LISAUN 6
David la sente taʼuk
Saida mak ó halo kuandu ó sente taʼuk?— Karik ó halai ba ó-nia inan ka aman hodi hetan ajuda. Maibé iha ida tan neʼebé bele ajuda ó. Nia mak iha forsa boot liu ema hotu. Ó hatene nia mak sé?— Sin, Maromak Jeová. Mai ita koʼalia kona-ba mane joven ida naran David. Nia hatene katak Jeová sempre ajuda nia, tan neʼe David la taʼuk.
Husi tempu neʼebé David sei bebé hela, nia inan-aman hanorin ona nia atu hadomi Jeová. Ida-neʼe ajuda David atu la sente taʼuk maski hasoru susar. Nia hatene katak Jeová mak ninia belun no katak Jeová sei ajuda nia. Loron ida, kuandu David hein bibi, leaun neʼebé boot mai no tata bibi-oan ida! Saida mak David halo? Nia duni tuir no uza nia liman rasik hodi oho leaun neʼe! No tempu seluk kuandu animál boot ida tan ataka ninia bibi, David mós oho animál neʼe! Tuir ó-nia hanoin, sé mak ajuda David?— Sin, neʼe mak Jeová.
Iha tempu seluk mós David hatudu aten-brani. Uluk ema Izraél funu hasoru ema Filístia. Ema Filístia iha soldadu ida neʼebé aas tebetebes, nia mak jigante! Nia naran Golias. Jigante neʼe goza soldadu Izraél sira no mós Jeová. Golias sadik Izraél nia soldadu sira atu mai funu hasoru nia. Maibé ema Izraél sira taʼuk liu. Kuandu David rona kona-ba neʼe nia hatete ba Golias: ‘Haʼu sei hasoru ó! Jeová sei ajuda haʼu, no haʼu sei manán ó!’ Ó hanoin David mak ema brani ka lae?— Sin, nia brani loos. Ó hakarak hatene saida mak akontese tuirmai?
David foti ninia tali neʼebé baibain tau fatuk atu tuda. Depois nia hili fatuk lima neʼebé kabuar, no bá hodi hasoru jigante neʼe. Kuandu Golias haree katak David mak joven deʼit, Golias komesa goza nia! Maibé David dehan ba nia: ‘Ó mai hasoru haʼu ho surik no dima, maibé haʼu mai hasoru ó ho Jeová nia naran!’ Depois David foti fatuk ida, tau iha tali, halai ba Golias no soe ba nia. Fatuk neʼe kona Golias nia reen-toos! No jigante neʼe monu no mate! Ema Filístia sai taʼuk no sira hotu halai lakon. Oinsá mak David neʼebé joven deʼit bele manán jigante neʼe?— Jeová mak ajuda nia, no Jeová iha forsa boot liu fali jigante neʼe!
David la sente taʼuk tanba nia hatene katak Jeová sempre ajuda nia
Husi David nia istória neʼe, ó bele aprende saida?— Jeová mak iha forsa boot liu ema hotu. No nia mak ita-nia Belun. Entaun se ó sente taʼuk, la haluha katak Jeová bele ajuda ó atu sai brani!