Família neʼe muda ba Ejitu

JOSÉ la bele kontrola tan ninia an. Nia haruka atan hotu atu husik nia mesak. Kuandu nia mesak hamutuk ho nia maun-alin, José tanis. Ita bele hanoin toʼok nia maun-alin sente hakfodak, tanba la hatene tansá nia tanis. Ikusmai, nia hatete: ‘Haʼu mak José. Haʼu-nia aman sei moris ka lae?’

Nia maun-alin sente hakfodak toʼo sira la bele koʼalia tan. Sira mós taʼuk. Maibé José hatete: ‘Hakbesik mai haʼu.’ Kuandu sira hakbesik, nia dehan: ‘Haʼu imi-nia alin José, neʼebé imi faʼan ba Ejitu.’

José kontinua atu koʼalia ho laran-diʼak: ‘Labele duun malu tanba imi faʼan haʼu. Tuir loloos, Maromak mak haruka haʼu ba Ejitu atu salva ema nia moris. Faraó halo haʼu ukun rai Ejitu tomak. Nuneʼe agora, lalais bá fali toʼo haʼu-nia aman no konta hotu ba nia. No mós hatete ba nia atu mai moris iha neʼe.’

Depois José hakoʼak metin nia maun-alin, no reʼi sira hotu. Kuandu Faraó rona katak José nia maun-alin mai, nia dehan ba José: ‘Husik sira lori karreta, neʼebé kuda ka karau dada, no lori sira-nia aman no sira-nia família mai. Haʼu sei fó ba sira rai neʼebé diʼak liu iha Ejitu.’

Sira halo nuneʼe duni. Iha dezeñu neʼe bele haree José hasoru nia aman bainhira nia mai Ejitu hamutuk ho nia família tomak.

Jacob nia família sai boot. Jacob nia oan no bei-oan mak hamutuk ema naʼin-70 bainhira sira muda ba Ejitu. Maibé iha mós sira-nia feen, no karik atan barak. Sira hotu hela iha Ejitu. Ema bolu sira ema Izraél, ka izraelita, tanba Maromak troka Jacob nia naran sai Israel (Izraél). Ema Izraél sai povu neʼebé espesiál ba Maromak, hanesan ita sei estuda iha istória seluk.