Lisaun 4
Sé maka Diabu?
Satanás, Diabu mai husi neʼebé? (1, 2)
Oinsá maka Satanás lohi ema? (3-7)
Tansá mak Ita tenke tahan hasoru Diabu? (7)
1. Liafuan “diabu” signifika ema ruma neʼebé koʼalia bosok kona-ba ema ida seluk. “Satanás” signifika inimigu ida ou hasoru-naʼin. Liafuan sira-neʼe mak aplika ba Maromak nia inimigu boot liu. Uluk, nia anju perfeitu ida iha lalehan hamutuk ho Maromak. Maibé depois, nia hanoin demais kona-ba nia an no hakarak ba nia an adorasaun neʼebé loloos Maromak nian. — Mateus 4:8-10.
2. Anju ida-neʼe, Satanás, koʼalia ba Eva liu husi samea ida. Hodi koʼalia bosok, Satanás lohi Eva atu la halo tuir Maromak. Hanesan neʼe maka Satanás ataka Maromak nia direitu atu ukun, ou Jeová nia pozisaun nuʼudar Maromak Aas Liu. Satanás hasaʼe dúvida kona-ba Maromak nia ukun, se Nia merese atu ukun iha dalan ida neʼebé fó buat diʼak ba Nia povu. Satanás mós hasaʼe dúvida se ema ruma iha Rai bele fó-laran nafatin ba Maromak. Hodi halo ida-neʼe, Satanás halo nia an sai Maromak nia inimigu. Tanba ida-neʼe maka nia hetan naran Satanás, Diabu. — Gênesis[Kejadian] 3:1-5; Jó[Ayub] 1:8-11; Apokalipse[Wahyu] 12:9.
3. Satanás koko atu habosok ema hodi adora nia. (2 Korinto 11:3, 14) Dalan ida neʼebé nia lohi ema maka liuhusi relijiaun falsu. Se relijiaun ida hanorin lia-bosok kona-ba Maromak, entaun loloos ida-neʼe serve ba buat Satanás hakarak halo. (Joao 8:44) Ema husi relijiaun falsu karik fiar ho laran-metin katak sira adora Maromak loos. Maibé tuir loloos sira serbí Satanás. Nia maka “maromak mundu neʼe nian”. — 2 Korinto 4:4.
4. Espiritizmu maka dalan ida seluk neʼebé Satanás uza atu domina ema. Sira karik hamulak ba espíritu balu atu proteje sira, atu halo aat ba ema seluk, atu siʼik kona-ba futuru, atu halo milagre. Satanás maka forsa aat iha hahalok sira-neʼe hotu nia kotuk. Atu halo kontente Maromak, ita tenkesér la mete ho buat espiritizmu nian. — Deuteronômio[Ulangan] 18:10-12; Apostolu[Kisah] 19:13, 18, 19.
5. Satanás mós lohi ema liuhusi foti-an demais liu tanba rasa no adora organizasaun polítika sira. Ema balu sente katak sira-nia nasaun ou rasa maka diʼak liu fali ema seluk nian. Maibé ida-neʼe la loos. (Apostolu[Kisah] 10:34, 35). Ema seluk fiar katak organizasaun polítika sira bele rezolve ema-nia problema. Hodi halo ida-neʼe, sira la simu Maromak nia Reinu. Reinu ida-neʼe maka solusaun mesak deʼit ba ita-nia problema sira. — Daniel 2:44.
6. Dalan ida seluk neʼebé Satanás lohi ema maka hodi tenta sira ho hakarak neʼebé sala. Jeová hateten mai ita atu sees an husi hahalok sala sira tanba nia hatene katak buat sira-neʼe sei halo aat mai ita. (Galasia 6:7, 8) Ema balu karik hakarak Ita atu hamutuk ho sira iha hahalok sira hanesan neʼe. Maibé, hanoin-hetan katak Satanás maka hakarak Ita atu halo buat hirak-neʼe. — 1 Korinto 6:9, 10; 15:33.
7. Satanás bele uza ema atu fó terus ba Ita ou kontra hasoru Ita hodi halo Ita husik Jeová. Karik ema balu, neʼebé Ita hadomi, hirus tebetebes tanba Ita estuda Bíblia. Ema seluk bele goza Ita. Maibé, sé maka fó Ita moris? Satanás hakarak hataʼuk Ita atu la aprende tan kona-ba Jeová. Keta husik Satanás manán! (Mateus 10:34-39; 1 Pedro 5:8, 9) Hodi tahan hasoru Diabu, Ita bele halo kontente Jeová no hatudu katak Ita defende Ninia direitu atu ukun. — Provérbios[Amsal] 27:11.
[Dezeñu sira iha pájina 9]
Relijiaun falsu, espiritizmu, no nasionalizmu lohi ema
[Dezeñu iha pájina 9]
Tahan hasoru Satanás hodi kontinua aprende kona-ba Jeová