Maromak hahú halo buat hotu

BUAT hotu neʼebé diʼak mai husi Maromak. Nia halo loro-matan atu fó naroman mai ita iha loron, no fulan ho fitun atu fó naroman iha kalan. No mós, Maromak halo mundu mai ita atu hela.

Maibé, loro-matan, fulan, fitun, no mundu laʼós buat neʼebé Maromak halo ulukliu. Hatene saida mak nia halo ulukliu? Ulukliu, Maromak halo kriatura sira hanesan nia an. Ita la haree kriatura sira-neʼe, hanesan ita la haree Maromak. Bíblia dehan kriatura sira-neʼe mak anju. Maromak halo anju sira-neʼe atu hela hamutuk ho nia iha lalehan.

Anju primeiru mak besik liu Maromak. Nia maka Maromak nia Oan-Mane primeiru, no nia serbisu hamutuk ho Aman. Nia ajuda Maromak atu halo buat seluseluk. Nia ajuda Maromak atu halo loro-matan, fulan, fitun, no mós mundu.

Iha tempu neʼebá, mundu neʼe hanesan saida? Kuandu Maromak hahú halo mundu, la iha ema ida bele hela iha neʼebá. Bee deʼit mak taka Rai tomak. Maibé, Maromak hakarak ema atu hela iha mundu. Nuneʼe, nia hahú prepara buat hotu mai ita. Saida mak nia halo?

Primeiru, rai presiza naroman. Nuneʼe Maromak halo loro-matan fó naroman ba rai. Nia halo ida-neʼe atu iha loron no kalan. Depois neʼe, Maromak hasaʼe rai mosu husi bee.

Ulukliu, la iha buat ida iha Rai. Hanesan ó haree iha dezeñu ida-neʼe. La iha ai no ai-funan, no animál sira. La iha mós ikan iha tasi. Maromak sei iha serbisu barak atu halo Rai sai furak ba animál no ema. Dezeñu iha pájina tomak