Banati-tuir anju sira neʼebé laran-metin

1-2. (a) Oinsá mak ita diferente ho anju sira? (b) Iha dalan oinsá mak ita hanesan ho anju sira?

BAINHIRA Jeová dada Ita ba lia-loos, nia konvida Ita atu sai família ida hamutuk ho ninia atan sira, neʼe inklui anju laran-metin millaun ba millaun. (Dan 7:​9, 10) Nuʼudar ita hanoin kona-ba anju sira, karik ita rekoñese katak sira mak diferente ho ita. Porezemplu, anju sira iha ba tempu kleur ona antes ita ema iha. (Job 38:​4, 7) Sira iha kbiit neʼebé boot liu fali ita. Sira santu no laran-loos liu fali ita ema sala-naʼin.—Lc 9:26.

² Maski ita diferente ho anju sira, maibé ita iha buat barak neʼebé hanesan. Porezemplu, hanesan anju sira, ita mós bele haleno Jeová nia hahalok diʼak sira. Ita mós iha liberdade atu hili. Hanesan anju sira, ita ida-idak iha naran, hahalok, no mós knaar oioin, no ita mós presiza adora ita-nia Kriadór.—1 Ped 1:12.

3. Saida mak ita bele aprende husi anju sira neʼebé laran-metin?

³ Tanba ita iha buat barak neʼebé hanesan ho anju sira, sira-nia ezemplu diʼak mós bele anima no hametin ita. Tuir loloos, ita bele aprende lisaun oioin husi sira. Iha lisaun neʼe, ita sei haree oinsá ita bele banati-tuir anju sira-nia haraik an, sira-nia domin ba ema, hahalok tahan, no sira-nia hakaʼas an atu halo kongregasaun moos nafatin.

ANJU SIRA HARAIK AN

4. (a) Oinsá mak anju sira hatudu haraik an? (b) Tanbasá mak anju sira haraik an? (Salmo 89:7)

⁴ Anju sira neʼebé laran-metin mak haraik an. Maski sira iha esperiénsia, kbiit, no matenek, maibé sira halo tuir Jeová nia matadalan. (Sal 103:20) Kuandu sira halaʼo sira-nia knaar, sira nunka gaba an ka uza sira-nia kbiit atu dada atensaun ba sira-nia an. Sira kontente atu halo tuir buat neʼebé Jeová husu maski ema nunka hatene sira-nia naran.a (Gén 32:​24, 29; 2 Reis 19:35) Sira lakohi simu glória neʼebé loloos tenke fó deʼit ba Jeová. Tanbasá mak anju sira-neʼe haraik an tebes? Tanba sira hadomi Jeová no hatudu respeitu kleʼan ba nia.—Lee Salmo 89:7.

5. Oinsá mak anju ida hatudu haraik an bainhira korrije apóstolu João? (Haree mós dezeñu.)

⁵ Haree toʼok ezemplu ida kona-ba anju sira-nia haraik an. Maizumenus iha tinan 96 EC, anju ida neʼebé ita la hatene ninia naran fó sai vizaun kmanek ida ba apóstolu João. (Apok 1:1) João nia reasaun mak oinsá? Nia koko atu adora anju neʼe. Maibé, kriatura espíritu neʼe hapara nia lalais hodi hatete: “Kuidadu bá! Keta halo ida-neʼe! Haʼu mak atan deʼit hanesan ó no ó-nia maun-alin sira . . . Adora Maromak bá!” (Apok 19:10) Anju neʼe haraik an tebes! Nia lakohi simu glória husi João. Nia haruka kedas João atu adora Maromak Jeová. Iha tempu hanesan, anju neʼe la haree João nuʼudar ema neʼebé la importante. Maski anju neʼe adora Jeová ba tempu kleur no mós iha kbiit boot liu fali João, anju neʼe haraik an hodi dehan katak nia mak atan deʼit hanesan João. No maski anju neʼe presiza korrije João, maibé nia la koʼalia makaʼas ba João neʼebé idade ona. Nia koʼalia ho laran-diʼak. Nia komprende katak João hakfodak ho vizaun neʼe.

6. Oinsá mak ita bele banati-tuir anju sira-nia haraik an?

⁶ Oinsá mak ita bele banati-tuir anju sira-nia haraik an? Ita mós halaʼo ita-nia knaar hodi la gaba an ka buka naran-boot kona-ba buat neʼebé ita halo ona. (1 Kor 4:7) Ita mós labele sente katak ita mak importante liu fali ema seluk se ita serbí Jeová ba tempu kleur ona ka iha priviléjiu ruma. Tuir loloos, se ita iha responsabilidade liután, ita presiza haree ita-nia an kiʼik liu fali ema seluk. (Lc 9:48) Hanesan anju sira, ita hakarak serbí ema seluk. Ita lakohi halo ita-nia an mak importante liu fali ema seluk.

7. Oinsá mak ita bele hatudu haraik an bainhira ita fó konsellu ka korrije ema ruma?

⁷ Ita mós bele hatudu haraik an bainhira fó konsellu ka korrije maluk fiar-naʼin ida ka ita-nia oan. Dala ruma ita presiza fó konsellu hodi koʼalia nakloke. Maibé hanesan anju neʼebé korrije João ho laran-diʼak, ita mós bele fó konsellu hodi la halo ema neʼe laran-kraik. Se ita la haree ita-nia an boot liu fali ema seluk, ita sei fó konsellu husi Bíblia iha dalan neʼebé respeitu no laran-diʼak.—Kol 4:6.

ANJU SIRA HADOMI EMA

8. (a) Tuir Lucas 15:​10, oinsá mak anju sira hatudu domin ba ema? (b) Oinsá mak anju sira hola parte iha serbisu haklaken? (Haree mós dezeñu.)

⁸ Anju sira iha interese ba ema no hadomi ema. Sira haksolok kuandu ema ida arrepende an no fila fali ba Jeová, ka kuandu ema ida troka ninia hahalok no komesa serbí Jeová. (Lee Lucas 15:10.) Anju sira mós hola parte iha serbisu haklaken. (Apok 14:6) Maski sira la haklaken diretamente ba ema, maibé karik sira dirije haklaken-naʼin atu haklaken ba ema neʼebé hakarak aprende kona-ba Jeová. Klaru, ita labele hatene ho loloos se anju sira hola parte iha situasaun hotu iha serbisu haklaken ka lae. Tuir loloos Jeová mós bele uza dalan seluk, hanesan ninia espíritu santu atu ajuda ema ka dirije ninia povu. (Após 16:​6, 7) Maski nuneʼe, nia nafatin uza anju sira iha dalan neʼebé boot. Tan neʼe, bainhira ita haklaken liafuan diʼak, ita bele fiar katak anju sira sei apoia ita.—Haree kaixa “Maromak hatán sira-nia orasaun”.b

9. Oinsá mak ita bele banati-tuir anju sira-nia domin ba ema?

⁹ Oinsá mak ita bele banati-tuir anju sira-nia domin ba ema? Bainhira ita rona anúnsiu katak kongregasaun simu fali ema ida, ita bele haksolok hanesan ho anju sira. Ita bele hakaʼas an atu fó benvindu no hatudu domin ba nia. (Lc 15:​4-7; 2 Kor 2:​6-8) Ita mós bele banati-tuir anju sira hodi haklaken ho badinas. (Ecle 11:6) Hanesan anju sira apoia ita iha serbisu haklaken, ita mós bele buka dalan oioin atu apoia irmaun-irmán sira iha serbisu haklaken. Porezemplu, ita bele halo planu atu haklaken ho sira neʼebé ladún iha esperiénsia. Ita mós bele haklaken hamutuk ho sira neʼebé idade ona ka iha problema saúde.

10. Ita aprende saida husi Sara nia esperiénsia?

¹⁰ Oinsá se ita-nia situasaun la permite atu halo buat barak ba Jeová? Ita bele nafatin buka dalan seluk atu serbisu hamutuk ho anju sira iha serbisu haklaken. Hanoin toʼok kona-ba esperiénsia husi irmán Sarac iha rai-Índia. Depois serbí tiha nuʼudar pioneiru maizumenus ba tinan 20, Sara kona moras neʼebé halo nia toba deʼit no labele laʼo. Nia sente estrese tebetebes. Maibé tanba hetan ajuda husi família espirituál neʼebé hadomi nia no lee Bíblia loroloron, neineik-neineik Sara bele iha fali hanoin neʼebé pozitivu. Klaru katak nia presiza halo mudansa ho ninia serbisu haklaken tanba ninia situasaun. Nia labele tuur atu hakerek karta, tan neʼe nia bele haklaken deʼit liuhusi telefone. Entaun, nia telefone ninia vizita fali no sira hatete ba nia kona-ba ema seluk neʼebé interese. Rezultadu mak saida? Fulan balu liu tiha, Sara iha estudante Bíblia naʼin-70, no nia mesak deʼit labele halaʼo estuda neʼe hotu! Tan neʼe, nia fó estudante balu ba irmaun-irmán sira. Ninia estudante barak agora tuir reuniaun. Imajina toʼok anju sira sente kontente tebes tanba bele serbisu hamutuk ho irmaun-irmán sira hanesan Sara, neʼebé halo buat naran deʼit atu bele haklaken!

ANJU SIRA HATUDU HAHALOK TAHAN

11. Oinsá mak anju sira neʼebé laran-metin hatudu hahalok tahan?

¹¹ Anju sira neʼebé laran-metin mak ezemplu kapás kona-ba hahalok tahan. Sira presiza tahan hahalok la justisa no hahalok aat ba tinan rihun ba rihun. Sira haree bainhira Satanás no kriatura espíritu seluk neʼebé uluk serbí Jeová ikusmai kontra Jeová. (Gén 3:1; 6:​1, 2; Jud 6) Bíblia temi kona-ba anju laran-metin ida neʼebé kontra hasoru anju aat ida. (Dan 10:13) Liután neʼe, iha ema nia istória, anju sira haree katak iha ema uitoan deʼit neʼebé hili atu serbí Jeová. Maski nuneʼe, anju neʼebé laran-metin kontinua serbí Jeová ho kontente no badinas. Sira hatene katak iha tempu neʼebé loos, Maromak sei halakon hahalok hotu neʼebé la justisa.

12. Saida mak bele ajuda ita tahan?

¹² Oinsá mak ita bele banati-tuir anju sira-nia hahalok tahan? Hanesan anju sira, karik ita mós haree situasaun neʼebé la justisa ka ema kontra ita. Maibé ita mós bele fiar metin katak iha tempu neʼebé loos, Maromak sei halakon buat aat hotu. Entaun hanesan anju neʼebé laran-metin, “ita labele rende an atu halo buat neʼebé diʼak”. (Gal 6:9) No Maromak promete atu ajuda ita tahan. (1 Kor 10:13) Ita bele halo orasaun ba Jeová atu husu ninia espíritu santu neʼebé bele fó ita hahalok pasiénsia no ksolok. (Gal 5:22; Kol 1:11) Oinsá se ema kontra ita? Tau fiar tomak ba Jeová, no labele taʼuk. Jeová sempre apoia no hametin ita.—Ebr 13:6.

ANJU SIRA AJUDA KONGREGASAUN MOOS NAFATIN

13. Durante loron ikus sira, anju sira halo knaar espesiál saida? (Mateus 13:​47-49)

¹³ Durante loron ikus sira, Jeová fó ona knaar espesiál ba anju sira. (Lee Mateus 13:​47-49.) Ema millaun ba millaun iha mundu tomak mak hatudu ona interese ba liafuan diʼak. Ema balu foti ona hakat atu sai ema Kristaun neʼebé loos, maibé ema balu lakohi. Anju sira simu ona knaar atu “haketak ema aat husi ema laran-loos”. Neʼe katak sira simu knaar atu ajuda proteje kongregasaun moos nafatin. Maibé, neʼe la dehan katak ema neʼebé para ona atu adora Maromak labele fila fali. Neʼe mós la dehan katak kongregasaun sei nunka iha problema. Maski nuneʼe, ita bele fiar katak anju sira serbisu makaʼas atu ajuda kongregasaun moos nafatin.

14-15. Oinsá mak ita bele banati-tuir anju sira-nia hakaʼas an atu kongregasaun moos nafatin iha dalan morál no espirituál? (Haree mós foto.)

¹⁴ Oinsá mak ita bele banati-tuir anju sira-nia hakaʼas an atu kongregasaun moos nafatin? Hodi halo ita-nia parte atu ajuda kongregasaun moos iha dalan morál no espirituál. Atu halo nuneʼe, ita presiza hakaʼas an atu proteje ita-nia laran hodi hili ransu neʼebé diʼak no la simu influénsia neʼebé bele estraga ita-nia relasaun ho Jeová. (Sal 101:3) Ita mós bele ajuda ita-nia maluk fiar-naʼin atu nafatin laran-metin ba Jeová. Porezemplu, saida mak ita presiza halo se ita rona maluk fiar-naʼin ida halo sala sériu? Tanba ita hadomi ita-nia maluk neʼe, ita presiza husu nia atu koʼalia ba katuas sira. Se nia lakohi halo nuneʼe, ita mak presiza koʼalia ba katuas sira. Ita hakarak ajuda ema neʼebé fraku iha dalan espirituál atu bele hetan ajuda lalais!—Tgo 5:​14, 15.

¹⁵ Triste mak ema balu neʼebé halo sala sériu tenke hasai husi kongregasaun. Bainhira ida-neʼe akontese, ita sei “la ransu tan ho sira”.d (1 Kor 5:​9-13) Arranju neʼe ajuda kongregasaun atu moos nafatin. No mós hodi hili atu la ransu ho sira neʼebé kongregasaun hasai, ita hatudu laran-diʼak ba sira. No karik neʼe mós sei ajuda sira atu rekoñese katak sira presiza fila fali ba Jeová. Se sira fila fali, ita sei haksolok, anju sira haksolok, no Jeová mós haksolok.—Lc 15:7.

16. Iha dalan saida mak ita bele hakaʼas an atu banati-tuir anju sira?

¹⁶ Neʼe mak priviléjiu boot katak Jeová husik ita atu aprende kona-ba anju sira no atu serbisu hamutuk ho sira. Mai ita banati-tuir sira-nia hahalok diʼak, hanesan haraik an, hadomi ema, tahan, no sira-nia hakaʼas an atu kongregasaun moos iha dalan morál no espirituál. Se ita banati-tuir anju sira neʼebé laran-metin, ita mós bele sai parte ba Jeová nia família neʼebé adora nia ba nafatin.