Samea riti

SAMEA neʼebé bobar iha ai-lolon neʼe, samea tebes ka lae? Lae. Samea neʼe halo husi riti. Jeová haruka Moisés atu tau samea neʼe iha ai-lolon hodi povu bele haree ba samea neʼe no sira kontinua atu moris. Maibé, samea seluk iha rai mak tebes. Sira tata no halo moras ema neʼe. Hatene tanbasá?

Tanba ema Izraél koʼalia kontra Maromak no Moisés. Sira kesar: ‘Tansá Ita lori ami sai husi Ejitu atu mate iha rai-fuik maran neʼe? La iha ai-han ka bee iha neʼe. No ami baruk tiha ona atu han maná neʼe.’

Maibé maná neʼe mak ai-han diʼak. Hodi halo milagre Jeová fó maná ba sira. No nia mós halo milagre atu fó bee ba sira. Maibé, povu la fó obrigadu ba Maromak ba dalan neʼebé nia tau matan ba sira. Nuneʼe, Jeová uza samea neʼebé iha venenu atu fó kastigu ba ema Izraél. Samea neʼe tata sira, no ema barak mate.

Ikusmai, povu mai toʼo Moisés no hatete: ‘Ami halo sala, tanba ami koʼalia kontra Jeová no Ita-Boot. Agora, harohan lai ba Jeová, husu nia atu hasai samea sira-neʼe.’

Nuneʼe, Moisés harohan ba povu nia susar. No Jeová haruka Moisés atu halo samea riti neʼe, no tau iha ai-lolon. Nia mós haruka katak ema neʼebé samea tata tenke haree ba samea riti neʼe. Moisés halo buat hotu neʼebé Jeová haruka. No kuandu ema neʼebé samea tata haree ba samea riti neʼe, sira sai diʼak fali.

Ita bele aprende buat ruma husi ida-neʼe. Tuir loloos, ita hotu hanesan ema Izraél neʼebé samea tata. Ita hotu atu mate. Haree ba sorin-sorin, ó sei haree ema sai katuas, moras, no mate. Ida-neʼe mosu tanba ema primeiru, Adão no Eva, husik Jeová, no ita hotu mak sira-nia oan. Maibé, Jeová fó dalan ida hodi ita bele moris ba nafatin.

Jeová haruka nia Oan-Mane, Jesus Kristu, mai mundu. Ema tara Jesus iha ai-riin, tanba ema barak hanoin katak nia ema aat. Maibé, Jeová fó Jesus atu salva ita. Se ita haree ba nia hodi fiar nia, no tuir nia, ita bele moris ba nafatin. Ita sei aprende liután kona-ba ida-neʼe iha istória sira seluk.