Moris iha mundu foun neʼebé hakmatek

Kuandu ita haree ba dezenhu neʼebé iha tratu ida-neʼe, ita sente oinsá? Laʼós ita-nia fuan hakarak loos atu hetan damen, ksolok, no rahun-kmanek hanesan ita haree daudauk iha-neʼe? Tebes nuneʼe duni. Maibé, ida-neʼe mehi, ka fantazia deʼit, atu fiar katak kondisaun sira neʼe sei mosu tebes duni iha rai?

Ema barak liu karik hanoin nuneʼe. Realidade iha tempu agora maka funu, krime, hamlaha, moras, tinan tuan ba daudauk—no sei barak tan. Maibé, iha razaun atu hetan esperansa. Haree hela ba loron aban-bainrua, Bíblia hateten kona-ba “lalehan foun sira no rai foun ida, neʼebé ita hein tuir [Maromak nia] promesa, no iha sira-neʼe justisa sei hela bá.”—2 Pedro 3:13; Isaías 65:17.

“Lalehan foun sira” no “rai foun” neʼe, tuir Bíblia, laʼós lalehan materiál no rai foun literál. Rai no lalehan fíziku halo perfeitu tiha ona, no Bíblia hatudu katak sira sei hela ba nafatin. (Salmu 89:36, 37; 104:5) “Rai foun” maka sei sai sosiedade husi ema loos neʼebé moris iha rai, no “lalehan foun sira” maka sei sai reinu lalehan nian neʼebé perfeitu, ou governu, neʼebé sei ukun sosiedade ema raik. Maibé, realista ka lae, atu fiar katak “rai foun ida”, ou mundu foun gloriozu neʼe, posivel?

Tan neʼe, mai konsidera lai faktu katak kondisaun ideál sira-neʼe, halo parte tiha ona iha Maromak nia propózitu orijinál ba rai neʼe. Nia tau kaben-naʼin umanu primeiru iha Paraízu raik Éden nian, no fó sira knaar maravilhozu: “Hafuan bá no sai barak hodi hakonu rai no sujeita nia.” (Gênesis 1:28) Loos, Maromak nia propózitu maka sira atu iha oan sira no ikusmai habelar sira-nia Paraízu ba mundu tomak. Maski depois sira hili hodi la halo tuir Maromak, nuneʼe fó-prova sira la merese atu hetan moris rohan laek, Maromak nia propózitu orijinál la muda. No tenke kumpre iha mundu foun ida!—Isaías 55:11.

Loloos neʼe, kuandu ita harohan Ami Aman, husu hela atu Maromak nia Reinu mai, ita husu ba nia governu lalehan nian atu hamoos buat aʼat sira husi rai no ukun ba mundu foun neʼe. (Mateus 6:9, 10) No ita bele konfia katak Maromak sei hatán orasaun neʼe, tan nia Liafuan promete: “Ema loos sira rasik sei soi rai, no sira sei horik hosi nia ba nafatin.”—Salmu 37:29.

Moris iha Maromak nia Mundu Foun

Maromak nia Reinu sei lori benefísiu raik sira neʼebé la iha komparasaun, sei halo buat hotu sai diʼak nuʼudar Maromak nia hakarak uluk ba nia povu atu desfruta, ou goza iha rai. Ódiu no prekonseitu sei mohu, no ikusmai ema hotu iha rai sei sai belun loos ba malu. Iha Bíblia, Maromak promete katak nia sei ‘halo mohu tiha funu sira toʼo rai nia rohan.’ “Nasaun sei la hiʼit surik hasoru nasaun, no sira sei la aprende funu tan.”—Salmu 46:9; Isaías 2:4.

Ikusmai, rai tomak sei halo sai paraízu ida hanesan jardín. Bíblia hateten: “Rai-fuik no rai-rohan maran sei moʼo, no rai-henek tetuk sei haksolok no funan hanesan asafraun. . . . Basá iha rai-fuik bee sira sei naksuli, no bee-halai iha rai-henek tetuk. No rai neʼebé maran-dekor sei sai debun ho fafulu, no rai hamrook sei sai bee-ulun sira.”—Isaías 35:1, 6, 7.

Sei iha razaun hotu atu haksolok iha rai nuʼudar Paraízu. Nunka tan ema sei hamlaha tanba falta hahán. “Rai rasik sei fó duni ninia produsaun,” Bíblia hateten. (Salmu 67:6; 72:16) Ema hotu sei desfruta, ou goza rezultadu husi sira-nia serbisu rasik, nuʼudar ita-nia Kriadór promete: “Sira sei kuda toʼos-uvas no han nia fuan sira. . . . sira sei la kuda no ema seluk maka han.”—Isaías 65:21, 22.

Iha Maromak nia mundu foun, la iha tan ema neʼebé hela habutuk iha uma-apartamentu boot sira ou hela iha uma aat kiʼik sira, basá Maromak hakarak tiha ona: “Sira sei harii duni uma sira no iha okupasaun . . . Sira sei la harii no ema seluk mak okupa.” Bíblia mós promete: “Sira sei la labuta saugati deʼit.” (Isaías 65:21-23) Nuneʼe, ema sei iha serbisu neʼebé produtivu no halo kontente. Moris sei la baruk.

Toʼo nia tempu, Maromak nia Reinu até sei hafoun fali relasaun sira hakmatek neʼebé iha ona iha jardín Éden nian entre animál sira, no entre animál sira ho umanu sira. Bíblia hateten: “Asu-fuik, tuir loloos, sei horik tempu oituan ho bibi-malae mane-oan, no busa-leopardu rasik sei latan ho bibi-oan, no karau-vaka oan no liaun foin-saʼe no animál bokur sira, hotu hamutuk; no labarik-oan mane kiʼik ida maka sei sai sira-nia naʼi-ulun.”—Isaías 11:6-9; Oséias 2:18.

Haree-toʼok, iha Paraízu iha rai moras hotu no defisiénsia sira isin nian mós sei hetan kura! Maromak nia Liafuan asegura ita: “La iha mahorik ida sei dehan: ‘Haʼu moras.’” (Isaías 33:24) “[Maromak] sei hamaran sira-nia matan-been husi sira-nia matan, no mate sei la iha tan ona, no mós tanis, no hakilar, no moras sei la iha tan ona. Buat sira neʼebé mak uluk, liu tiha ona.”—Revelasaun [Apokalipse] 21:4.

Oinsá Ita bele Hetan Ida-ne’e

Tebes duni, Maromak nia promesa sira kona-ba moris iha mundu foun neʼebé iha justisa, tenke book ita. No enkuantu ema balu hanoin katak diʼak demais ona atu halo mosu bensaun sira hanesan neʼe, buat sira neʼe laʼos diʼak demais liu atu mai husi ita-nia Kriadór domin-naʼin nia liman.—Salmu 145:16; Miquéias 4:4.

Loos duni, iha rekizitu sira atu halo-tuir se ita hakarak hetan moris ba nafatin iha Paraízu atu mai iha rai. Jesus hatudu rekizitu prinsipál ida, kuandu nia hateten iha orasaun ba Maromak: “Neʼe katak moris rohan laʼek, sira foti konhesimentu kona-ba ita, Maromak loos mesak deʼit, no ema ida neʼebé ita haruka bá, Jesus Kristu.”—João 17:3.

Tan neʼe, se ita hakarak tebes duni atu moris iha Maromak nia mundu foun, ita tenke primeiru aprende Maromak nia hakarak i depois halo tuir. Basá iha faktu katak: “Mundu neʼe liu daudauk no mós ninia hakarak, maibé, nia neʼebé halo Maromak nia hakarak hela ba nafatin,” hodi desfruta ba nafatin bensaun sira atu haraik tun mai, husi ita-nia Kriadór domin-naʼin.—1 João 2:17.

Se la iha indikasaun seluk, sitasaun Bíblia nian hotu husi Tradusaun Mundu Foun nian husi Eskritura Sagrada sira iha lia-Inglés.