Governu neʼebé sei lori paraízu mai

Kuandu Jesus moris iha Rai, nia dehan ba ema neʼebé tuir nia atu harohan hodi husu Maromak nia Reinu: “Halo Ita nia reinu toʼo mai ami; halo tuir Ita nia hakarak ba iha rai nudar iha lalehan.” (Mateus 6:9, 10) Nia mós koʼalia beibeik kona-ba “liafoun diak reinu nian”. (Mateus 9:35) Tuir loloos, nia koʼalia liu kona-ba Reinu duké kona-ba buat seluk. Tansá? Tanba liuhusi Reinu neʼe maka Maromak sei rezolve problema sira neʼebé ohin loron halo ita-nia moris susar tebes. Liuhusi Reinu neʼe, Maromak lakleur sei hapara funu sira, hamlaha, moras no krime, no nia sei lori dame no unidade.

Ita hakarak moris iha mundu ida hanesan neʼe ka lae? Se hakarak, Ita tenke lee broxura ida-neʼe. Iha nia laran, Ita sei aprende katak Reinu neʼe governu ida, neʼebé diʼak liu fali governu ida seluk neʼebé ukun ema toʼo agora. Ita sei haree mós, dalan furak ida neʼebé Maromak esplika neineik-neineik ba nia atan sira buat nia hakarak halo liuhusi nia Reinu. No mós, Ita sei hatene oinsá maka Reinu neʼe bele ajuda Ita ohin loron.

Tuir loloos, agora duni Ita bele sai ema ida iha Maromak nia Reinu. Maibé, antes Ita bele hili atu halo ida-neʼe, Ita tenke hatene liután kona-ba Reinu neʼe. Tan neʼe, ami anima Ita atu estuda broxura neʼe. Buat hotu neʼebé broxura fó-hatene ba Ita kona-ba Reinu neʼe mai husi Bíblia.

Ulukliu, mai ita haree tansá mak ita presiza tebes Maromak nia Reinu.

Kuandu ema nia istória foin komesa, Maromak halo ema perfeitu no tau nia iha paraízu ida. Iha tempu neʼebá, la presiza Reinu neʼe.

Maibé, Adão no Eva, ita-nia inan-aman primeiru, rona ba Satanás, anju ida neʼebé kontra hasoru Jeová. Nia dehan ba sira lia-bosok kona-ba Maromak no halo sira mós atu kontra hasoru Maromak. Tan neʼe sira merese mate, tanba “sala nia kolen mak mate”.—Roma 6:23.

Ema ida neʼebé la perfeitu, neʼebé sala-naʼin, la bele iha oan perfeitu. Tan neʼe, Adão nia oan hotu moris la perfeitu, sala-naʼin no mate.—Roma 5:12.

Husi tempu neʼebá toʼo agora, ema presiza Maromak nia Reinu atu ajuda sira sai husi malisan sala no mate. Reinu neʼe mós sei hamoos Maromak nia naran husi lia-bosok neʼebé Satanás hateten kona-ba nia.

Maromak Jeová promete katak bei-oan (ou “fini”) espesiál ida sei moris hodi salva ema husi sala. (Gênesis [Kejadian] 3:15) Bei-oan neʼe maka sei sai Liurai ba Maromak nia Reinu.

Nia maka sé?

Besik tinan 2.000 depois Adão halo sala, iha ema-mane ida neʼebé fiar-metin, naran Abraão. Jeová haruka Abraão sai husi sidade iha neʼebé nia hela atu moris iha tenda iha rai-Palestina.

Abraão halo buat hotu Jeová haruka, no mós buat ida neʼebé difísil tebes. Jeová haruka nia atu sakrifika nia oan Isaac iha altar ida.

Loloos Jeová lakohi ema nuʼudar sakrifísiu ida. Maibé nia hakarak hatene toʼo neʼebé mak Abraão hadomi nia. Kuandu Abraão besik atu oho Isaac Jeová hapara nia.

Tanba Abraão iha fé boot, Jeová promete atu fó rai-Palestina ba nia bei-oan sira, no hateten katak Bei-oan neʼebé promete ona sei mai liuhusi Abraão no Isaac nia bei-oan sira.—Gênesis [Kejadian] 22:17, 18; 26:4, 5.

Isaac iha oan kaduak, Esaú no Jacob. Jeová hateten katak Bei-oan neʼebé nia promete ona sei mai liuhusi Jacob.—Gênesis [Kejadian] 28:13-15.

Jacob, ida neʼebé Jeová mós hanaran Israel, iha oan naʼin-12, sira hotu mós depois iha oan sira. Nuneʼe Abraão nia oan sira komesa atu sai barak.—Gênesis [Kejadian] 46:8-27.

Kuandu iha hamlaha boot iha rai neʼebá, Jacob no nia família muda ba Egipto bainhira Faraó, ukun-naʼin iha rai-Egipto, konvida sira.—Gênesis [Kejadian] 45:16-20.

Iha Egipto, fó sai tiha katak Bei-oan neʼebé promete ona sei mai liuhusi Jacob nia oan Judá nia bei-oan sira.—Gênesis [Kejadian] 49:10.

Ikusliu, Jacob mate, no ninia bei-oan sira aumenta barabarak toʼo sira sai hanesan nasaun ida. Tanba ida-neʼe ema Egipto taʼuk ba sira no halo sira sai atan.—Êxodo [Keluaran] 1:7-14.

Ikusliu, Jeová haruka Moisés, ema-mane ida neʼebé fiar-metin loos, atu haruka Faraó, neʼebé ukun iha tempu neʼebá, atu husik Israel nia oan sira sai livre.— Êxodo [Keluaran] 6:10, 11.

Faraó lakohi, tan neʼe Jeová haruka malisan 10 ba ema Egipto. Iha malisan ikus, Nia haruka anju mate nian atu oho oan-mane primeiru hotu iha Egipto.—Êxodo [Keluaran], kapítulu 7 toʼo 12.

Maromak dehan ba ema Israel katak se sira oho bibi-oan ida ba han-kalan no uza ninia raan atu tau iha odamatan leten no riin, anju mate nian sei liu sira-nia uma. Nuneʼe mak ema Israel nia oan-mane primeiru sira hetan salvasaun.—Êxodo [Keluaran] 12:1-35.

Tanba ida-neʼe, Faraó haruka Israelita sira sai husi Egipto. Maibé, kuandu ida-neʼe liutiha nia troka hanoin no duni tuir sira, atu lori sira fila fali.

Jeová loke dalan ida ba ema Israel sira atubele halai liu husi Tasi Mean. No bainhira Faraó no nia tropa sira koko atu tuir sira, sira mout.—Êxodo [Keluaran] 15:5-21.

Jeová lori Israel nia oan sira toʼo foho ida naran Sinai, iha rai-fuik maran. Iha-neʼebá, nia fó ba sira ninia Lei no hateten katak se sira tuir nafatin Lei neʼe, sira sei sai Reinu ida amlulik nian no nasaun santa ida. Nuneʼe, bainhira tempu liu daudaun, Israelita sira iha oportunidade atu sai parte importante ida iha Maromak nia Reinu.—Êxodo [Keluaran] 19:6; 24:3-8.

Depois Israelita sira hela iha foho Sinai besik tinan ida, Jeová lori sira ba Palestina, rai neʼebé Nia promete ona ba Abraão, sira-nia beiʼala.

Iha Palestina, Maromak kleurtiha husik liurai sira ukun Israelita sira. Hanesan neʼe maka Maromak iha reinu ida iha Rai.

Israel nia liurai segundu maka David, bei-oan ida husi Judá. David manán Israel nia inimigu hotu, no nia halo Jerusalém sai nasaun nia sidade boot nuʼudar kapitál.

Buat neʼebé mosu bainhira David ukun hatudu katak kuandu Jeová apoia liurai ida, la iha ukun-naʼin ida seluk iha Rai neʼebé bele manán nia.

Jeová hateten katak ‘Bei-oan’ neʼebé promete ona sei mai husi David nia bei-oan sira.—1 Crônicas [1 Tawarikh] 17:7, 11, 14.

Salomão, David nia oan, ukun tuir nia aman. Nia liurai matenek ida, no Israel buras ho ninia ukun.

Salomão harii mós templu furak ida ba Jeová iha Jerusalém. Kondisaun sira iha Israel bainhira Salomão ukun, hatudu mai ita bensaun barak neʼebé Maromak nia Reinu, neʼebé besik atu mai, sei lori ba ema iha Rai.—1 Reis [1 Raja-Raja] 4:24, 25.

Maski nuneʼe, liurai barak, neʼebé ukun tuir Salomão, la laran-metin tebes.

Maibé, bainhira David nia bei-oan sira sei ukun iha Jerusalém, Jeová uza nia profeta Isaías atu koʼalia kona-ba David nia Oan ida iha futuru neʼebé sei ukun Rai tomak ho laran-metin. Nia maka sei sai Bei-oan neʼebé promete ona.—Isaías 9:6, 7.

Profeta Isaías hateten nanis katak Ninia ukun sei iha glória boot liu fali Salomão nian.—Isaías, kapítulu 11 no 65.

Tan neʼe, buat neʼebé Maromak nia atan sira hakarak tebes mak atu hatene sé maka Bei-oan neʼe.

Maibé, antes Bei-oan mai, Israel nia liurai sira sai aat tebetebes. Tan neʼe, iha tinan 607 Antes Kristu, Jeová husik Babilóniu sira manán Israel no lori povu barak bá toʼo iha Babilónia. Maibé, Maromak la haluha buat neʼebé nia promete. Bei-oan sei mosu husi David nia beiʼala.—Ezequiel 21:25-27.

Buat neʼebé mosu ho Israel hatudu katak, maski ema liurai matenek ida no laran-metin bele lori benefísiu barak, benefísiu sira-neʼe la kompletu. Ema laran-metin mate no sira neʼebé ukun tuir karik la laran-metin. Saida maka solusaun? Bei-oan neʼebé promete ona.

Ikusliu, depois tinan rihun ba rihun liutiha, Bei-oan mosu. Nia maka sé?

Anju ida husi Maromak fó resposta ba feto Israelita ida, neʼebé seidauk kaben, naran Maria. Anju dehan ba Maria katak nia sei iha oan ida ho naran Jesus. Anju hateten nuneʼe:

“Nia sei sai ema boot; ema sei hanaran Nia Naʼi aas liu hotu nia Oan. Naʼi Maromak sei haraik ba Nia nia aman David nia kadunan. Nia sei ukun.”—Lucas 1:32, 33.

Nuneʼe Jesus maka sai Bei-oan neʼebé promete ona no ikusliu sai Liurai iha Maromak nia Reinu. Maibé, tansá maka Jesus la hanesan ho ema laran-metin neʼebé moris uluk?

Jesus moris liuhusi milagre ida. Ninia inan virjen ida, no nia la iha aman rasik husi Rai. Jesus moris uluk iha lalehan no Maromak nia espíritu santu, ou forsa, muda Jesus nia moris husi lalehan ba Maria nia kabun laran. Tan neʼe, nia la hetan Adão nia sala. Durante ninia moris tomak, Jesus la halo sala.—1 Pedro 2:22.

Kuandu Jesus tinan 30, nia hetan batizmu.

Nia koʼalia ba ema kona-ba Maromak nia Reinu, no ikusliu, nia aprezenta nia an nuʼudar Liurai ba Reinu neʼe.—Mateus 4:23; 21:4-11.

Nia mós halo milagre barak.

Nia kura ema moras.—Mateus 9:35.

Nia halo milagre atu fó-han ema neʼebé hamlaha.—Mateus 14:14-22.

Nia mós halo ema mate moris fali.—Joao 11:38-44.

Milagre sira-neʼe hatudu buat neʼebé Jesus sei halo nuʼudar Liurai iha Maromak nia Reinu ba ema.

Ita hanoin-hetan oinsá Liurai David halo Jerusalém sai sidade kapitál ba ninia reinu? Jesus esplika katak Maromak nia Reinu laʼós iha Rai, maibé iha lalehan. (Joao 18:36) Tanba ida-neʼe maka Reinu iha naran “Jerusalem lalehan”.—Ebreu [Ibrani] 12:21-23, 28.

Jesus fó-hatene lei sira neʼebé ema tenke halo tuir atubele sai povu ba Reinu neʼe. Lei sira-neʼe agora ita hetan iha Bíblia laran. Lei importante liu mak ema tenke hadomi Maromak no hadomi malu.—Mateus 22:37-39.

Jesus mós fó sai katak nia sei la ukun ninia Reinu mesak. Sei iha ema husi Rai, neʼebé hili tiha ona, atu bá lalehan no ukun iha neʼebá hamutuk ho nia. (Lucas 12:32; Joao 14:3) Sira naʼin-hira? Apokalipse [Wahyu] 14:1 hatán: 144.000.

Se ema naʼin-144.000 deʼit maka bá lalehan atu ukun hamutuk ho Jesus, ema seluk iha Rai bele hein saida?

Bíblia hateten: “Ema loos rasik sei simu Rai, no sira sei moris ba nafatin iha neʼebá.”—Salmo [Mazmur] 37:29.

Ema sira neʼebé sei moris iha Rai iha naran “bibi seluk”.— Joao 10:16.

Nuneʼe, iha esperansa rua. Iha ema naʼin-144.000 neʼebé Maromak Jeová konvida atu bá lalehan hodi ukun hamutuk ho Jesus Kristu. Maibé, ema rihun ba rihun seluk iha esperansa duni atu moris ba nafatin iha Rai nuʼudar povu iha ninia Reinu.—Apokalipse [Wahyu] 5:10.

Satanás odi Jesus no kontra hasoru nia. Depois Jesus haklaken tinan tolu ho balun ona, Satanás halo ema kaer Jesus no oho nia hodi prega nia ba ai-riin ida. Tansá maka Maromak husik ida-neʼe mosu?

Hanoin-hetan katak tanba ita Adão nia bei-oan, ita hotu halo sala no merese mate.—Roma 6:23.

Hanoin-hetan mós katak Jesus, tanba nia moris mai iha dalan ida neʼebé milagre, nia perfeitu no la merese mate. Maski nuneʼe, Maromak husik Satanás atu ‘hakanek Jesus nia ain-tuban’, atu oho nia. Maibé Maromak foti nia atu moris fali nuʼudar espíritu ida neʼebé la bele mate. Tanba Jesus sei iha direitu atu moris nuʼudar ema perfeitu iha Rai, nia bele uza direitu neʼe atu sosa ita fali husi sala.—Gênesis [Kejadian] 3:15; Roma 5:12, 21; Mateus 20:28.

Atu ajuda ita komprende diʼak liu saida maka Jesus nia sakrifísiu signifika, Bíblia koʼalia kona-ba ida-neʼe liuhusi ezemplu profétiku.

Porezemplu, Ita hanoin-hetan ka lae, kuandu Jeová haruka Abraão atu sakrifika nia oan, atu hatudu nia domin ba Jeová?

Ida-neʼe ezemplu profétiku ida kona-ba Jesus nia sakrifísiu, no hatudu katak tanba Jeová nia domin ba ema boot tebetebes, nia husik ninia Oan, Jesus, mate tanba ita, atu nuneʼe ita bele hetan moris.—Joao 3:16.

Ita hanoin-hetan ka lae, oinsá Jeová salva Israelita sira husi Egipto, no oinsá nia salva sira-nia oan-mane primeiru hodi halo anju mate nian liu sira-nia uma?—Êxodo [Keluaran] 12:12, 13.

Ida-neʼe ezemplu profétiku ida. Hodi bibi-oan nia raan mak Israelita sira nia oan-mane primeiru bele moris, hanesan neʼe mós, hodi Jesus nia raan, neʼebé fakar, mak ema neʼebé fiar nia bele moris. No hanesan ho buat neʼebé akontese iha kalan neʼebá mak Israelita sira hetan liberdade, mós hodi Jesus nia mate mak ema hetan liberdade husi sala no mate.

Tanba ida-neʼe maka Jesus iha naran “Maromak nia Bibi Oan nebe kasu mundu nia sala”.—Joao 1:29.

Maski nuneʼe, bainhira Jesus sei iha Rai, nia mós halibur dixípulu no fó treinu ba sira atu haklaken lia-foun diʼak kona-ba Reinu, no atu halo nuneʼe mós depois nia mate.—Mateus 10:5; Lucas 10:1.

Sira-neʼe mak ema primeiru neʼebé Maromak hili atu ukun hamutuk ho Jesus iha nia Reinu.—Lucas 12:32.

Ita hanoin-hetan ka lae, katak Maromak promete ba Judeu sira katak, se sira tuir Lei, sira sei sai “reinu ida amlulik nian”? Agora sira iha oportunidade atu halo parte iha Maromak nia Reinu, no serbí nuʼudar amlulik iha lalehan, se sira simu Jesus. Maibé, sira barak liu la simu Jesus.

Tan neʼe, husi tempu neʼebá ba oin, Judeu sira laʼós tan nasaun neʼebé Maromak hili; Palestina laʼós tan Rai neʼebé Maromak Promete.—Mateus 21:43; 23:37, 38.

Husi Jesus nia loron toʼo ita-nian, Jeová halibur ema sira neʼebé sei ukun hamutuk ho Jesus iha lalehan. Sei iha ema rihun balu neʼebé moris hela iha Rai. Ita bolu sira restu neʼebé Maromak kose ho espíritu santu.—Apokalipse [Wahyu] 12:17.

Agora, Ita komesa atu komprende saida maka Maromak nia Reinu. Neʼe maka governu ida iha lalehan, Liurai maka Jesus Kristu, no hamutuk nia mak ema naʼin-144.000 husi Rai. Reinu neʼe sei ukun ema iha Rai, neʼebé fiar-metin, no sei iha podér atu lori dame ba Rai.

Despois Jesus mate, nia moris-hiʼas fali no bá lalehan. Iha neʼebá, nia hein atu Maromak fó sai bainhira nia bele komesa atu ukun nuʼudar Liurai iha Maromak nia Reinu. (Salmo [Mazmur] 110:1) Bainhira mak ida-neʼe sei sai?

Uluk, dala balu Jeová haruka mehi ba ema hodi fó sai buat sira kona-ba ninia Reinu.

Iha Daniel nia tempu, Jeová haruka mehi ida ba Nabucodonosor, Babilónia nia Liurai. Neʼe kona-ba ai-hun ida boot tebetebes.—Daniel 4:10-37.

Ai-hun neʼe tesi tiha no nia hun badak futu durante tinan hitu.

Ai-hun neʼe reprezenta Nabucodonosor. Hanesan hun badak futu tiha durante tinan hitu, mós Nabucodonosor lakon nia neon no sai bulak durante tinan hitu. Depois maka nia hetan ninia neon fali.

Buat hirak-neʼe hotu mak ezemplu profétiku. Nabucodonosor reprezenta Jeová nia ukun iha Rai tomak. Uluk, ukun neʼe halaʼo liuhusi Liurai David nia bei-oan sira iha Jerusalém. Kuandu Babilónia manán Jerusalém iha tinan 607 Antes Kristu (AK), ukun neʼe hakotu tiha. Sei la iha tan liurai seluk husi David nia bei-oan sira “toʼo nia mai mak iha direitu legál”. (Ezequiel 21:27) Nia maka Jesus Kristu.

Tempu hira maka tenke liu, husi tinan 607 AK toʼo Jesus komesa atu ukun? Tinan profétiku hitu. Ida-neʼe maka tinan 2.520. (Apokalipse [Wahyu] 12:6, 14) No tinan 2.520 husi 607 AK lori ita toʼo 1914 Depois Kristu (DK).

Tan neʼe Jesus komesa atu ukun iha tinan 1914. Ida-neʼe signifika saida?

Bíblia fó-hatene ita liuhusi vizaun ida neʼebé apóstolu João haree.

Nia haree feto ida iha lalehan neʼebé hahoris oan-mane ida.—Apokalipse [Wahyu] 12:1-12.

Feto neʼe reprezenta Maromak nia organizasaun iha lalehan, neʼebé iha Maromak nia anju hotu nuʼudar atan. Oan-mane reprezenta Maromak nia Reinu. Reinu neʼe “moris” ou harii iha tinan 1914.

Tuirmai, saida mak akontese? Buat primeiru neʼebé Jesus halo nuʼudar Liurai maka duni tun Satanás ba Rai, no anju sira neʼebé kontra hasoru Maromak ho nia.—Apokalipse [Wahyu] 12:7, 9.

Bíblia fó-hatene rezultadu: “Neʼe duni, lalehan haksolok ba, no sira hotu nebe horik iha nia. Maibe susar ba imi, rai no tasi; basa diabu tun tiha ba imi ho laran nakali, tamba nia hatene katak nia loron sira toʼo ona rohan.”—Apokalipse [Wahyu] 12:12.

Tan neʼe, bainhira Jesus komesa atu ukun iha lalehan, ninia inimigu sira halo buat barak iha Rai. Nuʼudar Bíblia hatete nanis, Jesus komesa atu ukun iha ninia inimigu sira nia leet.—Salmo [Mazmur] 110:1, 2.

Ida-neʼe signifika saida ba ema iha Rai?

Jesus dehan mai ita: funu, hamlaha, moras, no rai-nakdoko.—Mateus 24:7, 8; Lucas 21:10, 11.

Ita haree buat hirak-neʼe mosu husi tinan 1914, neʼebé hatudu razaun ida seluk tansá ita hatene katak Reinu neʼe komesa atu ukun iha tempu neʼebá.

Livru Apokalipse hateten mai ita katak ema sei “halo aat raiklaran neʼe”. (Apokalipse [Wahyu] 11:18) Ita haree ida-neʼe mós, liuliu husi tinan 1914.

Apóstolu Paulo hatutan tan katak ema sei “hanoin deit sira an hodi buka osan; . . . refila sira nia aman inan sira, . . . la hatene sadia maluk no laran nakali, konta ema nia vida, la tuir ukunfuan”.—2 Timoteo 3:1-5.

Agora Ita hatene ona tansá maka moris susar tebes ohin loron. Satanás halo buat barak. Maibé Maromak nia Reinu mós halo buat barak.

Tempu uitoan depois tinan 1914, restu husi ema neʼebé iha esperansa atu ukun iha lalehan hamutuk ho Jesus, komesa atu fó sai lia-foun diʼak katak Reinu neʼe ukun ona. Serbisu neʼe habelar ona ba Rai tomak, nuʼudar Jesus dehan sei akontese.—Mateus 24:14.

Serbisu haklaken neʼe halaʼo tansá?

Primeiru mak atu fó-hatene ema kona-ba Maromak nia Reinu.

Segundu, atu ajuda ema foti desizaun se sira hakarak sai povu iha Reinu neʼe ka lae.

Jesus hateten katak iha ita-nia tempu ema hotu iha Rai sei haketak ba grupu rua, neʼebé ikusliu sei sai hanesan bibi-malae no hanesan bibi-timur.—Mateus 25:31-46.

‘Bibi-malae’ mak ema neʼebé hadomi ona Jesus no nia alin sira. ‘Bibi-timur’ mak ema neʼebé la hadomi nia no nia alin sira.

‘Bibi-malae’ sei hetan moris rohan-laek no ‘bibi-timur’ sei la hetan.

Haklaken lia-foun diʼak Reinu nian mak ajuda ema atu hatudu se sira hanesan bibi-malae ou hanesan bibi-timur.

Iha-neʼe maka profesia ida liuhusi profeta Isaías.

“No buat neʼebé sei mosu duni iha loron sira-nia parte ikus maka foho ba Jeová nia uma sei harii metin iha foho sira leten, no sei hasaʼe duni iha foho-oan leten, no ba foho neʼe maka nasaun hotu sei suli.”—Isaías 2:2.

Ema iha Rai agora hasoru “loron sira-nia parte ikus”.

Jeová nia “uma” adorasaun nian maka “hasaʼe” aas liu relijiaun falsu.

“No povu barak sei bá duni no dehan: ‘Mai, imi hotu, no mai ita saʼe ba Jeová nia foho, ba Jacob nia Maromak nia uma, no nia sei hanorin ita kona-ba nia dalan sira, no ita sei laʼo iha ninia dalan sira.’”—Isaías 2:3.

Nuneʼe, ema barak husi nasaun hotu mai atu adora Jeová no konvida ema seluk atu hamutuk sira. Sira aprende atu tuir hahalok neʼebé Jeová hakarak.

“No sira sei baku sira-nia surik sai ai-suak fila-rai nian, no sira-nia diman sai katana kiʼik hodi taa ai-sanak. Nasaun sei la foti surik hasoru nasaun, sira mós sei la aprende funu tan.”—Isaías 2:4.

Ema neʼebé adora Jeová iha unidade no hadame malu.

Rezultadu husi atividade neʼebé Maromak nia Reinu halaʼo mak agora iha ema rihun ba rihun iha mundu tomak neʼebé hakruʼuk an ba Reinu neʼe.

Sira halibur haleʼu ema restu, restu neʼe maka sira neʼebé iha esperansa atu bá lalehan atu ukun hamutuk ho Kristu.

Sira simu hahán espirituál liuhusi Maromak nia organizasaun.—Mateus 24:45-47.

Sira maun-alin Kristaun iha mundu tomak neʼebé hadomi malu tebes.—Joao 13:35.

Sira haksolok ho dame iha laran, no iha esperansa ida ba futuru.—Filipe 4:7.

Lakleur tan, haklaken kona-ba lia-foun diʼak sei ramata. Iha tempu neʼebá sei hatene ona ‘bibi-malae’ maka sé. Depois saida maka Reinu neʼe sei halo?

Ita hanoin-hetan ka lae, katak Liurai David, neʼebé laran-metin, manán inimigu hotu neʼebé kontra Maromak nia povu? Nuneʼe mós, Jesus sei halo hanesan.

Loron ida Liurai Nabucodonosor mehi kona-ba estátua boot ida, neʼebé reprezenta nasaun boot hotu neʼebé ukun iha mundu husi ninia tempu toʼo ita-nian.

Depois nia haree fatuk ida neʼebé baku sai husi foho ida, no harahun hotu estátua neʼe. Fatuk neʼe reprezenta Maromak nia Reinu.

Ida-neʼe signifika katak sistema aat neʼebé laʼo daudaun neʼe sei sobu tiha.—Daniel 2:44.

Buat balu neʼebé Reinu neʼe sei halakon maka tuirmai neʼe.

Relijiaun falsu sei lakon, hanesan fatuk dulas neʼebé soi tiha ba tasi laran.—Apokalipse [Wahyu] 18:21.

Tanba ida-neʼe mak ema hotu neʼebé hadomi Maromak tenke sai husi relijiaun falsu AGORA.—Apokalipse [Wahyu] 18:4.

Depois Liurai Jesus sei “oho gentiu sira . . . ukun sira ho oe besi nian”.—Apokalipse [Wahyu] 19:15.

Tan neʼe, Testemuña ba Jeová, maski sira selu impostu no halo tuir lei husi sira-nia rai, sira la mete ho polítika.

Ikusliu, Satanás rasik, “samea boot”, sei soe tiha ba rai-kuak laiha rohan.—Apokalipse [Wahyu] 20:2, 3.

‘Bibi-malae’ deʼit, ema sira neʼebé hakruʼuk an ba Jesus nuʼudar Liurai, maka sei moris liu susar boot neʼe.—Mateus 25:31-34, 41, 46.

Apóstolu João haree vizaun ida kona-ba ‘bibi-malae’ neʼebé sei moris liu susar boot neʼe.

‘Neʼe hotu tiha, haʼu hare ema lubun boot ida, sura la bele, housi nasaun, rasa, uma-kain no lia hot-hotu; sira hamriik iha kadunan no Bibi Oan sira-nia oin, hatais ho unuk mutin hodi kaer ai-tahan iha sira nia liman.’—Apokalipse [Wahyu] 7:9.

“Ema lubun boot” neʼe maka sira hotu neʼebé simu ho diʼak haklaken kona-ba lia-foun diʼak.

Sira liu “terus makaʼas”, ka susar boot.—Apokalipse [Wahyu] 7:14.

“Ai-tahan” hatudu katak sira simu Jesus nuʼudar sira-nia Liurai.

Sira “hatais ho unuk mutin” hatudu katak sira fiar ba Jesus nia sakrifísiu.

“Bibi Oan” maka Jesus Kristu.

Depois, bensaun saida deʼit maka sira simu? Ita hanoin-hetan oinsá Israel kontente bainhira Liurai Salomão, neʼebé laran-metin, ukun? Ida-neʼe hatudu iha dalan kiʼik ida haksolok neʼebé sei mosu iha Liurai Jesus nia okos.

Sei iha dame tebes iha ema nia leet iha Rai no entre ema no animál sira, hanesan deʼit Isaías hateten nanis.—Salmo [Mazmur] 46:9; Isaías 11:6-9.

Hanesan Jesus kura ema moras kuandu nia iha Rai, nuneʼe mós nia sei halakon moras husi ema hotu iha Rai. —Isaías 33:24.

Hanesan nia fó-han ema-lubun boot, nuneʼe mós nia sei halakon hamlaha husi ema hotu iha Rai.—Salmo [Mazmur] 72:16.

Hanesan nia halo ema mate moris fali, nuneʼe mós nia sei halo moris fali ema mate sira neʼebé la iha oportunidade atu hakruʼuk an ba Maromak nia Reinu.—Joao 5:28, 29.

Neineik-neineik, nia sei lori ema fali ba moris perfeitu neʼebé Adão lakon.

Futuru neʼe furak ka lae? Ita hakarak hetan ida-neʼe ka lae? Se nuneʼe, hakaʼas an atu bele hakruʼuk an agora ba Maromak nia Reinu no sai ‘bibi-malae’ ida.

Estuda Bíblia bá, no koñese didiʼak Maromak Jeová no Jesus Kristu.—Joao 17:3.

Halibur hamutuk ho sira seluk neʼebé mós hakruʼuk an ba Reinu neʼe.—Ebreu [Ibrani] 10:25.

Aprende Reinu nia lei sira no halo tuir.—Isaías 2:3, 4.

Dedika Ita-nia moris atu serbí Jeová, no hetan batizmu.—Mateus 28:19, 20.

Hadook an husi buat neʼebé aat, hanesan naʼok, bosok, imoralidade, no hemu-lanu, neʼebé la halo kontente Maromak Jeová.—1 Korinto 6:9-11.

Hola parte iha serbisu haklaken kona-ba lia-foun diʼak Reinu nian.—Mateus 24:14.

Depois, ho Maromak nia ajuda, Ita sei haree Paraízu neʼebé Adão halakon ba ninia bei-oan sira mosu fali, no Ita sei haree promesa neʼe sai loos: “Haʼu rona lia makaʼas ida hakilar housi kadunan dehan, ‘O hare sidade neʼe? Neʼe mak Maromak nia horik fatin iha ema sira leet. Nia sei halo nia uma iha sira leet; sira sei sai nia povu no Nia sei hela ho sira no sai sira nia Maromak. Nia sei hamaran sira nia mataben housi sira nia matan; mate la iha ona, no ema sei la tanis tan eh laran susar, basa sasan raiklaran uluk nian liu tiha ona.’”—Apokalipse [Wahyu] 21:3, 4.

[Tabela iha pájina 20]

(Atu hetan formatu kompletu, haree livru)

607 AK 1914 DK

AK | DK

500 1.000 1.500 2.000 2.520

[Dezeñu sira iha pájina 11]

Abraão

Isaac

Jacob

Judá

David

[ Dezeñu iha pájina 14]

144.000

[Dezeñu sira iha pájina 16]

Adão

Jesus