Jesus fila fali ba lalehan

LORON laʼo ba daudauk, Jesus hatudu ninia an ba dixípulu sira dala barak ona. Dala ida, dixípulu maizumenus naʼin-500 haree nia. Hatene Jesus koʼalia kona-ba saida kuandu nia mosu ba sira? Kona-ba Maromak nia reinu. Jeová haruka Jesus toʼo mundu atu hanorin ema kona-ba Reinu. No nia moris filafali husi mate mós nafatin halo nuneʼe.

Hanoin-hetan ka lae, saida mak Maromak nia reinu? Loos, Reinu mak Maromak nia governu iha lalehan, no Jesus mak Maromak hili atu sai liurai. Hanesan ita aprende, Jesus hatudu tiha ona katak nia sei sai liurai ida neʼebé diʼak tebes hodi fó-han ba ema neʼebé hamlaha, kura ema moras, no mós halo ema mate moris filafali!

Entaun, mundu sei sai oinsá bainhira Jesus ukun nuʼudar liurai iha tinan rihun ida nia laran? Loos duni, mundu tomak sei sai paraízu neʼebé kapás. Sei la iha tan funu, krime, no moras, no mate mós la iha ona. Ita fiar ida-neʼe tanba Maromak halo mundu atu sai paraízu neʼebé ema bele moris haksolok. Tan neʼe mak tempu uluk nia halo jardín Eden. No Jesus sei tau matan atu ikusmai Maromak nia hakarak sei mosu duni.

Oras mai ona ba Jesus atu fila fali ba lalehan. Durante loron 40, Jesus hatudu ninia an ba dixípulu sira. Nuneʼe, sira fiar duni katak nia agora moris filafali ona. Maibé, antes nia husik ninia dixípulu sira, nia hatete: ‘Hela iha Jeruzalein toʼo tempu neʼebé imi simu espíritu santu.’ Espíritu santu mak Maromak nia forsa ativu, hanesan anin neʼebé huu, neʼebé Maromak uza atu ajuda ninia dixípulu hodi halaʼo ninia hakarak. Ikusliu, Jesus hatete: ‘Imi sei haklaken kona-ba haʼu toʼo mundu tomak.’

Jesus hatete tiha hanesan neʼe, depois akontese buat ida neʼebé halo dixípulu sira hakfodak. Nia komesa saʼe ba lalehan, hanesan ó haree iha dezeñu neʼe. Tuirmai, kalohan taka nia no dixípulu sira la bele ona haree Jesus. Jesus bá toʼo lalehan, no husi neʼebá mak nia hahú ukun ninia dixípulu sira iha Rai. Dezeñu iha pájina tomak