Dina monu ba susar

HAREE, Dina bá vizita sé? Nia hasoru feto sira husi rai Kanaan. Nia aman Jacob kontente kona-ba ida-neʼe ka lae? Atu hatán, hanoin-hetan oinsá mak Abraão no Isaac sente kona-ba feto sira husi Kanaan.

Abraão hakarak nia oan Isaac atu kaben ho feto husi Kanaan ka lae? Lae, nia lakohi. Isaac no Rebeca hakarak sira-nia oan Jacob atu kaben ho feto husi Kanaan ka lae? Lae. Hatene tanbasá?

Tanba ema husi Kanaan adora maromak falsu sira. Sira laʼós ema diʼak atu sai laʼen no feen, no sira laʼós ema diʼak atu sai belun. Tan neʼe, ita bele fiar katak Jacob la kontente tanba nia oan sai belun ho feto sira husi Kanaan.

Loos duni, Dina monu ba susar. Haree ka lae mane husi Kanaan iha dezeñu neʼe, neʼebé hateke daudauk ba Dina? Nia naran Siquém. Loron ida, kuandu Dina mai vizita, Siquém lori Dina no obriga nia atu toba hamutuk. Ida-neʼe sala, tanba mane no feto neʼebé kaben ona deʼit mak bele toba hamutuk. Siquém nia hahalok aat ba Dina lori susar barak liután.

Kuandu Dina nia maun-alin rona kona-ba buat neʼebé akontese, sira hirus tebes. Sira naʼin-rua, Simeão no Levi, hirus demais toʼo sira foti surik, tama iha sidade, no derrepente deʼit ataka ema mane iha sidade neʼe. Sira, hamutuk ho maun-alin, oho Siquém no ema mane seluk hotu. Jacob hirus tanba nia oan-mane sira-nia hahalok aat neʼe.

Oinsá mak susar hotu neʼe hahú? Tanba Dina sai belun ho ema neʼebé la halo tuir Maromak nia ukun-fuan sira. Ita mós lakohi iha belun hanesan neʼe, loos ka lae?