Husi tempu kriasaun toʼo Rai-Nabeen

Lalehan no Rai mai husi neʼebé? Loro-matan, fulan, no fitun, no mós buat hotu-hotu iha mundu, oinsá mak mosu? Bíblia hatete duni, katak Maromak mak kria buat hirak-neʼe. Nuneʼe, livru ida-neʼe konta istória Bíblia hahú husi tempu kriasaun.

Ita sei aprende katak Maromak halo ulukliu mak kriatura espíritu sira hanesan nia an. Sira mak anju. Maibé, Maromak kria mundu ba ita ema. Nuneʼe, Maromak halo mane naran Adão no feto naran Eva, no tau sira iha jardín neʼebé furak tebes. Maibé, sira la halo tuir Maromak no lakon sira-nia direitu atu moris ba nafatin.

Husi tempu neʼebé Maromak kria Adão toʼo Rai-Nabeen, hamutuk tinan 1.656. Durante tempu neʼe, buat aat mak barak. Iha lalehan, iha Satanás no nia anju aat sira, kriatura espíritu neʼebé ema la haree. Iha Rai, iha Caim no ema seluseluk neʼebé aat. Balu forte tebes la hanesan ema baibain. Maibé, iha mós ema neʼebé diʼak iha Rai — Abel, Enoc, no mós Noé. Iha Parte IDA, ita sei lee kona-ba ema sira-neʼe no saida mak akontese ba sira.