Jesus moris fali ona

HATENE sé mak feto neʼe no mane naʼin-rua iha neʼe? Feto neʼe mak Maria Madalena, Jesus nia kolega ida. Mane sira neʼebé hatais mutin mak anju sira. Maria hateke daudauk ba rate laran neʼebé ema tau Jesus nia isin-mate. Maibé, agora Jesus nia isin la iha ona! Sé mak foti tiha? Mai ita haree hamutuk.

Depois Jesus mate tiha, amlulik sira hatete ba Pilatos: ‘Kuandu Jesus sei moris, nia hatete katak liutiha loron tolu, nia sei moris fali. Tan neʼe, haruka ema atu hein netik rate neʼe. Nuneʼe, ninia dixípulu sira la bele naʼok ninia mate-isin no hatete katak nia moris fali husi mate!’ Pilatos hatete ba amlulik sira atu haruka soldadu sira hodi hein rate neʼe.

Maibé dadeer-saan nakukun iha loron terseiru depois Jesus mate, Jeová nia anju ida tun mai derrepente. Nia duir tiha fatuk husi rate. Soldadu sira taʼuk tebes no la bele book an. Ikusmai, bainhira sira hateke ba rate laran, mate-isin la iha ona! Soldadu balu bá sidade no fó-hatene ba amlulik sira. Hatene saida mak amlulik aat sira-neʼe halo? Sira selu osan ba soldadu sira atu koʼalia bosok. Amlulik sira hatete ba soldadu sira: ‘Hatete bá katak ninia dixípulu sira mai iha kalan durante ami toba hela, no naʼok mate-isin neʼe.’

Durante tempu neʼe, Jesus nia kolega feto balu vizita rate. Sira hakfodak tebes hodi haree rate neʼe mamuk ona! Maria Madalena halai atu fó-hatene Pedro no João. Derrepente, anju naʼin-rua ho hatais nabilan mosu ba feto sira seluk. Sira husu: ‘Tansá mak imi buka Jesus iha neʼe? Nia moris fali ona. Bá lailais no fó-hatene ba ninia dixípulu sira.’ Feto sira-neʼe halai lailais tebes! Maibé iha dalan, mane ida hapara sira. Hatene sé mak neʼe? Jesus! Nia hatete: ‘Bá no fó-hatene ba haʼu-nia dixípulu sira.’

Bainhira feto sira-neʼe hatete ba dixípulu sira katak Jesus moris fali ona no sira hasoru ona nia, kusta tebes ba dixípulu sira atu fiar. Pedro no João halai ba rate atu haree ho sira-nia matan rasik, maibé rate neʼe mamuk hela! Pedro no João sai tiha, maibé Maria Madalena neʼebé mós mai fali rate hela nafatin. Tempu neʼe mak nia hateke ba rate laran no haree anju naʼin-rua neʼe.

Hatene ka lae, saida mak akontese ba Jesus nia isin-mate? Maromak halo lakon tiha. Maromak halo Jesus moris fali ho isin neʼebé la hanesan ho isin antes nia mate. Maromak fó Jesus isin foun espíritu nian, hanesan anju sira iha lalehan. Maibé, Jesus bele mosu ho isin neʼebé ema bele haree atu hatudu ninia dixípulu katak nia moris fali ona. Tuirmai, ita sei aprende kona-ba neʼe.