Matan-dook nia atividade

Sala atu koko koʼalia ho ema neʼebé mate ona ka lae?

“Labele husu ajuda husi matan-dook sira . . . atu imi labele sai foʼer.”—Levítico (Imamat) 19:31.

BUAT NEʼEBÉ EMA HANOIN

Ema hakarak hatene katak sira-nia família ka belun neʼebé mate ona la terus. Entaun sira hanoin: ‘Ita bele koko atu koʼalia ho sira liuhusi matan-dook. Karik matan-dook neʼe bele fó informasaun ruma mai ita kona-ba família neʼebé mate ona no ida-neʼe bele halo ita sente kmaan.’

BUAT NEʼEBÉ BÍBLIA HANORIN

Bíblia fó ukun-fuan klaru kona-ba koko atu koʼalia ho ema mate sira. Iha tempu antigu mós ema toman atu halo ida-neʼe. Maromak Jeová nia Ukun-Fuan ba ema Izraél hatete: “Iha imi-nia leet, labele iha ema ruma . . . neʼebé bá hasoru matan-dook . . . ka ema ruma neʼebé husu ba ema mate. Tanba Jeová hakribi ema hotu neʼebé halo buat hirak-neʼe.” (Deuteronômio [Ulangan] 18:10-12) Bíblia mós hatete katak sira neʼebé halo matan-dook nia atividade naran deʼit sei “la simu Maromak nia Ukun nuʼudar liman-rohan”.—Galásia 5:19-21.

Ema neʼebé mate ona bele book ema sira neʼebé moris hela ka lae?

“Ema neʼebé moris hatene katak sira sei mate; maibé ema neʼebé mate ona, sira la hatene buat ida.”—Eclesiastes (Pengkhotbah) 9:5.

BUAT NEʼEBÉ EMA HANOIN

Ema barak dehan katak kuandu ema mate, iha parte ida husi ema mate neʼe neʼebé kontinua moris. Tan neʼe mak sira koko atu koʼalia ho ema neʼebé mate ona. Sira halo nuneʼe tanba sira hakarak hetan informasaun ruma husi ema mate neʼe ka halo nia kontente hodi nia la halo aat ba sira.

BUAT NEʼEBÉ BÍBLIA HANORIN

“Ema neʼebé moris hatene katak sira sei mate; maibé ema neʼebé mate ona, sira la hatene buat ida . . . Sira-nia domin no sira-nia ódiu no sira-nia laran-moras [buat neʼebé sira sente kuandu sira sei moris] lakon hotu tiha.” (Eclesiastes [Pengkhotbah] 9:5, 6) Sin, Bíblia hanorin katak ema sira neʼebé mate ona la bele hanoin, la bele halo buat ida, ka la bele adora Maromak. Eskritura iha Salmo (Mazmur) 115:17 hatete: “Ema neʼebé mate la bele hahiʼi [Maromak], nuneʼe mós sira neʼebé tun ba fatin hakmatek tanba mate.”

Tanbasá mak dala ruma matan-dook sira bele fó informasaun ruma neʼebé tebes?

“[Ema] tenke husu ba ema neʼebé mate ona kona-ba ema neʼebé moris hela ninia diʼak ka lae?”—Isaías (Yesaya) 8:19.

BUAT NEʼEBÉ EMA HANOIN

Ema balu dehan katak dala ruma, iha informasaun ruma neʼebé só deʼit ema mate neʼe, ninia família, ka kolega balu mak hatene, maibé matan-dook mós hatene informasaun neʼe.

BUAT NEʼEBÉ BÍBLIA HANORIN

Iha kapítulu 28 husi livru 1 Samuel konta oinsá liurai ida neʼebé la laran-metin ba Maromak naran Saul kontra Maromak nia ukun-fuan hodi bá hasoru matan-dook. Nia husu matan-dook feto neʼe atu koko koʼalia ho Maromak nia atan ida naran Samuel, no matan-dook neʼe dehan ba Saul katak Samuel koʼalia ho nia. Maibé Samuel koʼalia duni ho matan-dook neʼe ka lae? Lae. Tuir loloos, iha ida neʼebé hasara Samuel nia lian.

Sé mak neʼe? Neʼe mak Satanás nia anju aat ida. Bíblia hatete katak Satanás mak “lia-bosok nia aman”. (João 8:44) Tanbasá mak anju aat sira habelar lia-bosok katak ema mate sira sei moris hela? Tanba sira hakarak hafoʼer Maromak nia naran no halo ema la fiar Maromak nia Liafuan, Bíblia.—2 Timóteo 3:16.

Tanba ita la bele koʼalia ho ema sira neʼebé mate ona, ida-neʼe dehan katak ita la iha ona esperansa atu hasoru fali sira ka lae? Tuir loloos iha! Bíblia promete katak iha futuru Maromak sei halo moris hiʼas sira neʼebé mate ona.a (João 11:11-13; Apóstolu 24:15) Nuʼudar ita hein ba tempu neʼe, ita mós kontente atu hatene katak ema neʼebé ita hadomi neʼebé mate ona, sira la terus.