Hein iha Jeruzalein

EMA sira iha neʼe mak Jesus nia dixípulu sira. Sira halo tuir Jesus hodi hein iha Jeruzalein. Kuandu sira hein hamutuk, tarutu boot ida akontese iha uma laran tomak. Tarutu neʼe hanesan anin-fuik neʼebé huu makaʼas. Depois neʼe ahi hanesan nanál mosu iha dixípulu ida-idak nia ulun leten. Ó haree ahi iha sira ida-idak nia leten ka lae? Ida-neʼe hotu katak sá?

Neʼe milagre ida! Jesus iha lalehan tiha ona ho ninia Aman, no nia fakar Maromak nia espíritu santu ba ema neʼebé tuir nia. Hatene espíritu neʼe book sira atu halo saida? Sira hotu komesa koʼalia iha língua oioin.

Ema barak iha Jeruzalein rona tarutu neʼebé hanesan anin-fuik, no mai atu haree saida mak akontese daudauk. Sira balu husi nasaun seluk no mai Jeruzalein atu tuir festa Izraél nian naran Pentekostes. Sira neʼebé husi nasaun seluk hakfodak tebes! Sira rona dixípulu koʼalia kona-ba buat furak neʼebé Maromak halo tiha ona ho sira rasik nia língua.

Sira hatete: ‘Ema sira neʼe hotu mai husi Galiléia. Oinsá mak sira bele hatene koʼalia ho língua oioin husi ita-nia rai?’

Agora, Pedro hamriik atu esplika ba sira. Nia foti lia no fó-hatene oinsá ema oho Jesus no depois Jeová halo nia moris filafali husi mate. Pedro hatete: ‘Agora Jesus iha lalehan no iha Maromak nia liman sorin loos. Nia fakar espíritu santu neʼebé promete nanis ona. Tan neʼe mak imi haree no rona milagre sira-neʼe.’

Entaun, bainhira Pedro hatoʼo liafuan hirak-neʼe, ema barak sente triste tebes kona-ba buat neʼebé akontese ona ba Jesus. Sira husu: ‘Saida mak ami tenke halo?’ Pedro hatete: ‘Imi tenke muda imi-nia moris no hetan batizmu.’ Nuneʼe loron neʼe kedas, maizumenus ema naʼin-3.000 hetan batizmu no hahú moris tuir Jesus.