Jacob iha família boot

HAREE toʼok família boot neʼe. Sira-neʼe mak Jacob nia oan-mane naʼin-12. Nia mós iha oan-feto balu. Hatene sira-nia naran ida-ida ka lae? Mai ita aprende naran balu.

Lea hahoris Ruben, Simeão, Levi no Judá. Kuandu Raquel haree katak nia la iha oan ida, nia triste tebes. Entaun, nia fó ninia atan-feto Bila ba Jacob, no Bila iha oan-mane naran Dan no Naftali. Depois, Lea mós fó ninia atan-feto Zilpa ba Jacob, no Zilpa hahoris Gad no Aser. Tuirmai, Lea iha oan-mane naʼin-rua tan, Issacar no Zebulon.

Ikusliu, Raquel mós iha oan ida. Raquel fó naran José. Depois ita sei aprende liután kona-ba José, tanba nia sai ema importante ida. Sira-neʼe mak Jacob nia oan-mane naʼin-11 neʼebé moris iha tempu neʼebé Jacob hela hamutuk ho Raquel nia aman Labão.

Jacob mós iha oan-feto balu, maibé Bíblia temi deʼit oan-feto ida nia naran. Nia mak Dina.

Tempu toʼo ba Jacob atu husik Labão no fila fali ba Kanaan. Nuneʼe, nia halibur nia família boot no nia bibi no karau lubun boot sira, no komesa atu laʼo-rai.

Depois Jacob no nia família hela iha Kanaan, Raquel hahoris oan-mane ida tan. Ida-neʼe akontese iha tempu neʼebé sira laʼo-rai. Raquel hetan susar, no ikusliu nia mate kuandu hahoris. Maibé, oan-mane neʼebé nia hahoris isin-diʼak. Jacob fó naran Benjamim.

Ita hakarak hanoin-hetan Jacob nia oan-mane naʼin-12 nia naran tanba nasaun Izraél tomak mai husi sira. Tuir loloos, Izraél nia suku 12 tuir naran husi Jacob nia oan-mane naʼin-10 no José nia oan-mane naʼin-rua. Isaac moris hela tinan barak depois oan-mane hotu neʼe moris, no karik nia kontente tanba iha bei-oan barak hanesan neʼe. Maibé, mai ita haree saida mak akontese ba nia bei-oan Dina.