Jacob bá Haran

HATENE sé mak mane sira-neʼe neʼebé koʼalia ho Jacob? Depois Jacob laʼo-rai loron barak, nia hasoru sira iha bee-matan ida. Sira hein bibi. Jacob husu: ‘Ita-Boot sira husi neʼebé?’

Sira hatete: ‘Haran.’

Jacob husu: ‘Ita-Boot sira hatene Labão ka lae?’

Sira hatán: ‘Sin. Haree, ninia oan-feto Raquel mai ona ho bibi.’ Iha dezeñu neʼe, bele haree Raquel mai husi dook ka lae?

Kuandu Jacob haree Raquel ho tiu Labão nia bibi, Jacob bá duir fatuk husi bee-matan leten hodi bibi sira bele hemu. Depois, Jacob reʼi Raquel no fó-hatene nia an. Raquel kontente tebes, no fila ba uma, hodi fó-hatene nia aman Labão.

Labão mós kontente tebes tanba Jacob mai atu hela iha nia uma. No bainhira Jacob husu atu kaben ho Raquel, Labão haksolok. Maski nuneʼe, atu hetan Raquel, Labão husu Jacob atu serbisu iha nia toʼos durante tinan hitu. Tanba Jacob hadomi loos Raquel, nia halo duni. Maibé, kuandu tempu toʼo atu kaben, hatene saida mak akontese?

Labão fó nia oan-feto primeiru Lea nuʼudar feen, laʼós Raquel. Kuandu Jacob simu atu halo serbisu ba Labão durante tinan hitu tan, Labão mós fó Raquel. Iha tempu neʼebá, Maromak fó lisensa ba mane sira atu bele kaben laʼós ho feto ida deʼit. Maibé agora, nuʼudar Bíblia hatudu, mane ida bele iha feen ida deʼit.