Saida mak akontese kuandu ita mate?

Bíblia nia resposta

Bíblia hatete: “Ema neʼebé moris hela hatene katak sira sei mate, maibé ema neʼebé mate ona la hatene buat ida.” (Eclesiastes 9:5; Salmo 146:4) Tan ne’e, kuandu ita mate, ita la iha tan. Ema neʼebé mate ona labele hanoin buat ida, halo buat ruma ka sente buat ida.

“Ó sei fila fali ba rai-rahun”

Maromak esplika ba mane primeiru, Adão, kona-ba saida mak sei akontese kuandu ita mate. Adão la halo tuir Maromak, tan neʼe Maromak hatete ba nia: “Ó mak rai-rahun no ó sei fila fali ba rai-rahun.” (Génesis 3:19) Antes Maromak kria Adão “husi rai-rahun”, Adão la iha. (Génesis 2:7) Nuneʼe mós, bainhira Adão mate, nia fila fali ba rai-hun no la iha tan.

Buat neʼebé hanesan mós akontese ohin loron bainhira ema mate. Kona-ba ema no mós animál sira Bíblia hatete: “Sira hotu mai husi rai-rahun, no sira hotu fila fali ba rai-rahun.”​—Eclesiastes 3:19, 20.

Ema neʼebé mate iha esperansa

Bíblia kompara mate ho toba. (Salmo 13:3; João 11:11-14; Apóstolu 7:60) Ema neʼebé toba-dukur loos la hatene saida mak akontese iha ninia sorin-sorin. Nuneʼe mós ho ema neʼebé mate, nia la hatene buat ida. Maski nuneʼe, Bíblia hanorin katak Maromak bele fanu ema neʼebé toba iha mate no fó moris-hiʼas ba sira. (Job 14:13-15) Iha duni esperansa ba sira neʼebé Maromak atu fó moris-hiʼas, mate mak la’ós rohan ba buat hotu.