David no Golias

Jeová hatete ba Samuel: ‘Bá Jessé nia uma. Ninia oan-mane ida mak sei sai liurai tuirmai.’ Entaun Samuel bá Jessé nia uma. Kuandu nia haree Jessé nia oan-mane primeiru, nia hanoin: ‘Karik joven neʼe mak sei sai liurai.’ Maibé Jeová dehan ba Samuel: ‘Haʼu la hili mane joven neʼe. Haʼu haree ema nia laran, laʼós husi liʼur deʼit.’

Jessé lori ninia oan-mane naʼin-neen tan ba Samuel. Maibé Samuel hatete: ‘Jeová la hili sira-neʼe ida. Ita iha oan-mane seluk ka lae?’ Jessé dehan: ‘Haʼu iha oan ida tan, nia mak oan-ikun. Nia hein hela bibi.’ Kuandu David mai, Jeová hatete ba Samuel: ‘Nia mak ida neʼebé haʼu hili!’ Samuel fui mina ba David nia ulun hodi hatudu katak nia mak sei sai liurai iha futuru.

Liutiha tempu balu, ema Filístia mai atu halo funu hasoru ema Izraél. Ema Filístia iha asuwaʼin jigante ida naran Golias. Loron-loron, Golias sadik ema Izraél hodi dehan: ‘Hili mane ida atu funu hasoru haʼu. Se nia manán, ami sei sai imi-nia atan. Maibé se haʼu mak manán, imi sei sai ami-nia atan.’

David bá ema Izraél nia kampu militár hodi lori hahán ba ninia maun sira neʼebé mós soldadu. Nia rona kona-ba Golias no hatete: ‘Haʼu mak sei funu hasoru nia!’ Maibé Liurai Saul dehan: ‘Ó labarik deʼit.’ David hatán: ‘Jeová sei ajuda haʼu.’

Saul fó ninia roupa funu nian ba David, maibé David hatete: ‘Haʼu la toman uza buat sira-neʼe.’ David lori ninia tali-baku no tun ba mota. Nia hili fatuk kabeer lima no tau iha ninia pasta. Depois, David halai hasoru Golias. Jigante neʼe hakilar: ‘Mai deʼit sá labarik. Haʼu sei fó ó-nia isin ba manu sira iha lalehan no ba animál fuik sira atu han.’ David la taʼuk no hakilar fali: ‘Ó mai atu kontra haʼu ho surik no diman, maibé haʼu mai hasoru ó hodi Jeová nia naran. Ó laʼós funu hasoru ami maibé ó funu hasoru Maromak. Ema hotu iha neʼe sei haree katak Jeová mak kbiit boot liu fali surik ka diman. Nia sei entrega imi hotu ba ami-nia liman.’

David tau fatuk ida iha tali-baku no tuda ho forsa makaʼas. Ho Jeová nia ajuda, fatuk neʼe tama Golias nia reen-toos no nia monu ba rai no mate. Ema Filístia hotu halai hodi salva sira-nia an. Hanesan David, ó mós tau fiar ba Jeová ka lae?