Bainhira moris-hiʼas akontese iha futuru iha Paraízu, ema sei simu fali sira-nia belun no família neʼebé mate ona

Saida mak moris-hiʼas?

Bíblia nia resposta

Iha Bíblia, liafuan Gregu neʼebé tradús nuʼudar “moris-hiʼas” mak anastasis. Liafuan neʼe signifika “hadeer” ka “hamriik fali”. Bainhira ema ida moris-hiʼas, nia moris fali nuʼudar ema neʼebé hanesan.—1 Korinto 15:12, 13.

Maski liafuan “moris-hiʼas” la mosu iha Eskritura Lian Ebraiku ka Testamentu Tuan, maibé iha duni hanorin kona-ba moris-hiʼas iha Testamentu Tuan. Porezemplu, liuhusi profeta Oseias, Maromak promete: “Haʼu sei sosa fali sira husi rate nia kbiit, haʼu sei halo sira moris fali husi mate.”—Oseias 13:14; Job 14:13-15; Isaias 26:19; Daniel 12:2, 13.

Ema neʼebé hetan moris-hiʼas sei hela iha neʼebé? Ema balu hetan moris-hiʼas atu hela iha lalehan hodi ukun nuʼudar liurai hamutuk ho Kristu. (2 Korinto 5:1; Apokalipse 5:9, 10) Bíblia bolu moris-hiʼas neʼe nuʼudar “moris-hiʼas primeiru” no “moris-hiʼas uluk nian”. Liafuan rua neʼe hatudu katak sei iha tan moris-hiʼas seluk. (Apokalipse 20:6; Filipe 3:11) Ema neʼebé hetan moris-hiʼas hanesan neʼe, sei hela iha rai. Ema barak liu mak sei hetan moris-hiʼas hanesan neʼe.—Salmo 37:29.

Oinsá mak ema hetan moris-hiʼas? Maromak fó kbiit ba Jesus atu fó moris-hiʼas ba ema mate. (João 11:25) Jesus sei fó moris-hiʼas ba “ema hotu neʼebé iha rate laran”, no ema ida-idak neʼebé sei hetan moris-hiʼas nafatin iha hahalok no memória neʼebé hanesan. Sira neʼebé hetan moris-hiʼas ba lalehan sei iha isin espíritu, no ema neʼebé hetan moris-hiʼas iha rai sei iha isin neʼebé perfeitu no la iha moras.—Isaias 33:24; 35:5, 6; 1 Korinto 15:42-44, 50.

Sé mak sei hetan moris-hiʼas? Bíblia hatete katak “Maromak sei fó moris-hiʼas ba ema neʼebé hatudu hahalok loos no mós ema neʼebé hatudu hahalok la loos”. (Apóstolu 24:15) Ema neʼebé hatudu hahalok loos inklui ema laran-metin sira hanesan Noé, Sara, no Abraão. (Génesis 6:9; Ebreu 11:11; Tiago 2:21) Ema neʼebé hatudu hahalok la loos inklui sira neʼebé la halo tuir Maromak nia matadalan tanba la iha oportunidade atu aprende kona-ba matadalan sira-neʼe hodi bele halo tuir.

Maibé, ema sira neʼebé hatudu hahalok aat toʼo labele hadiʼa tan, sira sei la hetan moris-hiʼas. Bainhira ema hanesan neʼe mate, sira la iha ona esperansa atu moris fali.—Mateus 23:33; Ebreu 10:26, 27.

Bainhira mak moris-hiʼas sei akontese? Bíblia fó-hatene nanis katak moris-hiʼas ba lalehan sei akontese durante tempu neʼebé Kristu toʼo ona mai, neʼebé komesa iha tinan 1914. (1 Korinto 15:21-23) Moris-hiʼas iha rai sei akontese durante Jesus Kristu nia Ukun ba Tinan Rihun Ida, no iha tempu neʼebá mundu sei sai paraízu.—Lucas 23:43; Apokalipse 20:6, 12, 13.

Tanbasá ita bele fiar katak moris-hiʼas sei akontese? Bíblia konta istória sia kona-ba moris-hiʼas, no iha ema barak neʼebé sai sasin ba akontesimentu ida-idak. (1 Reis 17:17-24; 2 Reis 4:32-37; 13:20, 21; Lucas 7:11-17; 8:40-56; João 11:38-44; Apóstolu 9:36-42; Apóstolu 20:7-12; 1 Korinto 15:3-6) Lázaro nia moris-hiʼas mak akontesimentu neʼebé úniku, tanba Jesus halo milagre neʼe iha ema-lubun nia oin bainhira Lázaro mate ona ba loron haat. (João 11:39, 42) Ema sira neʼebé kontra Jesus mós labele nega kona-ba neʼe, no sira halo planu atu oho Jesus no Lázaro.—João 11:47, 53; 12:9-11.

Moris-hiʼas tolu neʼebé hakerek iha Bíblia: feto-faluk ida nia oan-mane, feto Kristaun ida, no Jesus nia belun Lázaro

Bíblia fó sai katak Maromak iha kbiit no hakarak atu halo ema moris-hiʼas. Nia hanoin-hetan buat hotu kona-ba ema neʼebé nia sei fó moris-hiʼas. Nia sei fó moris-hiʼas ba ema hodi uza ninia forsa neʼebé boot. (Job 37:23; Mateus 10:30; Lucas 20:37, 38) Maromak bele halo ema moris fali, no nia hakarak halo nuneʼe. Bíblia esplika kona-ba Maromak nia hakarak atu fó moris-hiʼas ba ema iha futuru, hodi dehan: “Ita sei hanoin tebes ema neʼebé Ita kria ona ho Ita-nia liman.”—Job 14:15.

Hanoin neʼebé sala kona-ba moris-hiʼas

Hanoin neʼebé sala: Moris-hiʼas katak hatama fali ema nia klamar ba ninia isin.

Hanoin neʼebé loos: Bíblia hanorin katak ema nia klamar mak ema neʼe rasik, laʼós parte ruma neʼebé moris hela bainhira nia mate. (Génesis 2:7, nota-rodapé; Ezequiel 18:4) Moris-hiʼas laʼós katak tau fali ema nia klamar ba ninia isin, maibé neʼe katak Maromak kria fali nia nuʼudar ema ida.

Hanoin neʼebé sala: Ema balu sei hetan moris-hiʼas no tuirmai Maromak sei halakon fali kedas.

Hanoin neʼebé loos: Bíblia hatete katak “sira neʼebé halo hahalok aat sei moris hiʼas atu hetan tesi-lia”. (João 5:29) Maibé, sira sei hetan tesi-lia bazeia ba buat neʼebé sira halo depois hetan moris-hiʼas, laʼós bazeia ba sira-nia hahalok antes neʼe. Jesus hatete: “Sira neʼebé mate ona sei rona Maromak nia Oan-Mane nia lian no sira neʼebé rona sei moris.” (João 5:25) “Sira neʼebé rona” ka halo tuir buat neʼebé sira aprende depois moris-hiʼas, sira-nia naran sei hakerek iha “livru moris nian”.—Apokalipse 20:12, 13.

Hanoin neʼebé sala: Bainhira hetan moris-hiʼas, ema neʼe nia isin sei hanesan deʼit ho antes nia mate.

Hanoin neʼebé loos: Depois mate, ema nia isin sei sai dodok no rahun.—Eclesiastes 3:19, 20.