Ema ida neʼebé brani

KUANDU ema sai barak iha mundu, ema barak liu halo buat neʼebé aat hanesan Caim. Maibé, iha ema ida la hanesan. Nia mak ema neʼe, naran Enoc. Enoc ema brani. Ema seluk halo aat, maibé Enoc serbí nafatin Maromak.

Hatene tansá ema iha tempu neʼebá halo aat ka lae? Hanoin toʼok: Sé mak halo Adão no Eva atu la rona tuir Maromak kona-ba ai-fuan neʼebé bandu? Sin, anju aat ida. Iha Bíblia, nia iha naran Satanás. Nia koko atu halo ema hotu sai aat.

Iha loron ida, Maromak Jeová haruka Enoc atu dehan-sai buat ruma neʼebé ema lakohi rona. Buat neʼebé nia atu fó-hatene mak: ‘Sei iha loron ida, Maromak sei halakon ema aat hotu.’ Karik ema hirus tebes atu rona liafuan neʼe. Karik sira mós koko atu oho Enoc. Nuneʼe Enoc tenkesér brani atu dehan-sai saida mak Maromak sei halo.

Maromak la husik Enoc moris kleur iha ema aat nia leet. Enoc moris toʼo tinan 365 deʼit. Tanbasá ami dehan “tinan 365 deʼit”? Tanba ema iha tempu neʼebá iha forsa liu fali ema agora, no bele moris kleur liu. Haree toʼok, Enoc nia oan-mane, Metusalém, moris toʼo tinan 969!

Depois Enoc mate, ema sai aat liu ba beibeik. Bíblia hateten katak ‘ema nia hanoin sempre aat’, no katak ‘mundu sai nakonu ho violénsia’.

Hatene tanbasá mundu iha susar barak iha tempu neʼebá ka lae? Tanba Satanás iha dalan foun atu dada ema atu halo aat. Ita sei aprende kona-ba ida-neʼe iha istória tuirmai.