Jesus nia moris-hiʼas iha folin saida mai ita?
“Nia moris hiʼas ona.”—MATEUS 28:6.
1, 2. (a) Amlulik sira litik apóstolu Pedro kona-ba saida? Nia hatán oinsá? (Haree dezeñu iha leten.) (b) Tanbasá mak Pedro bele hatán ho brani?
JESUS mate liutiha semana balun, apóstolu Pedro hasoru fali amlulik laran-aat sira neʼebé uluk tuu-lia ka soran ema oho Jesus. Sira agora nervozu tebes ho Pedro tanba nia foin halo ema kudeʼik ida laʼo fali. Sira husu nuneʼe ba nia: “Hodi sé-nia naran mak imi halo ida-neʼe?” Pedro la taʼuk hodi hatán sira: “Liuhusi Jesus Kristu husi Nazaré nia naran mak mane neʼe hamriik iha imi-nia oin ho isin-diʼak; no Jesus Kristu neʼe mak ida neʼebé imi hedi ona maibé Maromak halo nia moris fali husi mate.”—Apóstolu 4:5-10.
2 Uluk, tanba taʼuk mak Pedro nega Jesus dala tolu. (Marcos 14:66-72) Maibé agora lae ona. Iha amlulik sira-nia oin mós nia la taʼuk ida. Saida mak halo nia brani hanesan neʼe? Primeiru, espíritu santu mak ajuda nia. Segundu, nia mós fiar metin katak Jesus moris fali ona. Nia haree duni Jesus moris fali ka lae? Oinsá mak ita bele iha fiar neʼebé metin hanesan apóstolu Pedro?
3, 4. (a) Moris-hiʼas saida deʼit mak akontese antes apóstolu sira moris? (b) Jesus halo moris hiʼas sé-sé deʼit?
3 Apóstolu sira fiar katak ema mate bele moris fali. Tanba uluk, antes sira moris, Maromak halo ona ema mate moris hiʼas fali liuhusi profeta Elias no Eliseu. (1 Reis [Raja-Raja] 17:17-24; 2 Reis [Raja-Raja] 4:32-37) Dala ida, ema nia mate-isin neʼebé kona deʼit Eliseu nia mate-ruin mós moris fali. (2 Reis [Raja-Raja] 13:20, 21) Apóstolu sira fiar katak istória sira-neʼe tebes duni tanba neʼe mai husi eskritura, hanesan ita mós fiar katak eskritura hotu mai husi Maromak.
4 Bainhira ita lee istória kona-ba Jesus halo moris-hiʼas ba ema iha Bíblia laran, neʼe book tebes ita-nia sentimentu. Porezemplu, feto-faluk ida hakfodak tebes bainhira Jesus halo ninia oan-mane mesak moris fali. (Lucas 7:11-15) No bainhira Jesus halo menina oan ida moris fali, ninia inan-aman kontente tebes. (Lucas 8:49-56) No hanoin toʼok ema sira-nia sentimentu bainhira sira haree ho matan rasik Lázaro laʼo sai husi rate laran.—João 11:38-44.
TANBASÁ JESUS NIA MORIS-HIʼAS ÚNIKU
5. Oinsá mak Jesus nia moris-hiʼas la hanesan ho moris-hiʼas sira seluk?
5 Apóstolu sira hatene katak se kompara ho ema seluk neʼebé hetan ona moris-hiʼas, Jesus nia moris-hiʼas mak úniku liu hotu. Tanba ema seluk moris hiʼas mai nafatin ho isin no raan, maibé Jesus moris hiʼas mai ho isin espíritu nian neʼebé nunka mate ka dodok. (Lee Apóstolu 13:34.) Apóstolu Pedro hatete katak: “Ema oho nia iha isin, maibé nia moris fali ho isin espíritu nian.” No Jesus “saʼe ona ba lalehan, iha Maromak nia liman sorin loos; no anju sira, ukun-naʼin sira, no kbiit-naʼin sira tau ona iha ninia ain okos”. (1 Pedro 3:18-22) Ita bele hatete katak moris-hiʼas sira seluk mak milagre ida, maibé Jesus nia moris-hiʼas mak milagre neʼebé boot liu hotu.
6. Oinsá mak Jesus nia moris-hiʼas book apóstolu sira-nia sentimentu?
6 Jesus nia inimigu sira hanoin katak nia sei mate hela, maibé lae, nia moris fali hodi sai hanesan anju forte ida, ema ida mós la bele fó susar tan ba nia. Jesus nia moris-hiʼas neʼe hatudu katak nia mak Maromak nia Oan-Mane duni. Jesus nia moris-hiʼas book tebes apóstolu sira-nia sentimentu. Tan sira hatene Jesus moris fali ona, neʼe halo sira la triste tan, maibé sira kontente no aten-brani liu fali uluk. Jesus nia moris-hiʼas laʼós inventa deʼit, tanba liuhusi Jesus nia moris-hiʼas mak Maromak atu kumpre ninia hakarak hotu. Se neʼe mak inventa deʼit karik, apóstolu sira-nia haklaken mós sei la iha folin tan ona.
7. Jesus agora daudaun halo saida? Neʼe bele hamosu pergunta saida deʼit?
7 Ita hatene duni katak Jesus laʼós deʼit ema importante ida, maibé nia mós halaʼo knaar oioin. Agora nia moris daudaun no tau matan ba serbisu haklaken iha mundu tomak. Nia mak Liurai daudaun iha lalehan, no lakleur tan nia sei halakon buat aat hotu iha mundu neʼe hodi halo mundu tomak sai fali paraízu ida, atu ema bele moris ba nafatin. (Lucas 23:43) Se Jesus mak la moris husi mate, esperansa iha leten sira-neʼe la bele sai loos. Oinsá mak ita bele fiar katak Jesus moris hiʼas duni? No hatene ninia moris-hiʼas iha folin saida mai ita?
JEOVÁ FORSA BOOT LIU FALI MATE
8, 9. (a) Tanbasá mak amlulik judeu sira husu ema hein Jesus nia rate? (b) Bainhira feto naʼin-rua toʼo ba Jesus nia rate, sira haree saida?
8 Bainhira amlulik judeu sira oho tiha Jesus, sira bá husu Pilatos: “‘Naʼi, ami hanoin-hetan liafuan neʼebé lohidór neʼe hatete kuandu nia sei moris hela. Nia dehan: “Liutiha loron tolu haʼu sei moris hiʼas.” Tan neʼe, haruka ema atu hein rate neʼe toʼo loron tolu, atu nuneʼe ninia dixípulu sira labele mai hodi naʼok nia mate-isin no hatete ba ema: “Nia moris hiʼas ona husi mate!” no lia-bosok neʼe sei sai aat liu fali ida uluk.’ Pilatos hatete ba sira: ‘Imi iha guarda. Bá hodi hein rate neʼe tuir buat neʼebé imi hatene.’ Entaun, sira bá no taka metin fatuk iha rate neʼe no tau guarda iha neʼebá.”—Mateus 27:62-66.
9 Sira hakoi Jesus iha rate fatuk boot ida nia kuak, depois sira uza fatuk boot ida hodi taka rate kuak neʼe. Sira halo nuneʼe tanba amlulik sira hakarak haree Jesus mate dodok iha fatin neʼe. Maibé sira hanoin sala. Liutiha loron tolu, dixípulu naʼin-rua naran Maria Madalena ho Maria ida seluk bá Jesus nia rate. Toʼo tiha neʼebá, sira haree fatuk neʼe duir tiha ona ba sorin no anju ida mak tuur hela iha fatuk nia leten. Anju haruka feto naʼin-rua neʼe haree ba rate laran no rate neʼe mamuk tiha ona. Anju hatete ba sira: “Nia la iha neʼe, tanba nia moris hiʼas ona.”—Mateus 28:1-6.
10. Oinsá mak apóstolu Paulo prova katak Jesus moris duni husi mate?
10 Buat sira neʼebé akontese husi loron Jesus moris hiʼas toʼo loron 40 tuirmai hatudu katak ema la bele nega Jesus moris hiʼas duni. Koʼalia ba ema iha Korinto kona-ba buat saida mak akontese, apóstolu Paulo hatete: “Haʼu hatoʼo ona ba imi buat folin-boot neʼebé haʼu mós simu, neʼe mak: Kristu mate ba ita-nia sala hodi tuir Eskritura; no ema hakoi nia, no liutiha loron tolu nia moris hiʼas fali hodi tuir Eskritura; no nia mosu ba Cefas, no tuirmai ba sira naʼin sanulu-resin-rua. Depois neʼe, nia mosu ba maun-alin naʼin-500 liu iha tempu ida, no sira barak sei hamutuk hela ho ita, maski balu mate ona. Depois neʼe, nia mosu ba Tiago, tuirmai ba apóstolu hotu; maibé ikus liu nia mosu ba haʼu nuʼudar ema neʼebé moris mai sedu liu.”—1 Korinto 15:3-8.
RAZAUN HAAT TANBASÁ ITA HATENE JESUS MORIS FALI ONA
11. Oinsá mak Jesus nia moris-hiʼas tuir buat neʼebé eskritura hatete?
11 Razaun 1. Jesus nia moris-hiʼas tuir buat neʼebé eskritura hatete. Uluk kedas Maromak nia Liafuan koʼalia kona-ba Jesus nia moris-hiʼas. Porezemplu, David hakerek katak “ida neʼebé laran-metin” ba Maromak sei sai husi rate laran. (Lee Salmo [Mazmur] 16:10.a) Iha loron Pentekostes 33, apóstolu Pedro esplika katak “ida neʼebé laran-metin” ba Maromak mak Jesus. Nia hatete katak David “haree nanis ona no koʼalia kona-ba Kristu nia moris-hiʼas, katak Maromak sei la husik nia iha rate laran no mós la husik nia isin sai dodok.”—Apóstolu 2:23-27, 31.
12. Jesus mosu ba sé deʼit?
12 Razaun 2. Iha ema barak mak sai sasin ba Jesus nia moris-hiʼas. Iha loron 40 nia laran antes Jesus saʼe ba lalehan, nia mosu dala barak ba ninia dixípulu sira hanesan iha jardín ida besik ninia rate, iha dalan atu ba knua Emaus nian, no fatin seluk tan. (Lucas 24:13-15) Dala ruma nia mosu ba ema ida-idak hanesan Pedro, dala ruma nia mosu ba ema barak. Dala ida, nia mosu ba ema naʼin-500 liu. Ho sasin barak hanesan neʼe, ema ida mós la bele nega katak Jesus moris hiʼas duni.
13. Dixípulu sira halo saida hodi hatudu katak sira fiar Jesus moris hiʼas fali ona?
13 Razaun 3. Dixípulu sira la para haklaken kona-ba Jesus nia moris-hiʼas. Tan deʼit serbisu haklaken, ema fó terus ba dixípulu sira, balu tan ema oho. Hanoin toʼok kona-ba ida-neʼe: Se Jesus mak seidauk moris hiʼas karik, apóstolu Pedro hakarak fó an ba mate, no haklaken ba ema neʼebé uluk halo Jesus mate, katak Jesus moris hiʼas fali ona ka lae? Mak lae duni. Maibé tanba Pedro ho dixípulu sira seluk fiar duni katak Jesus moris ona no tau matan daudaun ba serbisu haklaken mak sira haklaken ho aten-brani. Jesus nia moris-hiʼas mós ajuda sira haree katak sira mós iha esperansa moris-hiʼas nian. Porezemplu, maski atu mate, Estevão fiar metin katak nia sei moris hiʼas fali.—Apóstolu 7:55-60.
14. Saida mak hatudu katak Jesus moris hela?
14 Razaun 4. Ita iha evidénsia barak neʼebé hatudu katak Jesus ukun daudaun nuʼudar Liurai no kongregasaun nia ulun. Se Jesus mak nunka moris hiʼas karik, ema kristaun loos mós la bele sai barak iha mundu neʼe. Karik ita ohin loron mós la hatene Jesus mak sé. Maibé ita iha razaun barak hodi fiar katak Jesus moris daudaun no nia mós tau matan hela ba serbisu haklaken iha mundu tomak.
TANBASÁ JESUS NIA MORIS-HIʼAS IHA FOLIN MAI ITA
15. Tanbasá mak Kristu nia moris-hiʼas fó konfiansa mai ita haklaken ho aten-brani?
15 Kristu nia moris-hiʼas fó konfiansa mai ita haklaken ho aten-brani. Husi Jesus nia tempu kedas, Maromak nia inimigu sira koko ona dalan aat oioin atu hapara serbisu haklaken, liuhusi ema soe fiar neʼebé kontra fali lia-loos, goza, violénsia, bandu, fó terus ita, no oho ita balun. Maibé Bíblia hatete nanis ona: “Kroʼat naran deʼit neʼebé ema halo atu hasoru ó sei la manán.” (Isaías [Yesaya] 54:17) Jesus promete ona nia sei ajuda ita, tan neʼe ita la taʼuk ema sira neʼebé Satanás uza hodi kontra ita. (Mateus 28:20) Ita bele fiar metin katak saida deʼit mak inimigu sira atu halo, la iha ida mak bele hapara ita!
Kristu nia moris-hiʼas fó konfiansa mai ita haklaken ho aten-brani (Haree parágrafu 15)
16, 17. (a) Oinsá mak Jesus nia moris-hiʼas hatudu katak buat neʼebé nia hanorin laʼós buat falsu? (b) Tuir João 11:25, Jeová fó kbiit saida ba Jesus?
16 Jesus nia moris-hiʼas hatudu katak buat neʼebé nia hanorin laʼós buat falsu. Matenek-naʼin ida kona-ba Bíblia hatete: “Se Jesus mak la moris hiʼas karik, entaun ema kristaun hotu beik-teen tanba sira fiar lia-bosok.” Apóstolu Paulo hatete katak se Jesus nunka moris fali husi mate, entaun serbisu haklaken no ema kristaun nia fiar mós la iha folin. Se nuneʼe, Evanjellu sira koʼalia kona-ba ema diʼak ida neʼebé matenek tebes no ikusmai ninia inimigu sira oho nia hanesan deʼit istória triste ida, laʼós tebes. Maibé, Jesus moris hiʼas duni, ida-neʼe hodi hatudu katak buat hotu neʼebé nia hanorin mós loos.—Lee 1 Korinto 15:14, 15, 20.
17 Jesus hatete: “Haʼu mak moris-hiʼas no moris. Ema neʼebé hatudu fiar mai haʼu, maski nia mate, nia sei moris fali.” (João 11:25) Jesus nia promete neʼe sei sai loos tanba Jeová fó tiha ona kbiit ba Jesus hodi fó moris-hiʼas ba ema sira neʼebé sei ukun iha lalehan, no mós sira neʼebé atu moris iha rai. Jesus nia sakrifísiu no moris-hiʼas fó garantia katak mate sei lakon. Tan neʼe mak atu mate mós, ita bele ho kbiit tomak no aten-brani tahan hasoru susar saida deʼit!
18. Jesus nia moris-hiʼas fó garantia kona-ba saida?
18 Jesus nia moris-hiʼas halo ita fiar katak Jeová sei tesi lia ba ema hotu ho domin. Apóstolu Paulo fó-hatene ba feto mane grupu ida iha Atenas katak Maromak sei “tesi lia ho loloos ba ema hotu iha rai. Nia sei halo ida-neʼe liuhusi mane ida neʼebé nia foti tiha ona, no ema hotu bele fiar ida-neʼe tanba nia fó moris-hiʼas ona ba mane neʼe”. (Apóstolu 17:31) Maromak hili tiha ona Jesus sai ita-nia Juíz ida. Ita bele fiar katak nia sei tesi lia ho loos no domin.—Lee Isaías (Yesaya) 11:2-4.b
19. Oinsá mak Jesus nia moris-hiʼas kona ita-nia moris?
19 Tanba ita fiar Jesus nia moris-hiʼas mak ita hakarak halo tuir Maromak. Se Jesus mak la mate no moris hiʼas fali, ita mós la bele sai husi sala no mate nia liman. (Roma 5:12; 6:23) Se ita mak la iha esperansa, diʼak liu ita hatete: “Han no hemu deʼit, tanba aban ita sei mate.” (1 Korinto 15:32) Maibé ita-nia moris laʼós hanesan neʼe tanba ita hafolin tebes esperansa moris-hiʼas nian, no sempre hakarak halo tuir Jeová.
20. Oinsá mak Jesus nia moris-hiʼas hatudu katak Jeová mak Maromak diʼak tebes?
20 Jesus nia moris-hiʼas hatudu katak Jeová mak Maromak diʼak tebes, nia “fó kolen ba sira neʼebé buka nia ho laran”. (Ebreu 11:6) Jeová uza ninia forsa ho matenek hodi halo Jesus moris husi mate no fó ba nia moris nunka bele mate nian iha lalehan. Maromak mós hatudu ninia kbiit bainhira kumpre ninia hakarak sira. Jeová promete katak nia sei uza “bei-oan” espesiál ida atu rezolve sé mak iha direitu hodi ukun iha dalan neʼebé diʼak liu. Atu bele kumpre ninia promete neʼe, “bei-oan” ka Jesus tenke mate depois moris hiʼas fali.—Gênesis (Kejadian) 3:15.
21. Moris-hiʼas iha folin saida ba Ita?
21 Ita agradese tebes tanba Jeová fó esperansa moris-hiʼas nian mai ita. Bíblia promete: “Haree! Maromak nia tenda hamutuk ho ema, no nia sei hela ho sira, no sira sei sai ninia povu. No Maromak rasik sei hamutuk ho sira. No nia sei hamaran sira-nia matan-been hotu husi sira-nia matan, no mate sei la iha tan, no ema sei la tanis tan ka laran-susar ka laran-triste; basá buat neʼebé uluk nian lakon tiha ona.” Bainhira apóstolu João hakerek promete neʼe, nia mós simu lia-menon ida: “Hakerek ida-neʼe bá, basá liafuan sira-neʼe mak loos duni no ema bele tau fiar.” Entaun, João simu vizaun husi sé? Husi Jesus duni neʼebé hetan moris hiʼas ona!—Apokalipse 1:1; 21:3-5.
a Salmo 16:10: “Tanba Ita sei la husik haʼu iha rate laran. Ita-boot sei nunka husik ema neʼebé laran-metin atu haree rai-kuak.”
b Isaías 11:2-4: “2 No Jeová nia espíritu sei hela ho nia, espíritu matenek nian no espíritu atu hatene, espíritu atu fó konsellu no espíritu kbiit nian, espíritu koñesimentu nian no espíritu atu taʼuk ba Jeová; 3 no nia sei haksolok tan taʼuk ba Jeová. Nia sei la tesi lia tuir buat neʼebé matan haree deʼit, no nia sei la fó dixiplina tuir deʼit buat neʼebé nia tilun rona. 4 Nia sei tesi lia ba ema kiʼik iha dalan neʼebé loos, no nia sei fó dixiplina ho laran-loos ba ema neʼebé laran-maus neʼebé iha rai. No nia sei baku rai ho ai-tonka husi ninia ibun; no ho espíritu husi nia ibun nia sei halo ema aat mate.”