Moisés no Aarão bá hasoru Faraó

KUANDU Moisés ba fali Ejitu, nia konta hotu ba nia maun Aarão kona-ba milagre sira. No kuandu Moisés no Aarão hatudu milagre sira-neʼe ba ema Izraél, ema Izraél hotu mós fiar katak Jeová hamutuk ho sira.

Depois, Moisés no Aarão bá hasoru Faraó. Sira dehan ba nia: ‘Jeová, ema Izraél nia Maromak, hatete: “Husik haʼu-nia povu bá rai-fuik durante loron tolu, atu sira bele adora haʼu iha neʼebá.”’ Maibé, Faraó hatán fali: ‘Haʼu la fiar ba Jeová. No haʼu sei la husik ema Izraél bá.’

Faraó hirus, tanba ema Izraél hakarak para sira-nia serbisu ba loron tolu atu adora Jeová. Tan neʼe, nia obriga sira atu serbisu makaʼas liután. Ema Izraél tau todan ba Moisés tanba ema Ejitu trata sira aat liu, no Moisés triste. Maibé, hodi Moisés la hanoin resin Jeová dehan ba nia: ‘Haʼu sei obriga Faraó atu husik haʼu-nia povu bá.’

Moisés no Aarão bá hasoru fali Faraó. Dala ida-neʼe sira halo milagre ida. Aarão soe nia ai-tonka ba rai, no ai-tonka neʼe sai samea boot. Maibé, Faraó nia matenek-naʼin sira mós soe sira-nia ai-tonka, no samea mosu. Maibé, haree! Aarão nia samea han daudauk matenek-naʼin nia samea sira. Maski nuneʼe, Faraó la husik ema Izraél bá.

Nuneʼe, tempu toʼo ba Jeová atu hanorin Faraó buat ruma. Hatene saida mak Jeová halo? Nia fó malisan 10, ka susar boot 10, ba Ejitu.

Depois malisan barak, Faraó haruka Moisés mai, no dehan: ‘Hapara malisan neʼe, no haʼu sei husik ema Izraél bá.’ Maibé, kuandu malisan ida-ida para, Faraó troka nia hanoin. Nia la husik ema Izraél bá. Ikusmai, depois malisan 10, Faraó haruka ema Izraél bá.

Hatene malisan 10 ida-ida ka lae? Loke pájina tuirmai, no mai ita aprende kona-ba malisan sira-neʼe.