LISAUN 29

Ema mate nia kondisaun mak oinsá?

Edisaun print

Ita lakon ona ema neʼebé Ita hadomi tanba mate ka lae? Neʼe halo Ita sente triste tebes, no karik Ita hanoin: ‘Ema mate nia kondisaun mak oinsá? Iha ka lae esperansa atu hasoru fali ema neʼebé mate ona?’ Iha lisaun neʼe no lisaun tuirmai, ita sei haree oinsá mak Bíblia nia hanorin bele halo ita sente kmaan.

1. Ema mate nia kondisaun mak oinsá?

Jesus kompara mate mak hanesan toba dukur loos. Oinsá mak mate kompara hanesan toba? Ema neʼebé toba dukur loos la hatene saida mak akontese iha ninia sorin-sorin. Ema neʼebé mate ona, nia la sente tan terus ka laran susar. Bíblia dehan: “Ema neʼebé mate ona la hatene buat ida.”—Lee Eclesiastes 9:5.

2. Benefísiu saida mak Ita hetan tanba hatene lia-loos kona-ba mate?

Ema barak taʼuk mate no taʼuk mós ema neʼebé mate ona! Maibé Ita bele sente kmaan hodi hatene saida mak Bíblia hanorin. Jesus hatete: “Lia-loos sei halo imi livre.” (João 8:32) La hanesan ho buat neʼebé relijiaun balu hatete, Bíblia la hanorin katak iha klamar neʼebé sai husi ema nia isin no kontinua moris. Tan neʼe bainhira ema ida mate, nia la sente tan terus. No mós, tanba ema mate la hatene buat ida, sira labele halo aat mai ita. Tan neʼe ita la presiza adora ema mate ka halo buat ruma ba sira atu sira la sai hirus ho ita. Ita mós la presiza halo orasaun ba sira.

Ema balu dehan katak sira bele komunika ho ema mate. Maibé neʼe la loos. Nuʼudar ita aprende daudaun ona, ema mate “la hatene buat ida”. Maski ema balu dehan sira komunika ho ema neʼebé mate ona, maibé tuir loloos sira komunika ho anju aat sira neʼebé halo sira-nia an hanesan ho ema neʼebé mate ona. Tan neʼe, hodi aprende lia-loos kona-ba mate bele proteje ita husi anju aat sira. Jeová lakohi ita atu koko komunika ho ema neʼebé mate ona tanba nia hatene katak kontaktu ho anju aat sira sei lori terus mai ita.—Lee Deuteronómio 18:10-12.

KEʼE KLEʼAN

Aprende liután Bíblia nia hanorin kona-ba mate, no hametin Ita-nia fiar ba Maromak domin nian neʼebé nunka fó-terus ba ema mate.

Mane ida no ninia oan-feto naʼin-rua tuur iha kadeira kuandu tuir funerál ba ninia feen nia mate. Belun no família haleʼu sira hodi fó kmaan ba sira.

3. Aprende lia-loos kona-ba ema mate nia kondisaun

Ema iha mundu neʼe iha fiar oioin kona-ba ema mate nia kondisaun. Klaru katak, laʼós sira hotu nia fiar mak loos.

Iha Ita-nia área, ema fiar saida kona-ba ema mate nia kondisaun?

Atu haree saida mak Bíblia hanorin, loke VÍDEO.

VÍDEO: Saida mak akontese kuandu ema mate?—Vídeo badak (1:19)

Dezeñu sira: Foto husi vídeo ‘Saida mak akontese kuandu ema mate?’—Vídeo badak.’ 1. Mate-isin iha kama ospitál nian. 2. Mane ida tuur dukur hela durante halo viajen ho komboiu.

Lee Eclesiastes 3:20, depois koʼalia hamutuk kona-ba pergunta tuirmai:

Tuir eskritura neʼe, ema mate nia kondisaun mak oinsá?
Ita iha klamar neʼebé kontinua moris bainhira ita mate ka lae?

Bíblia fó-hatene mai ita kona-ba Jesus nia belun Lázaro neʼebé mate. Nuʼudar ita lee João 11:11-14, haree Jesus kompara Lázaro nia kondisaun hanesan saida. Depois koʼalia hamutuk kona-ba pergunta tuirmai:

Jesus kompara mate mak hanesan saida?
Komparasaun neʼe hatudu saida mai ita kona-ba ema mate nia kondisaun?
Ita sente oinsá kona-ba Bíblia nia hanorin kona-ba mate?

4. Lia-loos kona-ba mate lori benefísiu mai ita

Hodi hatene lia-loos kona-ba mate, halo ita livre husi sentimentu taʼuk ba ema mate. Lee Eclesiastes 9:10, depois koʼalia hamutuk kona-ba pergunta tuirmai:

Ema mate bele halo aat mai ita ka lae?

Lia-loos husi Bíblia proteje ita husi hanorin falsu katak ita tenke adora ka halo orasaun ba ema neʼebé mate ona. Lee Isaias 8:19 no Apokalipse 4:11, depois koʼalia hamutuk kona-ba pergunta tuirmai:

Tuir Ita-nia hanoin, Jeová sente oinsá kuandu ema ida adora no husu ajuda husi ema neʼebé mate ona?

Dezeñu sira: Kostume sira atu hatudu respeitu ba ema neʼebé mate ona. 1. Mane ida hakneʼak no halo orasaun iha rate nia oin no hatuur hahán sira. 2. Mane naʼin-tolu dansa hodi uza roupa kostume. 3. Ema halo prosisaun uza máskara modelu ulun-ruin no lori ulun-ruin neʼebé boot atu reprezenta loron neʼebé ema neʼe mate. — Lia-loos kona-ba mate halo ita livre husi kostume sira neʼebé halo Jeová la kontente

5. Lia-loos kona-ba mate fó kmaan mai ita

Ema barak hanoin katak bainhira sira mate, sira sei simu kastigu tanba sira-nia hahalok uluk nian. Maibé ita sente kmaan tanba hatene katak ema neʼebé mate ona la sente tan susar, maski uluk nia iha hahalok neʼebé la diʼak. Lee Roma 6:7, depois koʼalia hamutuk kona-ba pergunta tuirmai:

Bíblia dehan katak bainhira ema ida mate nia sai livre ona husi ninia sala. Se nuneʼe, tuir Ita-nia hanoin ema neʼebé mate ona sei hetan susar tanba sala neʼebé uluk nia halo ka lae?

Kuandu ita koñese didiʼak Jeová, ita sei komprende katak Jeová sei nunka fó-terus ba ema neʼebé mate ona. Lee Deuteronómio 32:4 no 1 João 4:8, depois koʼalia hamutuk kona-ba pergunta tuirmai:

Maromak neʼebé iha hahalok hanesan temi iha eskritura sira-neʼe sei fó-terus ba ema neʼebé mate ona ka lae?
Lia-loos kona-ba mate halo Ita sente kmaan ka lae? Tanbasá?

EMA BALU DEHAN: “Haʼu taʼuk kuandu haʼu mate haʼu sei hetan terus.”