LISAUN 6
Iha esperansa ba ema neʼebé mate ona ka lae?
1. Saida mak liafuan diʼak kona-ba ema mate sira?
Bainhira Jesus toʼo iha ninia belun Lázaro nia uma iha Betánia besik Jeruzalein, Lázaro mate loron haat ona. Jesus, hamutuk ho Lázaro nia feton Marta no Maria, bá haree fatin neʼebé sira hakoi Lázaro. Lakleur, ema-lubun mós bá atu haree. Ita fiar duni katak Marta no Maria sente kontente tebetebes kuandu Jesus halo Lázaro moris hiʼas fali!—Lee João 11:21-24, 38-44.
Marta hatene ona liafuan diʼak kona-ba ema mate sira. Nia hatene katak Maromak Jeová sei halo ema mate moris hiʼas fali iha mundu neʼe.—Lee Job 14:14, 15.
2. Saida mak akontese kuandu ema mate?
Maromak hatete ba Adão: “Ó mak rai-rahun no ó sei fila fali ba rai-rahun.”—GÉNESIS 3:19.
Maromak Jeová kria ema husi rai-rahun. (Génesis 2:7; 3:19) Tan neʼe, ita la iha klamar neʼebé kontinua moris. Kuandu ita mate, ita-nia kakutak para, no ita-nia hanoin no sentimentu hotu la iha tan. Bainhira Lázaro moris hiʼas, nia la konta buat ida kona-ba oinsá nia sente kuandu nia mate, tanba ema neʼebé mate ona la hatene buat ida.—Lee Salmo 146:4; Eclesiastes 9:5, 6, 10.
Maromak fó-terus ba ema mate sira iha infernu ka lae? Bíblia hatete katak ema neʼebé mate ona la hatene buat ida. Tan neʼe, hanorin kona-ba infernu mak hanorin falsu neʼebé fó-sala ba Maromak kona-ba buat neʼebé nia nunka halo. Tuir loloos, Maromak nunka hanoin atu haterus ema iha ahi.—Lee Jeremias 7:31.
Haree vídeo Saida mak akontese kuandu ema mate?
3. Ema neʼebé mate ona bele koʼalia ho ita ka lae?
Bíblia hatete katak ema neʼebé mate ona labele koʼalia no labele rona. (Salmo 115:17) Maibé iha anju aat sira neʼebé dala ruma finje sai ema neʼebé mate ona hodi koʼalia ho ema. (2 Pedro 2:4) Jeová bandu ita labele koko koʼalia ho ema neʼebé mate ona.—Lee Deuteronómio 18:10, 11.
4. Sé deʼit mak sei moris hiʼas?
Iha futuru, ema rihun ba rihun neʼebé mate ona sei moris hiʼas iha mundu. Ema neʼebé hatudu hahalok la loos tanba la hatene Maromak, sira mós sei hetan moris-hiʼas.—Lee Apóstolu 24:15.
Sira neʼebé hetan moris-hiʼas sei iha oportunidade atu aprende lia-loos kona-ba Maromak no hatudu fiar ba Jesus hodi halo tuir nia. (Apokalipse 20:11-13) Sira neʼebé halo buat neʼebé diʼak sei haksolok ho moris ba nafatin iha mundu.—Lee João 5:28, 29.
5. Moris-hiʼas hatudu saida kona-ba Jeová?
Maromak haruka ninia Oan-Mane mate ba ita, no ida-neʼe loke dalan ba ema neʼebé mate ona atu hetan moris-hiʼas. Entaun, hanorin kona-ba moris-hiʼas hatudu sai Jeová nia domin no laran-diʼak. Kuandu ema mate sira moris hiʼas, Ita rasik hakarak atu hasoru sé?—Lee João 3:16; Roma 6:23.