Oinsá mak haʼu bele tahan hasoru haʼu-nia laran-triste?

MIKE neʼebé ninia aman mate ona, hatete: “Haʼu sente katak haʼu tenke subar haʼu-nia sentimentu.” Tuir Mike, tahan netik laran-susar mak buat neʼebé mane sira presiza halo. Maibé, ikusmai nia komprende katak hanoin neʼe la loos. Entaun, kuandu Mike nia kolega nia avó mate, Mike hatene ona saida mak nia sei halo. Nia hatete: “Se ida-neʼe akontese iha tinan balu liubá, karik haʼu sei hatete ba nia: ‘Hatudu ó-nia an hanesan mane.’ Maibé, agora haʼu tau haʼu-nia liman iha nia kabaas no hatete: ‘Hatudu sai buat neʼebé ó sente tanba ida-neʼe sei ajuda ó. Se ó hakarak haʼu atu bá no husik ó mesak, haʼu sei halo ida-neʼe. Maibé se ó hakarak haʼu hamutuk ho ó, haʼu mós sei halo nuneʼe. Diʼak atu la taʼuk hodi fó sai buat neʼebé ó sente.’”

Kuandu MaryAnne nia laʼen mate, nia mós sente katak nia tenke subar ninia sentimentu. Nia hatete: “Maski tanis mak buat neʼebé normál deʼit, maibé tanba haʼu hanoin barak kona-ba oinsá atu sai nuʼudar ezemplu diʼak, haʼu hakaʼas an atu la tanis. Ikusmai haʼu komprende katak ida-neʼe la ajuda haʼu. Haʼu komesa hanoin kona-ba haʼu-nia situasaun no hatete ba haʼu-nia an: ‘Tanis bá se ó hakarak tanis. Keta obriga an atu subar ó-nia sentimentu. Hasai buat neʼebé ó sente iha ó-nia laran.’”

Entaun, Mike no MaryAnne nia liafuan hatudu katak: La sala atu sai triste! Buat neʼebé sira hanoin mak loos duni. Tanbasá? Tanba hatudu sai Ita-nia sentimentu bele halo Ita sente kmaan no ajuda Ita atu sai livre husi situasaun susar neʼebé Ita hasoru. Se Ita rekoñese no komprende katak triste mak buat neʼebé normál, ida-neʼe sei ajuda Ita atu iha hanoin neʼebé loos kona-ba Ita-nia triste kuandu ema ida mate.

Klaru katak, ema ida-idak hatudu sai sira-nia laran-triste iha dalan neʼebé la hanesan. No karik dalan neʼebé ema sai triste ba ema neʼebé mate derrepente deʼit la hanesan kuandu ema mate tanba hetan moras ba tempu kleur ona. Maibé, hanoin-hetan katak subar deʼit Ita-nia sentimentu bele estraga Ita-nia saúde no Ita-nia neon. Diʼak liu atu fó sai Ita-nia laran-triste. Oinsá? Bíblia iha konsellu diʼak barak neʼebé bele ajuda Ita.

Oinsá atu hatudu sai Ita-nia sentimentu?

Koʼalia sai buat neʼebé Ita sente bele halo Ita sente kmaan. Mane ida iha Bíblia laran naran Job, ninia oan naʼin-sanulu mate no nia mós hasoru susar oioin. Nia hatete: “Haʼu odi tebes haʼu-nia moris. Haʼu sei koʼalia sai haʼu-nia hanoin kona-ba haʼu-nia an rasik. Haʼu sei hasai haʼu-nia liafuan iha haʼu-nia susar sira! (Jó [Ayub] 1:2, 18, 19; 10:1) Job la bele ona atu tahan netik buat neʼebé nia sente. Nia presiza atu hasai ka koʼalia sai buat neʼebé nia sente. Ida-neʼe hanesan ho hakerek-naʼin ida kona-ba drama hatete: “Fó sai Ita-nia triste ho liafuan; tanba laran-susar neʼebé rai hela deʼit iha laran sei halo Ita kole.”

Entaun, koʼalia sai Ita-nia sentimentu ba “belun neʼebé loos” neʼebé sei rona didiʼak no hanoin Ita-nia situasaun bele ajuda Ita atu sente kmaan. (Provérbios [Amsal] 17:17) Dala barak kuandu Ita koʼalia sai ba ema kona-ba Ita-nia sentimentu, neʼe halo fasil liu ba Ita atu komprende no tahan hasoru ida-neʼe. Karik Ita bele hetan ajuda kona-ba oinsá atu tahan Ita-nia susar, se Ita koʼalia ba ema neʼebé iha ona esperiénsia atu tahan hasoru sira-nia sentimentu tanba ema neʼebé sira hadomi mate. Inan ida esplika katak kuandu nia oan mate, buat neʼebé ajuda nia mak nia koʼalia ba feto ida neʼebé mós hasoru situasaun hanesan. Nia hatete: “Hodi hatene katak ema ida hasoru ona situasaun neʼebé hanesan ho haʼu-nian, no manán ona ida-neʼe, no halaʼo fali ona moris hanesan baibain, ida-neʼe hametin tebes haʼu.”

Maibé oinsá se Ita sente ladún diʼak atu koʼalia sai Ita-nia sentimentu? Depois Saul no Jónatas mate, David halo knananuk halerik nian ida atu fó sai ninia laran-triste. Knananuk neʼe ikusmai sai parte ba livru Segundu Samuel neʼebé iha Bíblia laran. (2 Samuel 1:17-27; 2 Crônicas [Tawarikh] 35:25) Nuneʼe mós ema balu sente katak fasil liu ba sira atu hasai sira-nia sentimentu kuandu sira hakerek. Feto-faluk ida hatete katak nia hakerek buat neʼebé nia sente no loron balu depois neʼe, nia lee fali buat neʼebé nia hakerek. Nia sente katak ida-neʼe ajuda nia atu sai kmaan.

Sin, fó sai Ita-nia sentimentu, hodi koʼalia ba ema, ka hodi hakerek, bele ajuda Ita atu sente kmaan. No bele mós ajuda Ita atu hasees an husi problema seluk. Porezemplu, inan ida neʼebé lakon ninia oan hatete: “Haʼu no haʼu-nia laʼen rona kona-ba kaben-naʼin balu neʼebé soe malu depois sira-nia oan mate. Ami lakohi ida-neʼe atu akontese ba ami. Entaun kuandu ami sai hirus no hakarak atu duun malu, ami koʼalia ba malu hodi rezolve situasaun neʼe. Tanba ami halo ida-neʼe, haʼu sente katak ami-nia relasaun sai besik liu.” Hodi koʼalia sai Ita-nia sentimentu, neʼe bele ajuda Ita atu komprende katak ema ida-idak hatudu sai sira-nia sentimentu iha dalan la hanesan ho Ita-nian, maski Ita sente triste tanba razaun neʼebé hanesan.

Buat ida tan neʼebé bele halo Ita sente kmaan mak tanis. Bíblia hatete katak “iha tempu atu tanis”. (Eclesiastes [Pengkhotbah] 3:1, 4) Sin, kuandu ema neʼebé Ita hadomi mate, klaru katak ida-neʼe mak tempu atu tanis. Husik Ita-nia matan-been tun hodi hatudu sai Ita-nia laran-triste mak parte ida atu kura Ita-nia laran-kanek.

Joven feto ida esplika kona-ba oinsá ninia belun ajuda nia atu tahan kuandu ninia inan mate. Nia hatete: “Haʼu-nia belun sempre prontu atu ajuda haʼu. Nia tanis hamutuk ho haʼu. Nia koʼalia ho haʼu. Haʼu bele fó sai buat hotu neʼebé haʼu sente, no haʼu presiza duni ida-neʼe. Haʼu lalika sente moe atu tanis.” (Haree Roma 12:15.) Nuneʼe, Ita mós la presiza sente moe atu husik Ita-nia matan-been monu. Hanesan Ita haree tiha ona, Bíblia iha ezemplu barak kona-ba feto ka mane sira-neʼebé laran-metin, neʼe inklui mós Jesus. Sira husik sira-nia maten-been monu maski iha ema nia oin, no sira la sente moe kona-ba neʼe.—Gênesis (Kejadian) 50:3; 2 Samuel 1:11, 12; Joao 11:33, 35.

Maski nuneʼe, karik dala ruma Ita-nia matan-been monu derrepente deʼit. Feto-faluk ida sente katak hodi bá atu hola sasán iha loja bele halo nia tanis tanba neʼe mak buat neʼebé nia sempre halo ho nia laʼen. Ida-neʼe akontese liuliu kuandu, la ho neon nia foti sasán sira-neʼebé ninia laʼen gosta tebes. Se Ita mós hasoru situasaun hanesan neʼe, diʼak atu hatudu pasiénsia ba Ita-nia an. Hanoin-hetan katak tanis mak buat neʼebé normál deʼit, entaun keta sente katak Ita presiza atu tahan netik Ita-nia matan-been.

Saida mak Ita bele halo kuandu Ita fó-sala ba Ita-nia an?

Hanesan Ita haree tiha ona, ema balu fó-sala ba sira-nia an kuandu ema neʼebé sira hadomi mate. Karik Jacob mós sente hanesan neʼe kuandu ema halo nia fiar katak ninia oan José mate ona tanba “animál siʼak ida mak han tiha ona nia”. Jacob rasik mak haruka José atu bá haree ninia maun sira. Tan neʼe, karik Jacob sente katak nia halo sala neʼebé boot tebes no nia duun ninia an. Nia karik hanoin, ‘Tansá mak haʼu haruka José atu bá mesak? Tansá mak haʼu haruka nia bá fatin neʼebé nakonu ho animál fuik?’—Gênesis 37:33-35.

Karik Ita sente katak ema neʼebé Ita hadomi mate tanba buat ruma neʼebé Ita halo. Hodi hatene katak hanoin hanesan neʼe, la’ós buat neʼebé sala, maibé neʼe buat neʼebé normál kuandu Ita triste, ida-neʼe bele ajuda Ita atu sente kmaan. Dala ida tan, lalika hanoin atu subar deʼit Ita-nia sentimentu. Koʼalia sai kona-ba oinsá Ita sente sala, ida-neʼe bele halo Ita sente livre.

Hanoin-hetan katak, maski Ita hadomi tebes ema seluk, maibé Ita la iha kbiit atu kontrola sira-nia moris, ka atu hanetik sira husi buat neʼebé mosu tanba “tempu no akontesimentu neʼebé mosu derrepente deʼit”. (Eclesiastes 9:11) Liután neʼe, Ita lakohi atu lori susar ba ema neʼebé Ita hadomi. Porezemplu, hodi la lori ba doutór lalais, neʼe katak Ita hakarak sira atu sai moras no mate ka lae? Klaru katak lae! Se nuneʼe, sira mate tanba Ita-nia sala duni ka lae? Lae.

Inan ida fó-sala ba nia an kuandu ninia oan-feto mate tanba asidente karreta. Maibé neineik-neineik nia troka ninia hanoin neʼe. Nia esplika: “Haʼu fó-sala ba haʼu-nia an tanba haʼu mak haruka nia atu bá hamutuk ninia aman. Maibé ikusmai haʼu sente katak la loos atu hanoin hanesan neʼe. La sala atu haruka nia bá ho ninia aman. Buat neʼebé akontese mak asidente deʼit.”

Maibé karik Ita hatete: ‘Iha buat barak neʼebé haʼu hakarak atu hatete no halo ba nia.’ Karik neʼe loos, maibé iha mundu neʼe iha ema neʼebé sai nuʼudar aman, inan, ka oan neʼebé perfeitu ka lae? Bíblia fó-hanoin Ita hodi dehan: “Ita hotu halo sala barak; no ema ida la halo sala karik ho nia liafuan, ema neʼe ema loos duni.” (Tiago 3:2; Roma 5:12) Tan neʼe, diʼak atu simu realidade katak Ita mak ema sala-naʼin. Se Ita nafatin duun Ita-nia an, ida-neʼe sei la troka buat ida, maibé karik halo susar liu ba Ita atu sente kmaan fali.

Se Ita sente katak tanba duni Ita mak ema neʼebé Ita hadomi mate, diʼak atu hanoin kona-ba buat importante ida neʼebé bele halo Ita sente kmaan. Hanoin toʼok kona-ba oinsá Maromak sempre prontu atu fó perdua ba ema. Bíblia esplika mai Ita hodi dehan: “Se sala sira deʼit mak Ita haree, O Jah, O Jeová, sé mak bele tahan? Tanba Ita mak fó perdua neʼebé loos.” (Salmo [Mazmur] 130:3, 4) Tuir loloos, Ita la bele fila fali ba kotuk no troka buat ida. Maibé, buat neʼebé Ita bele halo mak husu perdua husi Maromak. Tuirmai, saida mak Ita presiza halo? Ita presiza prontu atu perdua Ita-nia an, tanba Maromak mós promete atu hamoos Ita-nia sala.—Provérbios 28:13; 1 Joao 1:9.

Saida mak Ita bele halo kuandu Ita sente hirus?

Dala ruma ema balu sente hirus kuandu ema neʼebé sira hadomi mate. Karik sira sente hirus ba doutór, enfermeiru, kolega, ka ba ema neʼebé mate ona. Maibé, hanoin-hetan katak hirus mak buat neʼebé normál kuandu Ita sente laran-kanek tanba ema ida mate. Hakerek-naʼin ida hatete: “Hodi rekoñese katak Ita hirus, neʼe bele ajuda Ita atu sai livre husi ninia rezultadu aat, maibé neʼe la dehan katak Ita tenke halo tuir deʼit Ita-nia hirus.”

Buat ida seluk neʼebé bele halo Ita sente kmaan mak keta subar Ita-nia laran-hirus. Entaun, oinsá mak Ita fó sai Ita-nia laran-hirus? Fó sai Ita-nia laran-hirus la dehan katak Ita sai hirus tebetebes toʼo la kontrola an. Bíblia fó avizu katak perigu atu kontinua hirus nafatin. (Provérbios 14:29, 30) Maibé neʼe katak koʼalia kona-ba Ita-nia laran-hirus ba belun neʼebé diʼak no ida-neʼe bele ajuda Ita atu sente kmaan. Ema balu seluk dehan katak kuandu sira sente hirus, sira halo buat ruma hanesan halo desportu, ida-neʼe mós ajuda sira.—Haree mós Efeso 4:25, 26.

Maski importante atu fó sai Ita-nia sentimentu, maibé Ita presiza kuidadu kuandu halo ida-neʼe. Tuir loloos, fó sai Ita-nia sentimentu la dehan katak Ita bele koʼalia sai buat neʼebé Ita sente hodi la hanoin ema seluk. Ita labele duun ema seluk tanba Ita sai hirus ka sai estrese. Sin, maski Ita bele koʼalia hodi fó sai buat neʼebé Ita sente, maibé la halo ida-neʼe iha dalan neʼebé la diʼak. (Provérbios 18:21) Iha buat ida neʼebé diʼak liu neʼebé bele ajuda Ita atu tahan hasoru Ita-nia laran-triste, no Ita sei koʼalia kona-ba neʼe.

Ajuda husi Maromak

Bíblia hatete: “Jeová besik ba sira neʼebé sente triste iha laran, no salva sira neʼebé laran-kraik.” (Salmo 34:18) Sin, liu fali buat hotu, relasaun neʼebé diʼak ho Maromak bele ajuda Ita atu tahan kuandu ema neʼebé Ita hadomi mate. Oinsá? Konsellu hotu neʼebé Ita haree ona, mai husi Maromak nia Liafuan, Bíblia. Halo tuir konsellu sira-neʼe bele ajuda Ita atu tahan.

Liután neʼe, keta sente katak orasaun ladún importante. Bíblia fó laran-manas ba Ita hodi dehan: “Soe ó-nia todan ba Jeová, no nia rasik sei apoia ó.” (Salmo 55:22) Klaru katak kuandu Ita koʼalia sai Ita-nia sentimentu ba Ita-nia belun diʼak, neʼe bele ajuda Ita atu sente kmaan. Se nuneʼe, oinsá liután se Ita fakar sai Ita-nia sentimentu ba “Aman laran-diʼak nian” hodi husu ninia ajuda?—2 Korinto 1:3.

Sin, orasaun bele halo Ita sente kmaan. Maibé la’ós neʼe deʼit, Maromak, Ida neʼebé “rona orasaun” promete atu fó ninia espíritu santu ba ninia atan sira-neʼebé husu ba nia. (Salmo 65:2; Lucas 11:13) No Maromak nia espíritu santu, ka nia forsa, bele fó ba Ita “kbiit makaʼas” neʼebé la hanesan baibain atu ajuda Ita hodi bele tahan Ita-nia laran-susar loron ba loron. (2 Korinto 4:7) Hanoin-hetan katak, Maromak bele ajuda ninia atan sira-neʼebé laran-metin ba nia atu tahan susar naran deʼit neʼebé sira hasoru.

Feto ida neʼebé nia oan mate ona, hanoin-hetan kona-ba oinsá orasaun ajuda nia no ninia laʼen atu tahan susar neʼebé sira hasoru. Nia esplika: “Kuandu ami iha uma iha kalan no sentimentu triste halo ami la bele tahan ona, ami halo orasaun hamutuk ho lian makaʼas. Dala primeiru neʼebé ami halo buat ruma la ho ami-nia oan, porezemplu, dala primeiru neʼebé ami tuir reuniaun la hamutuk ho nia, ami halo orasaun atu husu forsa husi Maromak atu bele tahan. Kuandu ami hadeer iha dadeer-saan no ami sente katak ami la bele simu realidade neʼebé iha, ami halo orasaun ba Maromak Jeová atu ajuda ami. La hatene tanbasá, maibé haʼu sente trauma atu tama uma laran mesamesak. Tan neʼe kuandu haʼu fila ba uma mesak, haʼu halo orasaun ba Maromak Jeová atu husu nia ajuda hodi haʼu bele kalma nafatin.” Feto neʼe laran-metin no fiar duni katak ninia orasaun sira-neʼebé nia halo ajuda duni nia. Karik Ita mós bele sente katak Maromak hatán ba Ita-nia orasaun neʼebé Ita hatoʼo beibeik no nia sei fó Ita ‘dame iha Ita-nia fuan no laran’.—Filipe 4:6, 7; Roma 12:12.

Sin, Maromak bele ajuda duni Ita atu sente kmaan. Apóstolu Paulo hatete katak Maromak “fó ksolok mai ita hotu iha ita-nia susar tomak atu ita bele konsola sira neʼebé iha susar laran”. Maski ajuda husi Maromak la halakon hotu Ita-nia laran-kanek, maibé karik ida-neʼe bele halo fasil ba Ita atu tahan. Neʼe la dehan katak Ita sei la tanis tan ka sei haluha tiha ema neʼebé Ita hadomi. Maski nuneʼe, neineik-neineik Ita bele sente kmaan fali. No ho esperiénsia neʼebé Ita hetan, ida-neʼe bele ajuda Ita atu komprende no hatudu laran-diʼak ba ema seluk neʼebé lakon ema neʼebé sira hadomi.—2 Korinto 1:4.