Pergunta husi lee-naʼin
“Anju sira neʼebé Maromak hili ona” neʼebé temi iha 1 Timóteo 5:21 refere ba sé?
Apóstolu Paulo hakerek ba Timóteo neʼebé serbí mós nuʼudar katuas kongregasaun: “Haʼu haruka ó iha Maromak no Kristu Jesus nia oin, no iha anju sira neʼebé Maromak hili ona nia oin, atu halo tuir matadalan sira-neʼe hodi la todan ba sorin ka fihir ema.”—1 Tim 5:21.
Klaru katak anju sira-neʼe la refere ba ema naʼin-144.000 neʼebé iha esperansa atu bá lalehan. Tanba bainhira Paulo hakerek ba Timóteo, ema sira-neʼe seidauk bá lalehan. Apóstolu sira no ema seluk neʼebé iha esperansa atu bá lalehan seidauk sai kriatura espíritu. Tan neʼe mak “anju sira neʼebé Maromak hili ona” la refere ba sira.—1 Kor 15:50-54; 1 Tes 4:13-17; 1 João 3:2.
“Anju sira neʼebé Maromak hili ona” mós laʼós refere ba anju sira neʼebé kontra Maromak iha tempu Rai-Nabeen. Anju sira-neʼe apoia Satanás no sai anju aat, tan neʼe sira mak Jesus nia inimigu. (Gén 6:2; Lc 8:30, 31; 2 Ped 2:4) Iha futuru, Jesus sei soe sira ba rai-kuak neʼebé kleʼan tebes ba tinan 1.000. Tuirmai sira sei lakon hamutuk ho Diabu.—Jud 6; Apok 20:1-3, 10.
“Anju sira neʼebé Maromak hili ona” neʼebé Paulo temi mak refere ba anju sira neʼebé laran-metin ba “Maromak no Jesus Kristu”.
Iha anju neʼebé laran-metin rihun ba rihun. (Ebr 12:22, 23) Ita labele hanoin katak anju sira halo knaar neʼebé hanesan no iha tempu neʼebé hanesan. (Apok 14:17, 18) Porezemplu, Jeová haruka anju ida deʼit atu oho tropa Asíria naʼin-185.000. (2 Reis 19:35) Karik anju balu simu knaar atu “haketak ema hotu neʼebé halo ema seluk sidi no mós ema neʼebé halo aat husi [Jesus nia] Ukun”. (Mt 13:39-41) Karik anju seluk tan “halibur ema neʼebé Maromak hili ona” atu bá lalehan. (Mt 24:31) No anju seluk hetan knaar atu ‘proteje ita iha ita-nia dalan sira hotu’.—Sal 91:11; Mt 18:10; kompara ho Mateus 4:11; Lucas 22:43.
Anju sira neʼebé temi iha 1 Timóteo 5:21 karik hetan knaar espesiál neʼebé liga ho Maromak nia povu. Iha kapítulu neʼe, Paulo fó sai katak irmaun-irmán sira presiza hatudu respeitu ba katuas kongregasaun. Paulo mós fó konsellu katak katuas sira presiza halaʼo didiʼak sira-nia knaar, presiza hanoin didiʼak antes halo desizaun ruma, no labele hatudu hahalok “todan ba sorin ka fihir ema”. Razaun importante sira presiza halo tuir konsellu neʼe mak tanba katuas sira serbí irmaun-irmán sira iha “Maromak no Kristu Jesus nia oin, no iha anju sira neʼebé Maromak hili ona nia oin”. Entaun anju balu hetan knaar atu ajuda kongregasaun, hanesan proteje Jeová nia atan sira, dirije serbisu haklaken, no fó sai ba Jeová kona-ba buat neʼebé sira haree.—Mt 18:10; Apok 14:6.