Iha ka lae Esperansa ba Sira neʼebé Mate?

Tinan barak liubá mane ida naran Job husu: “Se mane ida mate nia bele moris fali ka lae?” (Jó [Ayub] 14:14) Karik ita mós hanoin kona-ba neʼe. Ita sente oinsá se hatene katak loron ida ita bele hasoru fali ita-nia família no belun sira, hodi hela hamutuk iha mundu neʼe, neʼebé furak no dame?

Tuir loloos, Bíblia promete: “Mate sira sei moris.” No Bíblia mós dehan: “Ema loos rasik sei simu rai, no sira sei moris ba nafatin iha neʼebá.”​—Isaías (Yesaya) 26:19; Salmo (Mazmur) 37:29.

Atu bele tau fiar ba promete sira-neʼe, ita presiza hatene resposta ba pergunta sira tuirmai: Tanbasá mak ema mate? Ema mate bá neʼebé? Oinsá mak ita bele hatene duni katak sira sei moris fali?

Saida mak akontese kuandu ema mate?

Bíblia esplika ho klaru katak kuandu Maromak kria ema, nia lakohi atu sira mate. Nia kria ema primeiru, Adão no Eva, no tau sira iha rai, iha jardín furak naran Eden. Nia haruka sira atu iha oan barak no atu haluan sira-nia jardín toʼo mundu tomak. Maromak dehan katak sira sei mate só deʼit kuandu sira la halo tuir nia ukun-fuan sira.​—Gênesis (Kejadian) 1:28; 2:15-17.

Maibé, Adão no Eva la hafolin Maromak nia laran-diʼak. Sira la halo tuir Maromak no tan neʼe hetan kastigu-mate. Maromak dehan ba Adão: ‘Ó sei fila fali ba rai, tan husi rai mak haʼu foti ó. Tan ó rai-rahun no ó sei fila fali ba rai-rahun.’ (Gênesis 3:19) Antes Maromak kria Adão, Adão la iha. Nia mai husi rai-rahun deʼit. Tanba Adão halo sala, hodi la halo tuir Maromak, nia hetan kastigu-mate atu fila fali ba rai-rahun, neʼe katak nia la iha tan.

Entaun, kuandu ema mate, neʼe katak nia la moris tan. Bíblia esplika tan kona-ba neʼe hodi dehan: “Basá sala nia kolen mak mate, maibé Maromak nia prezente mak moris rohan-laek.” (Roma 6:23) Bíblia mós hatudu katak kuandu ema mate, sira la sente buat ida. Bíblia dehan: “Ema neʼebé moris hatene katak sira sei mate; maibé ema neʼebé mate ona, sira la hatene buat ida.”​—Eclesiastes (Pengkhotbah) 9:5.

Maibé, karik ema balu husu: ‘Kuandu ema mate, sira iha klamar neʼebé moris ba nafatin, loos ka lae?’ Ema barak hanorin hanesan neʼe hodi dehan katak kuandu ema mate, sira-nia klamar sai hodi moris fali iha fatin seluk. Maibé, hanorin neʼe la mai husi Bíblia. Kuandu ema mate, Bíblia esplika: “Nia iis kotu, nia fila fali ba rai; iha loron neʼe kedas ninia hanoin hotu lakon.” (Salmo 146:3, 4.) Entaun, se ema neʼebé mate la hatene no la hanoin buat ida, klaru katak nia la iha klamar hodi moris iha fatin seluk. Sin, nia la iha tan.

Maibé, se Adão no Eva deʼit mak la halo tuir Maromak nia ukun-fuan iha jardín Eden, tanbasá mak ema hotu mate? Ida-neʼe tanba ita hotu moris mai depois Adão la halo tuir Maromak, no tan neʼe Adão hadaʼet sala no mate ba ita hotu. Ida-neʼe hanesan Bíblia esplika: “Husi ema ida deʼit [Adão] mak sala tama iha mundu, no tan sala, mate; nuneʼe mate toʼo ba ema hotu.”​—Roma 5:12; Jó 14:4.

Ema mate bele moris fali

Depois Adão halo sala no lori mate ba ema hotu, Maromak fó sai ninia hakarak atu fó moris-hiʼas ba sira neʼebé mate. Tan neʼe, Bíblia dehan: “Abraão . . . laran-metin katak Maromak iha kbiit atu halo ema mate moris hiʼas fali.” (Ebreu 11:17-19) Sin, Abraão iha fiar neʼebé loos, tanba Bíblia dehan: ‘Maromak laʼós matebian sira-nia Maromak, maibé ema moris sira-nian; basá ba Naʼi, ema hotu moris hela.’​—Lucas 20:37, 38.

Maromak Forsa Boot Liu Hotu laʼós deʼit iha kbiit atu fó moris-hiʼas ba sira neʼebé mate, maibé nia mós iha hakarak atu halo ida-neʼe. Jesus Kristu rasik hatete: “Imi keta hakfodak ho buat neʼe, basá oras toʼo daudaun wainhira sira hotu neʼebé iha rate laran sei rona nia lia, no sira . . . sei saʼe ba moris-hiʼas moris nian.”​—Joao 5:28, 29; Apostolu 24:15.

Lakleur depois Jesus hatete liafuan sira-neʼe, nia hasoru ema-lubun sai husi sidade ida naran Nain iha Israel. Sira lori daudaun mate ida hodi bá hakoi. Ema mate neʼe mak mane-joven, feto-faluk ida nia oan-mane mesak. Kuandu Jesus haree feto neʼe triste tebes, Jesus sente hanoin tebes. Tan neʼe nia koʼalia ba mate-isin neʼe, dehan: “Klosan, haʼu dehan ba ó, hamriik bá!” No mane neʼe tuur fali, no Jesus entrega nia ba ninia inan.​—Lucas 7:11-17.

Nuneʼe mós ema hetan ksolok boot kuandu Jesus vizita ema ida naran Jairo, neʼebé ulun-naʼin ba sinagoga ema judeu nian. Ninia oan-feto, neʼebé tinan 12, mate. Maibé, kuandu Jesus toʼo Jairo nia uma, nia hakbesik labarik neʼe no dehan: “Noi, hamriik bá!” No nia hamriik duni!​—Lucas 8:40-56.

Tempu balu liutiha, Jesus nia belun Lázaro mate. Kuandu Jesus bá Lázaro nia uma, Lázaro mate ona ba loron haat. Lázaro nia feton Marta sente triste tebes, maski nuneʼe nia fó sai ninia fiar ba Jesus hodi dehan: “Haʼu hatene katak nia sei moris hiʼas iha loron ikus.” Tuirmai Jesus laʼo ba Lázaro nia rate-fatin no haruka ema atu hasai fatuk neʼebé taka ninia rate, no nia bolu: “Lázaro, sai mai liʼur!” No nia sai duni!​—Joao 11:11-44.

Hanoin toʼok kona-ba pergunta tuirmai: Durante loron haat neʼebé Lázaro mate, nia bá neʼebé? Kuandu Jesus halo Lázaro moris hiʼas, Lázaro la dehan katak nia saʼe ba lalehan hodi moris kontente, ka bá infernu hodi hetan terus. Se karik ida-neʼe akontese nia sei fó sai loloos kona-ba neʼe. Maibé, Lázaro la sente buat ida, tanba nia mate no nia hein deʼit “moris hiʼas iha loron ikus”.

Tuir loloos, milagre sira neʼebé Jesus halo ajuda ema ba tempu uitoan, tanba sira hotu neʼebé nia halo moris-hiʼas ikusmai mate fali. Maibé, milagre neʼebé nia halo besik tinan 2.000 liubá hatudu katak Maromak nia kbiit bele halo duni sira neʼebé mate atu moris fali! Nuneʼe, liuhusi ninia milagre sira, Jesus hatudu ezemplu kona-ba buat neʼebé sei akontese ba ema kuandu Maromak ukun mundu neʼe.

Kuandu ema neʼebé ita hadomi mate

Maski karik ita fiar ba moris-hiʼas, maibé kuandu ema ida neʼebé ita hadomi mate, ita bele sente laran-triste tebes. Abraão fiar katak ninia feen sei moris fali. Maski nuneʼe, Bíblia dehan: “Abraão hakbesik hodi hakilar no tanis tanba Sara.” (Gênesis 23:2) No oinsá ho Jesus? Kuandu Lázaro mate Jesus sai “laran taridu tebetebes”, no tuirmai “Jesus tanis”. (Joao 11:33, 35) Buat sira-neʼe hatudu katak kuandu ema neʼebé ita hadomi mate, la sala atu ita tanis.

Kuandu labarik ida mate, tempu neʼe susar liu ba ninia inan. Tan neʼe, Bíblia fó sai kona-ba inan sira-nia laran-susar. (2 Reis [Raja-Raja] 4:27) Tempu neʼe mós susar ba labarik nia aman. Kuandu Liurai David nia oan-mane Absalão mate, David ho laran-triste dehan: “Oh, diʼak liu haʼu rasik mak mate duké ó, Absalão, haʼu-nia oan.”​—2 Samuel 18:33.

Maibé, tanba Ita fiar ba moris-hiʼas, Ita sei la sente triste demais. Hanesan Bíblia hatete: ‘Imi sei la laran-susar hanesan ema seluk neʼebé la iha esperansa.’ (1 Tesalonika 4:13) Maibé, hodi hakbesik ba Maromak liuhusi orasaun, Ita bele fiar ba Bíblia nia promete neʼebé dehan: ‘Nia rasik sei apoia Ita.’​—Salmo 55:22.

Se la iha informasaun kona-ba tradusaun Bíblia nian, eskritura husi parte iha Bíblia neʼebé hakerek iha lia-ebraiku foti husi Tradusaun Mundu Foun husi Eskritura Sagrada ho Referénsia(MF) iha lia-inglés; no eskritura husi parte iha Bíblia neʼebé hakerek iha lia-gregu foti husi Liafuan diak ba imi—segunda edisaun, hodi hakerek tuir ortografia ofisiál.