Jacob hafolin buat espirituál nian

JACOB nia moris nakonu ho susar. Ninia kaduak rai odi no hakarak oho nia, tan neʼe nia presiza halai atu salva an. Ikusmai Jacob hetan feto ida neʼebé nia hadomi, maibé feto neʼe nia aman lohi nia hodi fó fali feto seluk, rezultadu mak nia iha feen naʼin-haat ho problema barak. (Génesis 30:1-13) Durante tinan 20, nia serbisu ba ema neʼebé aproveita deʼit ninia forsa. Nia luta malu ho anju ida no sai aleijadu. Ema estraga ninia oan-feto no oan-mane sira oho ema barak. Nia mós halerik kuandu ninia feen no oan-mane neʼebé nia hadomi mate. Bainhira nia katuas ona no rai-hamlaha obriga nia atu muda ba rai seluk, nia dehan: “Haʼu-nia tinan sira mak uitoan deʼit no nakonu ho terus.” (Génesis 47:9) Maski nuneʼe, Jacob mak mane espirituál neʼebé tau fiar ba Maromak. Nia fiar ba buat neʼebé loos ka lae? Lisaun saida deʼit mak ita bele aprende husi Jacob?

Jacob la hanesan ninia maun

Jacob no ninia maun Esaú haree malu la diʼak tanba Jacob hafolin buat espirituál nian, maibé Esaú lae. Jacob tau atensaun ba aliansa neʼebé Maromak halo ho Abraão, no Jacob hakaʼas an atu proteje liña jerasaun neʼebé Maromak hili ona. Tan neʼe, Jeová “hadomi” nia. Jacob “moris ho hahalok loos”, neʼe katak nia sempre halo tuir Maromak. Esaú la hanesan neʼe. Nia la hafolin ninia liman-rohan nuʼudar oan-mane primeiru, tan neʼe nia faʼan tiha ba Jacob hodi troka ho koto-mean bikan ida. Ikusmai, ho Maromak nia apoiu, Jacob husu liman-rohan nuʼudar oan-mane primeiru neʼebé ninia maun faʼan ona ba nia. Bainhira neʼe akontese, Esaú sai hirus no hakarak vinga Jacob. Tan neʼe, Jacob husik buat hotu hodi halai, maibé buat neʼebé akontese tuirmai halo nia hetan fali forsa.​—Malaquias 1:2, 3; Génesis 25:27-34; 27:1-45.

Liuhusi mehi, Maromak halo Jacob haree anju sira tun-saʼe eskada entre lalehan no rai. No Maromak promete katak nia sei proteje Jacob ho ninia bei-oan sira, hodi dehan: “Liuhusi ó no ó-nia bei-oan mak família hotu iha rai sei hetan duni bensaun. Haʼu hamutuk ho ó, haʼu sei proteje ó iha fatin naran deʼit neʼebé ó bá, no haʼu sei lori ó fila fali mai iha rai neʼe. Haʼu sei la husik ó toʼo haʼu kumpre ona haʼu-nia promesa ba ó.”​—Génesis 28:10-15.

Neʼe halo Jacob sente kmaan! Jeová konfirma katak Jacob nia jerasaun mak sei goza bensaun sira neʼebé Maromak promete ona ba Abraão no Isaac. Mehi neʼe halo Jacob rekoñese katak anju sira bele ajuda ema neʼebé halo kontente Maromak, no fiar katak Maromak sei proteje nia. Jacob agradese tebes no jura atu laran-metin ba Jeová.​—Génesis 28:16-22.

Jacob la hadau Esaú nia liman-rohan. Antes sira moris, Jeová hatete ona katak “ida primeiru sei serbí ida segundu”. (Génesis 25:23) Karik ema balu hanoin: ‘Diʼak liu Maromak halo Jacob mak moris uluk.’ Maibé neʼe hanorin lisaun importante ida mai ita. Maromak la rai hela bensaun ba ema neʼebé sente katak nia iha direitu atu hetan ida-neʼe, maibé Maromak hatudu laran-diʼak ba ema neʼebé halo nia kontente. Tan neʼe, direitu nuʼudar oan-mane primeiru sai fali Jacob nian, laʼós ba ninia maun neʼebé la hafolin ida-neʼe. Nuneʼe mós ho nasaun Judeu neʼebé hatudu hahalok hanesan Esaú, neʼebé ikusmai Maromak troka ho nasaun Izraél espirituál. (Roma 9:6-16, 24) Entaun, ita-nia relasaun diʼak ho Jeová la depende ba ita-nia família neʼebé serbí Maromak. Ita rasik mak presiza hakaʼas an atu hafolin buat espirituál hodi bele simu bensaun.

Labão simu nia

Jacob toʼo iha Padan-Aram atu buka feen ida husi ninia família, no nia hasoru ninia prima Raquel iha bee-posu. Jacob muda fatuk neʼebé taka bee-posu neʼe atu Raquel bele fó-hemu ba ninia aman Labão nia animál sira.a Raquel halai fila ba uma hodi fó-hatene katak Jacob mai, no Labão bá kedas hasoru Jacob. Karik Labão hanoin katak Jacob lori daudaun prezente folin-boot ruma atu fó ba nia, hanesan uluk Abraão nia atan lori ba ninia família. Maibé Jacob la lori buat ida, no karik neʼe halo Labão laran-tun. Maski nuneʼe, Labão haree katak Jacob mak mane neʼebé iha forsa atu halo serbisu.​—Génesis 28:1-5; 29:1-14.

Jacob konta ninia istória. Ita la hatene se nia konta kona-ba oinsá nia hetan direitu nuʼudar oan primeiru, maibé Bíblia dehan katak nia konta “buat hotu”. Rona tiha neʼe, Labão hatete: “Ó mak haʼu-nia família rasik no ita raan ida deʼit.” Tuir matenek-naʼin ida, liafuan neʼe mak konvite ba Jacob atu hela, ka karik neʼe hatudu katak Labão iha obrigasaun atu proteje Jacob nuʼudar ninia família. Ita la hatene, maibé lakleur depois neʼe, Labão hanoin oinsá atu aproveita ninia sobriñu.

Labão komesa koʼalia kona-ba tópiku ida neʼebé ikusmai sai problema boot durante tinan 20 tuirmai. Nia dehan: “Maski ó mak haʼu-nia família, neʼe laʼós katak ó serbisu ba haʼu saugati deʼit. Fó-hatene mai haʼu, saida mak ó hakarak simu nuʼudar kolen?” Maski Labão finje atu sai tiu neʼebé diʼak, maibé nia troka relasaun família ho Jacob sai fali relasaun entre patraun ho serbisu-naʼin. Tanba Jacob laran-monu ona ba Raquel, nia hatete: “Haʼu prontu atu serbisu ba Ita tinan hitu hodi bele hetan Ita-nia oan-feto segundu Raquel.”​—Génesis 29:15-20.

Atu prenda, mane presiza fó uluk feto nia folin. Tinan barak liutiha, Moisés nia Ukun-Fuan fó sai katak kuandu mane ida halo relasaun seksuál ho feto virjen ida, nia tenke selu osan-mutin 50 ba feto neʼe nia aman. Matenek-naʼin ida naran Gordon Wenham fiar katak neʼe mak “folin neʼebé karun liu” tanba baibain feto nia folin la boot hanesan neʼe. (Deuteronómio 22:28, 29) Jacob la iha buat ida atu fó. Tan neʼe, nia oferese atu serbisu ba Labão durante tinan hitu. Gordon dehan: “Iha tempu Babilónia antigu, ema baibain neʼebé serbisu sei simu osan-mutin sorin toʼo osan-mutin ida kada fulan.” Neʼe katak osan-mutin 42 toʼo 84 se serbisu ba tinan hitu. Gordon hatutan tan: “Jacob oferese folin boot ba Labão atu bele kaben ho Raquel.” Labão konkorda kedas ho buat neʼebé Jacob hatete.​—Génesis 29:19.

Ba Jacob, tinan hitu mak hanesan “loron balu deʼit” tanba nia hadomi tebes Raquel. Ikusmai nia kaben ho noiva neʼebé taka ninia oin ho veu, Jacob nunka deskonfia Labão. Maibé imajina toʼok, iha dadeer-saan, Jacob hakfodak tebes bainhira nia rekoñese katak nia laʼós toba ho Raquel, maibé Raquel nia biin Lea! Jacob dehan ba Labão: “Tanbasá mak Ita halo nuneʼe ba haʼu? Haʼu serbisu ba Ita tanba Raquel, loos ka lae? Tanbasá Ita lohi haʼu?” Labão hatán: “Iha neʼe ami iha toman atu fó uluk oan-feto primeiru no tuirmai mak ida segundu. Hela hamutuk ho feto neʼe semana neʼe tomak. Tuirmai mak haʼu sei fó feto ida segundu ba ó se ó halo serbisu mai haʼu ba tinan hitu tan.” (Génesis 29:20-27) Jacob monu ba Labão nia lasu no labele halo buat ida, nia tenke simu deʼit atu bele kaben ho Raquel.

La hanesan ho tinan hitu primeiru, tinan hitu tuirmai mak susar tebes. Oinsá Jacob bele fó perdua ba Labão? Klaru katak Jacob mós la kontente ho Lea neʼebé apoia ninia aman. Labão la preokupa kona-ba oinsá ninia hahalok aat sei fó impaktu ba ninia oan-feto naʼin-rua nia futuru. Nia hanoin deʼit buat diʼak ba ninia an. Raquel hirus ba Lea, no nia laran-moras liután bainhira Lea iha oan-mane naʼin-haat tuituir malu, maibé nia rasik seidauk iha oan. Nia hakarak tebes atu iha oan, tan neʼe nia oferese ninia atan-feto atu iha oan ba nia, no Lea mós kompete malu hodi fó ninia atan-feto ba Jacob. Ikusmai Jacob iha feen naʼin-4 no oan-mane naʼin-12, no halaʼo moris família neʼebé la kontente. Maski nuneʼe, Jeová sei halo Jacob atu sai nasaun boot ida.​—Génesis 29:28–30:24.

Jeová halo nia sai riku

Maski hasoru susar barak, Jacob sente duni katak Maromak hamutuk ho nia hanesan promete nanis ona. Labão mós haree ida-neʼe, tanba ninia animál sira kontinua sai barak durante tempu neʼebé Jacob mak tau matan. Labão lakohi husik Jacob bá fatin seluk, tan neʼe nia husu ba Jacob kona-ba kolen saida mak Jacob hakarak atu bele kontinua serbisu ba nia. Jacob husu atu simu bibi neʼebé kór la hanesan baibain husi Labão nia bibi-lubun. Iha área neʼebá, baibain bibi-malae nia kór mak mutin, no bibi-timur nia kór mak metan ka kór-kafé, ladún iha bibi ho kór makerek. Labão hanoin katak nia sei manán barak liu, tan neʼe nia konkorda no haketak kedas bibi sira neʼebé kór oin-seluk atu labele kahur ho ninia bibi neʼebé Jacob tau matan. Iha tempu neʼebá, baibain bibi-atan sira neʼebé hein ema seluk nia bibi sei hetan porsentu 20 husi bibi-oan neʼebé moris, maibé Labão hanoin katak Jacob sei hetan kolen uitoan deʼit. Maibé Labão nia hanoin mak sala, tanba Jeová hamutuk ho Jacob.​—Génesis 30:25-36.

Maromak ajuda Jacob atu aumenta animál sira neʼebé forte ho kór neʼebé ikusmai bele sai ninian. (Génesis 30:37-42) Karik Jacob hanoin katak ninia ideia atu aumenta ninia bibi sira mak diʼak, maibé tuir loloos Jeová mak ajuda nia. Matenek-naʼin ida naran Nahum Sarna esplika: ‘Tuir siénsia, kuandu animál ho kór ida deʼit neʼebé iha ona jene atu bele iha kór makerek mak hola malu, . . . iha posibilidade atu iha oan neʼebé kór makerek.’

Labão haree katak Jacob nia bibi kontinua aumenta, tan neʼe nia troka kona-ba animál ida-neʼebé mak Jacob sei simu, porezemplu bibi neʼebé riska-riska ka makerek, ka ida-neʼebé kór oioin. Labão hanoin an deʼit hodi troka kontratu beibeik, maibé Jeová sempre halo Jacob atu aumenta ninia rikusoin. Labão estrese boot. Lakleur, Jacob nia rikusoin barak tebes, inklui bibi-lubun, atan sira, kuda-kamelu no kuda-burru sira. Neʼe akontese laʼós tanba ninia matenek, maibé tanba Jeová mak apoia nia. Liutiha tempu balu, Jacob hatete ba Raquel no Lea: “Imi-nia aman lohi haʼu hodi troka haʼu-nia kolen ba dala sanulu ona, maibé Maromak la husik nia atu halo aat ba haʼu. . . . Maromak kontinua foti imi-nia aman nia bibi husi nia hodi fó ba haʼu.” Maromak Jeová mós fó-hatene Jacob katak Nia haree buat hotu neʼebé Labão halo maibé Jacob la presiza hanoin barak. Maromak dehan: “Fila fali ba ó-nia rai no ó-nia família, no haʼu sei haraik buat neʼebé diʼak ba ó.”​—Génesis 31:1-13; 32:9.

Ikusmai Jacob livre husi Labão neʼebé lohidór, no komesa halo viajen atu fila ba ninia rai. Maski tinan 20 liu ona, nia nafatin taʼuk ba Esaú, liuliu bainhira nia rona katak Esaú mai daudaun hamutuk ho mane naʼin-400. Saida mak Jacob bele halo? Nia mak ema neʼebé sempre tau fiar ba Maromak. Tan neʼe ho fiar metin, Jacob halo orasaun hodi hatete katak nia la merese simu Jeová nia laran-diʼak, no husu Jeová atu kumpre Ninia promesa hodi salva nia ho ninia família husi Esaú.​—Génesis 32:2-12.

Tuirmai, buat ruma akontese. Ema oin-foun ida luta ho Jacob iha kalan, no tanba nia kona Jacob nia ruin-fukun iha kidan, neʼe halo Jacob nia kidan naksalak. Ema oin-foun neʼe mak anju ida. Jacob lakohi husik nia toʼo hetan bensaun. Kona-ba neʼe, profeta Oseias hatete katak Jacob “tanis no husu ho laran atu Maromak fó bensaun ba nia”. (Oseias 12:2-4; Génesis 32:24-29) Jacob hatene katak iha tempu uluk bainhira anju mosu, neʼe sempre iha ligasaun ho Maromak nia aliansa ho Abraão. Tan neʼe Jacob hakaʼas an luta ho anju neʼe no konsege hetan bensaun. Iha tempu neʼe mak Maromak troka Jacob nia naran sai fali Izraél, neʼebé signifika “Ida neʼebé (kontinua) luta hasoru Maromak”, ka “Maromak luta hasoru nia”.

Ita prontu atu luta ka lae?

Tuir loloos, susar neʼebé Jacob hetan mak laʼós deʼit kona-ba luta ho anju no hasoru malu fali ho Esaú. Maibé akontesimentu sira-neʼe ajuda ita hatene Jacob mak ema hanesan saida. Esaú la tahan hamlaha ba tempu uitoan no husik ninia direitu nuʼudar oan-mane primeiru, maibé Jacob hakaʼas an iha ninia moris tomak atu bele hetan bensaun maski nia presiza luta ho anju ida. Hanesan Maromak promete ona, Jacob hetan matadalan no protesaun, no ikusmai nia sai beiʼala ba nasaun boot ida no ba Mesias.​—Mateus 1:2, 16.

Ita mós hakaʼas an atu halo Jeová kontente no prontu luta ka lae? Ema neʼebé hakaʼas an atu halo tuir Maromak sempre hasoru susar oioin, dala ruma sira presiza luta atu halo desizaun neʼebé loos. Maibé Jacob nia ezemplu bele motiva ita atu kaer metin ba ita-nia esperansa atu simu kolen neʼebé Jeová promete ona mai ita.

[Nota-rodapé]

[Dezeñu]

Jacob luta atu hetan bensaun iha ninia moris tomak