Ema mate nia klamar iha duni ka lae?

Iha duni kriatura sira neʼebé matan la haree, hanesan anju diʼak no anju aat! Maibé, ema mate nia klamar iha duni ka lae?

La iha. Maski tuir ema barak nia hanoin, bainhira ema ida mate, ninia klamar sei moris hela, maibé tuir realidade, neʼe laloos. Tanbasá mak ita bele fiar hanesan neʼe? Tanba Bíblia mak hatete. Bíblia mak liafuan husi Maromak loos mesak ida deʼit, naran Jeová. Maromak Jeová mak kria ita ema, nia deʼit mak bele fó sai lia-loos kona-ba saida mak akontese ba ita ema bainhira ita mate.—Salmo (Mazmur) 83:18; 2 Timóteo 3:16.

Bíblia hatete katak Maromak kria ema primeiru, Adão, “husi rai-rahun”. (Gênesis [Kejadian] 2:7) Maromak tau nia iha jardín furak naran Eden. Se Adão nafatin halo tuir Maromak Jeová nia ukun-fuan, nia sei la mate no bele moris toʼo ohin loron. Maibé, Adão ho neon hili atu la halo tuir Maromak nia ukun-fuan. Tan neʼe, Maromak hatete ba nia: “Ó [sei] fila fali ba rai, tan husi rai mak haʼu foti ó. Tan ó mak rai-rahun no ó sei fila fali ba rai-rahun.”—Gênesis (Kejadian) 3:19.

Entaun, neʼe katak sá? Hanoin toʼok, Adão iha neʼebé antes Maromak Jeová kria nia husi rai-rahun? Nia seidauk iha. Nia laʼós anju ida neʼebé nakfila an ba ema. Nia mai husi rai deʼit. Tan neʼe, bainhira Maromak Jeová dehan Adão sei “fila fali ba rai”, neʼe katak Adão sei mate. Nia la iha klamar neʼebé sei moris hela. Bainhira Adão mate, nia la iha tan. Mate katak la iha moris tan.

Maibé, oinsá kona-ba sira seluk neʼebé mate tiha ona? Sira mós hanesan ho Adão ka lae? Bíblia fó resposta:

• “[Ema no animál] hotu sei bá fatin ida. Sira hotu mai husi rai-rahun, no sira hotu fila fali ba rai-rahun.”—Eclesiastes (Pengkhotbah) 3:20.

• “Ema neʼebé mate ona, sira la hatene buat ida.”—Eclesiastes (Pengkhotbah) 9:5.

• “Sira-nia domin no sira-nia ódiu no sira-nia laran-moras lakon hotu tiha.”—Eclesiastes (Pengkhotbah) 9:6.

• “La iha serbisu, ka planu, ka koñesimentu ka matenek iha rate, fatin neʼebé ó sei bá.”—Eclesiastes (Pengkhotbah) 9:10.

• “[Ema] fila fali ba rai; iha loron neʼe kedas ninia hanoin hotu lakon.”—Salmo (Mazmur) 146:4.

Liafuan husi eskritura hirak-neʼe halo ita hakfodak, loos ka lae? Karik susar ba Ita atu simu ida-neʼe. Maibé, hanoin toʼok: Baibain, mane mak proteje no buka osan atu tau matan ba ninia umakain. Tan neʼe, bainhira mane ida mate, ninia umakain bele hetan susar. Dala ruma feen no oan sira la iha osan atu sosa ai-han, ka ema seluk haterus sira. Agora, hanoin fali: ‘Se mane neʼe nia klamar sei moris hela, tansá mak nia la kontinua tau matan ba ninia umakain? Tanbasá mak nia la bele proteje ninia feen no oan husi ema aat sira?’ Tanba liafuan husi eskritura hirak-neʼe mak loos duni. Katak mane neʼe la iha tan, nuneʼe nia la bele halo buat ida.—Salmo (Mazmur) 115:17.

Ida-neʼe katak ema neʼebé mate ona sei nunka moris filafali ka lae? Lae. Iha lisaun ikus, ita mós sei koʼalia kona-ba tempu neʼebé sira sei moris filafali. Maibé buat neʼebé fó sai iha eskritura hirak-neʼe hatudu katak ema neʼebé mate ona la hatene tan buat ida. Sira la bele haree ita, rona ita, ka koʼalia ho ita. Ita la presiza taʼuk ba sira. Sira la bele ajuda ita, no mós la bele halo aat ba ita.—Eclesiastes (Pengkhotbah) 9:4; Isaías (Yesaya) 26:14.