Anju aat sira dada ema atu kontra hasoru Maromak

Tanbasá mak Satanás ho ninia anju aat sira koko makaʼas atu lohi ema? Tanba sira hakarak dada ema hamutuk ho sira atu kontra hasoru Maromak. Anju aat sira hakarak ema adora sira. Sira hakarak ema fiar ba sira-nia lia-bosok no halo hahalok oioin neʼebé Maromak Jeová odi, hanesan halo lisan no kostume kona-ba ema mate.

Se ema neʼebé ita hadomi mate, ita sente triste tebes. Ida-neʼe normál no la sala atu hatudu laran-susar. Bainhira Jesus nia belun Lázaro mate, Jesus “tanis”.—João 11:35.

Iha mundu tomak, iha lisan oioin kona-ba ema mate. Lisan balu la kontra Bíblia nia matadalan. Maibé iha lisan no kostume balu neʼebé ema halo tanba sira fiar katak ema mate sira-nia klamar sei moris hela no bele haree ema neʼebé moris. Porezemplu, hadeer mate-uma, lelir ba ema mate, serimónia oioin neʼebé han tempu no gasta osan barak, ema halo ida-neʼe hotu tanba taʼuk ba matebian. Maibé Bíblia hatete katak ema mate sira “la hatene buat ida”, nuneʼe ema neʼebé halo buat hirak-neʼe apoia no habelar Satanás nia lia-bosok.—Eclesiastes (Pengkhotbah) 9:5.

Iha mós lisan no serimónia neʼebé ema halo tanba sira fiar katak ema neʼebé mate ona sei presiza nafatin ema moris nia ajuda, no se matebian sira la kontente, sira sei halo buat aat ba ema neʼebé moris. Porezemplu, hanesan ho ita-nia rai, iha rai barak mós, bainhira ema mate, ema sunu lilin, lutu metan, halo ai-funan moruk no midar, no halo kore metan. Buat hirak-neʼe hotu ema halo tanba sira fiar katak neʼe bele ajuda ema mate nia klamar hakmatek no bá lalehan. Buat seluk tan mak tau hahán ba matebian sira no lori ai-funan ba rate atu fó-han sira.

Buat hirak-neʼe laloos tanba apoia no habelar Satanás nia lia-bosok kona-ba ema mate. Se ita hola parte iha lisan no kostume hanesan neʼe, Maromak Jeová sente kontente ka lae? Lae duni!—2 Korinto 6:14-18.

Ema neʼebé hakarak halo Maromak kontente sei la hola parte iha buat hirak-neʼe neʼebé apoia Satanás nia lia-bosok. Duké halo ida-neʼe ba ema neʼebé mate tiha ona, diʼak liu hatudu domin loloos ba ema neʼebé sei moris hodi fó ita-nia tempu no forsa atu ajuda sira. Kona-ba ema neʼebé mate ona, Maromak Jeová deʼit mak bele ajuda sira.—Jó (Ayub) 14:14, 15.

Keta envolve an ho anju aat sira

Ema balu envolve an ho anju aat sira, porezemplu siʼik futuru, fekit ema, masonik, uza maninga ka sasán lulik, lori ai-abut ka ai-kulit, kura moras, lee liman, haree zodiak, ka koko atu koʼalia ho ema mate. Maski sira rasik mak halo ka bá hasoru matan-dook ka lia-naʼin ka asiste atividade sira-neʼe, buat hotu neʼe mak envolve an ho anju aat sira.

Bíblia bandu buat hirak-neʼe, hodi dehan: “Iha imi-nia leet, labele iha ema ruma neʼebé . . . uza sasiʼik, ema neʼebé uza masonik, ka ema ruma neʼebé buka sinál, ka matan-dook, ka ema neʼebé fekit ema seluk, ka ema ruma neʼebé bá hasoru matan-dook, ka siʼikdór kona-ba akontesimentu sira, ka ema ruma neʼebé husu ba ema mate. Tanba Jeová hakribi ema hotu neʼebé halo buat hirak-neʼe.”—Deuteronômio (Ulangan) 18:10-12.

Tanbasá mak Maromak Jeová bandu ita labele halo buat hirak-neʼe?

Tanba Maromak Jeová hanoin kona-ba ita-nia diʼak, nia fó avizu mai ita atu sees husi buat hotu neʼe. Nia hadomi no hanoin ita. Nia mós hatene katak ema neʼebé envolve an ho anju aat sira sei hetan terus.

Ezemplu iha rai-Brazíl, feto ida neʼebé uluk siʼikdór naran Nilda, hatete: “Anju aat sira . . . domina haʼu, kontrola haʼu iha buat hotu. Sira halo haʼu-nia moris namlele bá-mai, dala ruma haʼu dezmaia tiha, depois oin-moos fali. Tanba ema hanoin haʼu la normál, sira lori haʼu ba fatin moras mentál nian. Anju aat sira fó-terus demais haʼu toʼo estraga haʼu-nia neon. Haʼu hemu beibeik ai-moruk neʼebé bele halo haʼu-nia hanoin hakmatek. Haʼu komesa hemu tua toʼo lanu no fuma beibeik. Terus neʼe kontinua tinan ba tinan.”

Ikusmai, Nilda sai livre husi anju aat sira tanba hetan ajuda husi Maromak Jeová no ninia Testemuña sira. Agora nia moris hakmatek no haksolok. Nia hatutan tan: “Haʼu hakarak fó-hatene ba ema hotu. Keta envolve an ho anju aat sira, dala ida deʼit mós labele.”