Jeremias, Jeová hatete ba Baruc: “Ó buka nafatin buat boot sira ba ó-nia an. Keta buka tan buat sira-neʼe.” (Jer 45:​3-5) Neʼe hanesan Jeová hatete: “Kontente bá ho ó-nia situasaun agora nian.” Baruc rona ba konsellu neʼe no kontinua serbí Jeová.

9. Saida mak ita aprende husi 1 Korinto 4:​6, 7? (Haree mós foto.)

⁹ Dala ruma, ema Kristaun ida bele hanoin katak nia merese simu knaar ruma iha Jeová nia organizasaun. Karik nia mak ema neʼebé matenek, badinas, no iha ona esperiénsia, maibé ema seluk mak hetan fali knaar neʼebé nia hakarak. Saida mak bele ajuda nia atu la sente laran-kraik? Nia bele hanoin kona-ba apóstolu Paulo nia liafuan iha 1 Korinto 4:​6, 7. (Lee.) Knaar naran deʼit neʼebé ita simu no talentu neʼebé ita iha mak mai husi Jeová. Jeová fó buat sira-neʼe laʼós tanba ita mak espesiál liu fali ema seluk. Maibé, nia fó buat sira-neʼe tanba nia hatudu domin no laran-diʼak neʼebé boot mai ita.—Rom 12:​3, 6; Éf 2:​8, 9.

10. Oinsá mak ita bele haburas haraik an?

¹⁰ Ita bele haburas haraik an hodi hanoin kleʼan kona-ba Jesus nia ezemplu. Hanoin toʼok kalan neʼebé Jesus fase apóstolu sira-nia ain. Apóstolu João hakerek: “Jesus hatene [1] katak Aman entrega ona buat hotu ba ninia liman, no [2] katak nia mai husi Maromak no [3] nia atu fila fali ba Maromak. . . . Nia hahú fase dixípulu sira-nia ain.” (João 13:​3-5) Jesus bele hanoin katak apóstolu sira tenke fase ninia ain. Maibé durante Jesus nia moris tomak iha rai, nia nunka hanoin katak nia merese iha moris neʼebé diʼak. (Lc 9:58) Jesus haraik an no kontente. Nia hatudu ezemplu neʼebé perfeitu mai ita.—João 13:15.

11. Oinsá mak haraik an ajuda Dennis atu sente kontente?

¹¹ Irmaun Dennis husi Olanda koko atu halo tuir Jesus nia ezemplu kona-ba haraik an, maibé neʼe la fasil. Nia hatete: “Dala ruma sentimentu foti an ka la kontente sai buras iha haʼu-nia laran, porezemplu bainhira ema seluk hetan priviléjiu iha kongregasaun. Kuandu neʼe akontese, haʼu estuda tópiku kona-ba haraik an. Haʼu kria kategoria iha aplikasaun JW Library^® kona-ba haraik an no rai eskritura sira atu haʼu bele hetan lalais no lee fali. Haʼu mós download iha haʼu-nia telefone diskursu balu kona-ba haraik an, no rona beibeik ba ida-neʼe.a Haʼu aprende katak serbisu hotu neʼebé ita halo ba Jeová mak atu fó glória ba nia, laʼós ba ita-nia an. Ita ida-idak halo buat kiʼik oioin hodi bele kumpre buat neʼebé boot.” Se Ita komesa sente la kontente ho Ita-nia situasaun, hakaʼas an atu haburas haraik an. Neʼe sei halo Ita hakbesik liután ba Jeová no sente kontente.—Tgo 4:​6, 8.

HANOIN KLEʼAN KONA-BA ITA-NIA ESPERANSA

12. Esperansa saida mak bele ajuda ita atu sai kontente? (Isaias 65:​21-25)

¹² Ita sei sente kontente liután se ita hanoin kleʼan kona-ba esperansa furak neʼebé ita sei simu. Iha livru Isaias, Jeová fó-hatene katak nia komprende susar barak neʼebé ita hasoru, no promete atu halakon susar sira-neʼe hotu. (Lee Isaias 65:​21-25.) Ita sei iha uma neʼebé furak no seguru, serbisu neʼebé diʼak, no han hahán neʼebé saudavel no gostu. Ita sei nunka hanoin barak kona-ba perigu sira neʼebé bele kona ita ka ita-nia oan. (Isa 32:​17, 18; Eze 34:25) Ita-nia futuru sei furak tebes no seguru.

13. Iha situasaun saida deʼit mak ita presiza fokus liután ba ita-nia esperansa?

¹³ Agora mak tempu neʼebé ita presiza fokus liután ba ita-nia esperansa. Tanbasá? Tanba ita moris iha “loron ikus sira” no ita hotu hasoru problema neʼebé “susar atu tahan”. (2 Tim 3:1) Loroloron Jeová ajuda ita tahan hodi fó ita matadalan, kbiit, no apoiu neʼebé ita presiza. (Sal 145:14) Ita-nia esperansa mós bele ajuda ita, liuliu bainhira ita hasoru susar. Karik Ita sente susar atu tau matan ba família nia presiza fíziku. Neʼe katak Ita sempre moris kiak deʼit ka lae? Klaru katak lae! Jeová promete atu fó Ita buat neʼebé Ita presiza. No iha paraízu, nia sei fó ba Ita buat barak liután. (Sal 9:18; 72:​12-14) Karik loroloron Ita tahan moras, depresaun, ka problema saúde neʼebé sériu. Neʼe katak Ita la iha ona esperansa ka lae? Lae duni. Iha mundu foun, moras no mate sei la iha tan. (Apok 21:​3, 4) Esperansa neʼe ajuda ita atu sente kontente duké sai hirus ka laran-moras. Ita bele sente kontente maski hasoru situasaun la justisa, moras, lakon ema neʼebé ita hadomi, ka susar seluk tan. Tanbasá? Tanba maski hasoru susar naran deʼit, ita hatene katak “terus sira neʼebé ita hasoru daudaun mak ba tempu uitoan deʼit” no iha mundu foun susar sei la iha tan.—2 Kor 4:​17, 18.

14. Oinsá mak ita bele hametin ita-nia esperansa?

¹⁴ Tanba esperansa bele ajuda ita atu sai kontente, oinsá mak ita bele hametin ida-neʼe? Hanesan ema ida presiza uza ókulu atu bele haree ho klaru buat neʼebé dook, ita mós presiza halo buat ruma hodi bele haree ho momoos paraízu iha futuru. Porezemplu, bainhira hanoin barak kona-ba ita-nia situasaun ekonomia, ita bele imajina ita-nia moris iha futuru sei sai oinsá kuandu osan, debe no kiak la iha tan. Se ita laran-kraik tanba seidauk hetan priviléjiu ruma, ita bele hanoin kona-ba oinsá buat sira-neʼe la importante se kompara ho tempu neʼebé ita-nia moris sei sai perfeitu no serbí Jeová ba tinan rihun ba rihun. (1 Tim 6:19) Karik foufoun ita sente susar atu imajina kona-ba futuru duké hanoin kona-ba moris ohin loron nian. Maibé kuandu ita kontinua imajina kona-ba futuru neʼebé Jeová promete ona, neʼe sei halo fasil ba ita atu la hanoin barak kona-ba problema sira.

15. Saida mak Ita aprende husi Christa nia liafuan?

¹⁵ Hanoin toʼok oinsá esperansa ajuda irmán Christa neʼebé kaben ho Dennis, neʼebé temi ona antes neʼe. Christa hatete: “Haʼu iha moras ida neʼebé halo haʼu-nia múskulu sai fraku ba beibeik. Haʼu uza kadeira-roda no tenke toba deʼit iha kama. Haʼu sente moras loroloron. Haʼu-nia doutór fó-hatene haʼu katak haʼu-nia moras neʼe sei la sai diʼak. Maibé haʼu hanoin kedas: ‘Doutór nia haree kona-ba futuru la hanesan ho haʼu-nian.’ Haʼu fokus ba haʼu-nia esperansa, no neʼe halo haʼu sente dame. Agora haʼu presiza tahan, maibé iha mundu foun haʼu sei goza haʼu-nia moris!”

“SIRA NEʼEBÉ HAMTAʼUK NIA SEI LA FALTA BUAT IDA”

16. Tanbasá Liurai David hatete katak ema neʼebé hamtaʼuk Jeová “la falta buat ida”?

¹⁶ Ema neʼebé serbí Jeová ho kontente mós hasoru problema. Hanoin toʼok kona-ba Liurai David. Bíblia temi katak ninia oan naʼin-tolu mate. Ema duun matak nia, trai nia, no duni atu oho nia ba tinan barak. Maibé durante ninia susar sira, nia hatete: “Sira neʼebé hamtaʼuk [Jeová] sei la falta buat ida.” (Sal 34:​9, 10) Tanbasá David bele koʼalia hanesan neʼe? Tanba nia hatene katak maski Jeová la halakon ninia susar sira, maibé Jeová sempre fó ba nia buat neʼebé nia presiza. (Sal 145:16) Hanesan David, ita mós bele tau fiar ba Jeová katak nia sei tau matan mai ita durante ita-nia susar hotu. Neʼe halo ita sente kontente.

17. Tanbasá Ita presiza aprende segredu atu sai kontente?

¹⁷ Jeová hakarak Ita atu sente kontente. (Sal 131:​1, 2) Tan neʼe, hakaʼas an aprende segredu atu bele sai kontente. Se Ita hakaʼas an atu haburas sentimentu agradese, hatudu haraik an, no hametin Ita-nia esperansa, Ita mós bele hatete: “Haʼu kontente.”—Sal 16:​5, 6.