INFORMASAUN IHA OIN | ANJU SIRA IHA DUNI KA LAE?
Bíblia nia hanorin kona-ba anju sira
Ita hakarak hatene lia-loos kona-ba anju sira ka lae? Porezemplu, anju sira mak kriatura hanesan saida? Sira mai husi neʼebé? Sira halo saida? Ita bele hetan resposta ba pergunta sira-neʼe husi Maromak nia Liafuan, Bíblia. (2 Timóteo 3:16) Mai ita buka-hatene Bíblia nia hanorin.
Maromak mak espíritu neʼebé ita-nia matan la bele haree, nuneʼe mós ho anju sira. Nuʼudar kriatura espíritu, anju sira “la iha isin no ruin”. Anju diʼak sira hela iha lalehan no sira bele hasoru no hakbesik ba Maromak. —Lucas 24:39; Mateus 18:10; João 4:24.
Iha tempu uluk, dala ruma anju sira tun mai rai no nakfila an sai fali ema atu kumpre knaar oioin husi Maromak, no depois kumpre tiha sira-nia knaar, sira fila fali ba lalehan nuʼudar espíritu.—Juízes (Hakim-Hakim) 6:11-23; 13:15-20.
Maski Bíblia temi anju sira nuʼudar mane no sira sempre nakfila an sai mane, maibé tuir loloos, anju sira laʼós mane, ka feto. Sira la kaben no mós la iha oan. Ema barak hanoin katak bebé, labarik, ka ema boot neʼebé mate ona mak sai fali anju. Maibé Bíblia la hanorin hanesan neʼe. Tuir loloos, Maromak Jeová mak kria anju sira, tan neʼe Bíblia bolu sira nuʼudar “Maromak nia oan sira”.—Jó (Ayub) 1:6; Salmo (Mazmur) 148:2, 5.
Bíblia koʼalia kona-ba “ema nia lian oioin no anju nia lian”, neʼe hatudu katak anju sira iha sira-nia língua rasik. Maski Maromak uza anju sira atu hatoʼo lia-menon ba ema, maibé Nia bandu ita labele adora ka halo orasaun ba anju sira.—1 Korinto 13:1; Apokalipse 22:8, 9.
Iha anju rihun ba rihun, karik barak liu fali biliaun ida.—Daniel 7:10; Apokalipse 5:11.
Anju sira “iha kbiit boot” liu fali ema, no sira mós matenek liu fali ema. Sira bele book an lalais tebes husi fatin ida ba fatin seluk neʼebé dook tebes.—Salmo (Mazmur) 103:20; Daniel 9:20-23.
Maski nuneʼe, sira-nia forsa no matenek mak limitadu, no anju sira mós la hatene buat balu.—Mateus 24:36; 1 Pedro 1:12.
Maromak kria anju sira ho kapasidade atu haleno Ninia hahalok sira no foti desizaun rasik. Tan neʼe, hanesan ho ema, anju sira bele hili atu halo buat neʼebé loos ka buat neʼebé sala. Anju balu hili atu kontra hasoru Maromak.—Judas 6.