Maromak kria anju sira rihun ba rihun

Bíblia hatete katak Maromak Jeová mak espíritu ida neʼebé matan la haree. (João 4:24; 2 Korinto 3:17, 18) Ulukliu Maromak Jeová hela mesak iha lalehan. Tuirmai, nia halo kriatura espíritu rihun ba rihun neʼebé ita bolu anju sira. Sira iha forsa no matenek liu fali ema. Iha vizaun ida, apóstolu João haree “anju barak” neʼebé haleʼu Maromak nia kadunan.—Apokalipse 5:11; Ebreu 1:7.

Maromak Jeová kria uluk tiha ona anju sira antes nia kria rai. (Jó [Ayub] 38:4-7) Tan neʼe, anju sira laʼós ema mate nia klamar neʼebé saʼe ba lalehan.