Maromak hili David

BELE haree saida mak akontese? Mane-klosan neʼe salva bibi-oan kiʼik husi ursu. Ursu lori-halai bibi-oan atu han. Maibé, mane-klosan halai tuir, no salva bibi-oan husi ursu nia ibun. No kuandu ursu neʼe hamriik atu ataka, mane-klosan neʼe oho nia! Loron ida seluk, mane-klosan neʼe salva bibi ida husi leaun. Nia brani, loos ka lae? Hatene nia sé?

Mane-klosan neʼe mak David. Nia hela iha sidade kiʼik naran Belein. Nia avó-mane mak Obed, Rute no Boaz nia oan. Hanoin-hetan sira ka lae? No David nia aman mak Jessé. David tau matan ba ninia aman nia bibi sira. David moris tinan 10 depois Jeová hili Saul nuʼudar liurai.

Loron ida Jeová hatete ba Samuel: ‘Foti mina espesiál no bá toʼo Jessé nia uma iha Belein. Haʼu hili tiha ona ninia oan-mane ida atu sai liurai.’ Kuandu Samuel haree Jessé nia oan-boot Eliab, Samuel hatete ba nia an: ‘Nia duni mak Jeová hili.’ Maibé Jeová hatete: ‘Labele haree oinsá nia ain-aas no bonitu. Haʼu la hili nia atu sai liurai.’

Nuneʼe, Jessé bolu ninia oan-mane Abinadab mai. Maibé Samuel hatete: ‘Lae, Jeová mós la hili nia.’ Tuirmai, Jessé lori ninia oan-mane Samá. Samuel hatete: ‘Lae, Jeová mós la hili nia.’ Jessé lori ninia oan-mane naʼin-hitu ba Samuel, maibé Jeová la hili sira ida. Samuel husu: ‘Sira-neʼe Ita-nia oan-mane hotu ka lae?’

Jessé hatete: ‘Sei iha ida ikun. Maibé nia sai, tau matan ba bibi.’ Kuandu David mai, Samuel haree katak nia bonitu. Jeová hatete: ‘Nia mak ida-neʼebé haʼu hili. Fakar mina ba nia.’ No Samuel halo nuneʼe. Tempu sei toʼo mai ba David atu sai liurai ba Izraél.