Matan-moris bá Satanás hakarak han Ita!

1. Oinsá mak anju ida husik ninia an sai Satanás?

ULUK, iha anju ida neʼebé iha relasaun diʼak ho Jeová. Maibé, ikusmai, nia iha hakarak aat ida. Ninia hakarak mak atu ema hotu adora nia. Duké hamate kedas hakarak neʼe, nia hanoin beibeik hakarak neʼe toʼo ikus nia mós sai sala no kontra hasoru Jeová. (Tiago 1:14, 15) Anju neʼe mak ita bolu nuʼudar Satanás, ida neʼebé “la hamriik metin iha lia-loos” no “lia-bosok nia aman”.—João 8:44.

2, 3. Bíblia hanaran Jeová nia inimigu boot nuʼudar “Satanás”, “Diabu”, “samea” no “samea boot”, neʼe hatudu saida kona-ba anju aat neʼe?

² Husi tempu neʼebé Satanás kontra Jeová, nia sai hanesan inimigu nia ulun ba Maromak no mós ba ema. Ita bele hatene Satanás nia aat, liuhusi Bíblia. Naran Satanás iha arti katak “Kontradór”, neʼe hatudu katak nia kontra Maromak nia direitu atu ukun. Nia mós luta makaʼas no odi tebes Maromak nia ukun. Satanás nia hakarak mak atu haree Maromak la ukun tan kriatura hotu.

³ Apokalipse 12:9 fó naran seluk ba Satanás, naran neʼe mak Diabu, signifika katak “Bosok-Teen”. Nia dehan katak Jeová bosok, maibé tuir loloos neʼe mak ninia lia-bosok hodi halo ema fiar nia. Naran “samea uluk nian” halo ita hanoin fali tempu neʼebé nia uza samea hodi bosok Eva iha jardín Eden. Eskritura mós hanaran nia “samea boot”, neʼe tanba nia mak kriatura ida neʼebé laran-aat no siʼak tebes hanesan animál ida. Nia hakarak tebes atu estraga Maromak nia planu hotu no mós halakon Maromak nia povu tomak.

4. Lisaun neʼe sei koʼalia kona-ba saida?

⁴ Satanás mak ameasa boot tebes ba ita-nia laran-metin. Tan neʼe mak Bíblia fó avizu hanesan neʼe: “Sai matenek bá, no matan-moris bá. Imi-nia inimigu, katak Diabu, laʼo bá-mai hanesan leaun ida neʼebé hasai lian makaʼas no buka atu han ema ruma.” (1 Pedro 5:8) Iha lisaun neʼe ita sei koʼalia kona-ba Satanás nia hahalok tolu, no tansá mak ita tenke halo tuir avizu husi eskritura atu ita bele proteje ita-nia an husi Satanás.

SATANÁS FORSA BOOT TEBES

5, 6. (a) Ezemplu saida deʼit mak hatudu katak anju hotu “iha forsa boot”? (b) Iha dalan saida mak Satanás “iha kbiit atu halo mate”?

⁵ Anju hotu “iha forsa boot”. (Salmo [Mazmur] 103:20) La iha ema ida nia forsa ka matenek mak atu hanesan ho sira. Anju neʼebé diʼak uza sira-nia forsa atu halo buat neʼebé diʼak. Porezemplu, Jeová nia anju ida oho inimigu nia tropa husi Asíria hamutuk naʼin-185.000. Ema ida deʼit la iha forsa atu halo nuneʼe. Susar mós ba soldadu grupu ida atu halo hanesan neʼe. (2 Reis [Raja-Raja] 19:35) No dala ida mós anju ida uza ninia forsa hodi hasai Jesus nia apóstolu sira husi kadeia. Maski iha guarda barak hein metin, maibé anju neʼe loke kadeia nia odamatan hodi hasai apóstolu sira no taka fali odamatan sira-neʼe. Guarda ida mós la hatene!—Apóstolu 5:18-23.

⁶ Maibé Satanás la hanesan anju diʼak sira, nia uza ninia forsa atu halo buat aat no kontrola mundu tomak. Tan neʼe mak Bíblia bolu nia nuʼudar “ukun-naʼin mundu neʼe nian” ka “maromak mundu neʼe nian”. (João 12:31; 2 Korinto 4:4) Satanás mós “iha kbiit atu halo mate”. (Ebreu 2:14) Neʼe laʼós dehan katak nia rasik sempre oho ema. Maibé nia uza ninia kbiit atu book ema iha mundu tomak hodi haleno ninia hahalok atu ema odi ema no hamosu violénsia oioin. Nia mós uza ona ninia bosok hodi lohi Adão no Eva kontra Jeová hodi lori rezultadu sala no mate ba ema hotu. (Roma 5:12) Tan neʼe mak Jesus bolu nia “ohodór”. (João 8:44) Satanás mak inimigu forsa boot tebes!

7. Oinsá mak ita hatene katak anju aat sira forsa boot tebes?

⁷ Bainhira ita kontra hasoru Satanás, ita laʼós kontra nia mesak deʼit, ita mós kontra sira hotu neʼebé apoia nia. Neʼe inklui anju aat sira hotu. (Apokalipse 12:3, 4) Dala barak anju aat sira hatudu katak sira iha forsa boot tebes no sira uza forsa neʼe hodi haterus ema. (Mateus 8:28-32; Marcos 5:1-5) Diʼak atu sempre hanoin-hetan katak anju aat ho “sira-nia ukun-naʼin” forsa liu ita. (Mateus 9:34) Se la ho Jeová nia ajuda, la iha ida husi ita mak bele manán hasoru Satanás.

SATANÁS SIʼAK NO LARAN-AAT TEBES

8. (a) Satanás nia planu mak saida? (Haree dezeñu iha pájina 9.) (b) Tuir Ita rasik nia haree, oinsá mak mundu neʼe haleno Satanás nia hahalok siʼak neʼe?

⁸ Apóstolu Pedro kompara Satanás hanesan “leaun ida neʼebé hasai lian makaʼas”. Livru ida esplika katak liafuan “hasai lian makaʼas” iha lia-gregu iha signifika hanesan ho “animál fuik hamlaha nia lian”. Ida-neʼe hatudu duni Satanás nia hahalok siʼak. Maski nia kontrola tiha ona mundu tomak, maibé neʼe seidauk toʼo ba nia, Satanás hakarak atu han tan ema balu hanesan leaun hamlaha ida. (1 João 5:19) Ninia planu no ninia hakarak liuliu mak atu tolan hotu ema kose-mina iha rai no “bibi seluk”. (João 10:16; Apokalipse 12:17) Ita bele hatene ida-neʼe liuhusi terus neʼebé Jeová nia ema hetan husi apóstolu sira-nia tempu toʼo agora. Ida-neʼe hatudu duni katak Satanás siʼak no laran-aat tebes.

9, 10. (a) Iha dalan saida mak Satanás koko estraga nasaun Izraél? (Fó toʼok ezemplu.) (b) Tanbasá mak Satanás fokus liu atu hafoʼer ema Izraél antigu sira? (c) Tuir Ita-nia hanoin, Satanás sente oinsá se Jeová nia atan ida mak monu ba sala todan ida ohin loron?

⁹ Kuandu leaun ida hamlaha tebes, nia la hanoin ba buat neʼebé nia atu oho, no han hotu tiha mós nia la tanis hanoin ba buat neʼe. Satanás mós hanesan neʼe, nia la iha hanoin ba ema sira neʼebé nia koko atu han. Porezemplu, bainhira ema Izraél sira monu ba sala-foʼer hanesan buat neʼebé Zimri halo ka balu hatudu hahalok kaan-teen hanesan Geazi nian, neʼe halo Diabu Satanás sente kontente tebes.—Números (Bilangan) 25:6-8, 14, 15; 2 Reis (Raja-Raja) 5:20-27.

¹⁰ Satanás fokus liu ba ema Izraél iha tempu antigu tanba nia hatene katak Mesias sei mai husi nasaun Izraél. Mesias neʼe duni mak atu harahun nia hodi fó prova katak Jeová iha duni direitu atu ukun. (Gênesis [Kejadian] 3:15) Tan neʼe mak Satanás lakohi haree ema Izraél iha relasaun neʼebé diʼak ho Maromak no nia hakaʼas an tebes atu hafoʼer sira hodi Mesias la mai husi sira. Keta hanoin katak Satanás sente triste bainhira David monu ba sala-foʼer, ka nia hanoin tebes Moisés tanba Moisés la bele tama ba rai promete nian. Bainhira Satanás haree Maromak nia atan ida mak monu ba sala todan ida, neʼe halo nia kontente tebes. Dala ruma nia mós uza oportunidade hanesan neʼe atu koʼalia aat ka hamnasa Jeová.—Provérbios (Amsal) 27:11.

11. Tanbasá mak Satanás hakarak estraga Sara nia moris?

¹¹ Satanás odi tebes Mesias nia liña jerasaun. Ezemplu ida mak kona-ba Abraão. Maromak hatete ba nia katak nia sei sai “nasaun boot ida”. (Gênesis [Kejadian] 12:1-3) Bainhira nia no Sara hela iha Ejitu, Liurai Ejitu haruka ema lori Sara ba ninia uma atu sai ninia feen. Maibé Jeová proteje Sara husi situasaun susar neʼe. (Lee Gênesis [Kejadian] 12:14-20.a) Buat hanesan neʼe mós akontese dala ida tan iha sidade Gerar antes Isaac moris. (Gênesis [Kejadian] 20:1-7) Karik Satanás mak kria situasaun susar hanesan neʼe. Karik nia hanoin, Sara uluk hela iha sidade riku Ur no agora nia hela deʼit iha tenda laran, se hanesan neʼe, Liurai Ejitu no Abimélec nia palásiu furak sira bele halo Sara soe ninia laʼen no husik mós Jeová hodi tuir fali sira. Bíblia la koʼalia kona-ba razaun sira-neʼe, maibé ita bele fiar katak Diabu ho haksolok hakarak haree duni buat neʼe akontese ba Sara hodi nia la merese atu sai Mesias nia liña jerasaun nian. Satanás nunka sente triste atu haree Sara nia moris kaben, naran diʼak, no relasaun neʼebé diʼak ho Jeová atu sai aat, tanba Satanás mak hanesan neʼe duni, laran-aat no laran-metan!

12, 13. (a) Oinsá mak ita hatene katak Satanás siʼak no laran-aat husi tempu neʼebé Jesus foin moris? (b) Tuir Ita-nia hanoin, Satanás sente oinsá bainhira nia haree labarik sira hadomi no serbí Jeová ohin loron?

¹² Tinan atus hirak liutiha husi Abraão nia tempu, bebé Jesus mós moris. Bainhira haree bebé Jesus, Satanás sente ka lae katak bebé-oan neʼe bonitu, mutin no kabosu tebes, nia hakarak atu hakoʼak metin tebes bebé neʼe? Lae duni! Tanba nia hatene katak bebé neʼe mak aban-bainrua boot mai atu sai Mesias, nia mak Abraão nia bei-oan prinsipál, ida neʼebé “atu harahun Diabu nia serbisu hotu”. (1 João 3:8) Satanás iha hanoin ka lae katak atu oho bebé ida mak hahalok aat tebes? Lae, tanba nia lakohi hatene saida mak diʼak ka aat. Ninia hakarak mak atu oho lalais kedas labarik neʼe.

¹³ Sei hanoin-hetan Liurai Herodes bainhira nia rona husi ema siʼikdór sira katak “liurai judeu” nian moris ona, nia raan nakali tebes toʼo nia hakarak oho tiha bebé neʼe. (Mateus 2:1-3, 13) Tuirmai nia hasai orden ida hodi oho hotu labarik-mane sira husi tinan rua ba kraik iha distritu hotu iha Belein laran. (Lee Mateus 2:13-18.) Ikusmai, ema la konsege oho Jesus, maibé ita bele aprende saida kona-ba Satanás husi neʼe? Ita aprende katak Diabu la hafolin ema nia vida. Labarik nia moris mós nia la hanoin. Satanás mak “leaun” neʼebé siʼak no laran-aat tebes, keta hanoin katak nia mak anju laran-diʼak ida!

SATANÁS LOHIDÓR

14, 15. Satanás uza saida hodi taka ema fiar-laek sira-nia neon? Esplika toʼok.

¹⁴ Hodi lohi mak Satanás bele halo ema kontra hasoru Maromak neʼebé domin, Jeová. (1 João 4:8) Satanás mós uza lohi hodi halo ema la fó atensaun ba “Maromak nia matadalan” sira. (Mateus 5:3) Hodi nuneʼe mak nia bele taka ema fiar-laek sira-nia neon atu “sira labele haree nabilan glória nian husi liafuan diʼak kona-ba Kristu, ida neʼebé Maromak nia ilas”.—2 Korinto 4:4.

¹⁵ Satanás nia lohi boot liu hotu neʼebé nia uza hodi bosok ema mak relijiaun falsu. Diabu hatene katak Maromak hakarak ema adora nia mesak deʼit. (Êxodo [Keluaran] 20:5) Karik nia sente kontente tebes bainhira nia haree ema la adora Jeová, maibé fila kotuk bá adora fali beiʼala, ai, fatuk, ka animál sira. Triste mós ema barak hanoin katak sira-nia adorasaun mak loos maibé tuir loloos lae, tanba dalan neʼebé sira adora mak tuir hanorin neʼebé falsu. Sira halo daudauk buat neʼebé hanesan ema Izraél iha tempu uluk halo. Jeová hatete ba sira: “Tanbasá imi hasai osan hodi hola buat neʼebé laʼós paun, no tanbasá imi halo serbisu ba buat neʼebé la halo kontente? Rona didiʼak ba haʼu, no han ba buat neʼebé diʼak no husik ó-nia an hetan ksolok boot ho buat neʼebé bokur.”—Isaías (Yesaya) 55:2.

16, 17. (a) Tanbasá mak Jesus hatete ba Pedro: “Dook tiha husi haʼu, Satanás!”? (b) Oinsá mak Satanás bele lohi ita atu la matan-moris tan?

¹⁶ Jeová nia atan neʼebé badinas mós bele monu ba Satanás nia lasu. Porezemplu, bainhira Jesus hatete ba ninia dixípulu sira katak ninia oras toʼo ona ba ema atu oho nia, apóstolu Pedro ho laran diʼak dada Jesus sees tiha ba sorin no dehan mesak-mesak ba Jesus: “Naʼi, keta fó-malisan ba Ita-nia an. Susar sira-neʼe sei la kona Ita.” Maibé Jesus hatete ba nia: “Dook tiha husi haʼu, Satanás!” (Mateus 16:22, 23) Tanbasá mak Jesus bolu Pedro “Satanás”? Tanba Jesus hatene katak lakleur tan nia atu mate hodi kasu ema nia sala no hodi fó prova katak Diabu mak bosok-teen duni. Tempu neʼe mak tempu neʼebé importante liu hotu ba ema nia moris, neʼe laʼós tempu atu hanoin ba ninia an deʼit. Se Jesus mak hanoin katak susar neʼe sei la kona nia, neʼe sei halo Satanás kontente tebes tanba nia hakarak Jesus hanoin hanesan neʼe duni.

¹⁷ Mundu neʼe atu remata ona no Satanás mós hakarak ita hotu atu la fó atensaun katak ita moris daudaun iha tempu neʼebé urjente tebes. Nia hakarak ita atu preokupa ho buat mundu nian hodi ita la matan-moris tan. Keta husik buat hanesan neʼe akontese ba Ita! Tenkesér “matan-moris nafatin”. (Mateus 24:42) Ita la bele rona ba Satanás nia lia-bosok katak mundu nia rohan sei dook ka mundu nia rohan nunka mai.

18, 19. (a) Lia-bosok saida tan mak Satanás bele uza atu lohi ita? (b) Oinsá mak Jeová ajuda ita atu neon-moos no matan-moris nafatin?

¹⁸ Satanás mós uza dalan ida tan atu lohi ita. Nia hakarak lohi ita atu fiar katak Maromak la iha domin ba ita no se ita monu ba sala ruma, Maromak nunka fó perdua ita. Neʼe mak Satanás nia lia-bosok. Hanoin didiʼak toʼok, sé loos mak Jeová la hadomi? Sé loos mak Jeová nunka perdua ninia sala? Neʼe mak Satanás duni. Maibé ba ita, Bíblia hatete hanesan neʼe: “Maromak nunka hatudu hahalok aat hodi haluha imi-nia serbisu no imi-nia domin neʼebé imi hatudu ba ninia naran.” (Ebreu 6:10) Jeová hafolin ita-nia hakaʼas an no ita serbí nia laʼós saugati deʼit. (Lee 1 Korinto 15:58.) Tan neʼe, nunka husik Satanás uza ninia lia-bosok atu lohi ita.

¹⁹ Satanás iha duni forsa, siʼak no laran-aat, nia mós lohidór ida. Oinsá mak ita bele luta manán hasoru nia? Maromak Jeová la husik ita mesak deʼit atu luta hasoru inimigu ida-neʼe. Liuhusi ninia liafuan nia ajuda ita atu hatene Satanás nia dalan sira atu nuneʼe ita la bele monu ba “ninia lasu sira”. (2 Korinto 2:11) Se kuandu ita hatene ona Satanás nia lasu sira, neʼe bele ajuda ita neon-moos no matan-moris nafatin. Maibé hatene deʼit la toʼo, Bíblia mós haruka ita atu “kontra Diabu” hodi nia halai sees husi ita. (Tiago 4:7) Lisaun tuirmai sei koʼalia kona-ba dalan tolu neʼebé bele ajuda ita luta manán hasoru Satanás.