Domin uluk nian ba Jeová ajuda haʼu tahan susar sira

IHA 1970 haʼu foin tinan 20. Haʼu soldadu ida. Iha tempu neʼebá haʼu moras todan no latan hela iha ospitál ida iha Phoenixville, Pennsylvania, iha Estadus Unidus. Iha enfermeiru ida neʼebé idade boot liu haʼu, nia sempre mai koko haʼu-nia tensaun kada minutu 30. Nia estrese tebes tanba haʼu-nia tensaun tun beibeik. Haʼu husu ba nia, “Karik Ita nunka haree ema mate, loos ka lae?” Haʼu haree ninia oin kamutis kedas no nia hatán haʼu, “Sin, haʼu nunka.”

Iha momentu neʼe, haree hanesan haʼu la iha esperansa ona. Maibé, saida mak halo haʼu baixa iha ospitál neʼe? Haʼu sei konta istória neʼe.

DALA PRIMEIRU HAʼU HAREE FUNU

Moras neʼe kona haʼu bainhira haʼu serbisu hela iha sala operasaun nian iha rai-Vietname. Haʼu gosta ajuda ema moras ka ema kanek sira no haʼu-nia planu mak atu sai doutór ida. Haʼu tun Vietname iha fulan-Jullu tinan 1969. Durante semana ida, sira fó orientasaun ba haʼu atu haʼu bele sai toman iha neʼebá.

Iha tempu haʼu simu knaar atu serbisu iha ospitál iha Mekong Delta, iha Dong Tam, elikópteru tula ema barak neʼebé kanek mai. Tanba haʼu mak ema patriótiku ida no gosta tebes atu serbisu, entaun haʼu tun kedas ba ajuda. Sira lori ema kanek sira-neʼe hotu bá uma kontainer atu opera sira. Maski sala operasaun kiʼik no sena malu loos, maibé doutór ho enfermeiru sira hakaʼas an hodi salva sira-nia moris. Haʼu mós haree iha elikópteru laran iha plástiku metan boboot neʼebé sira la hatún. Ikusmai haʼu foin hatene katak plástiku sira-neʼe nakonu ho soldadu sira-nia liman-ain ka isin-lolon neʼebé morteiru hakotu iha funu laran. Neʼe mak dala primeiru haʼu haree funu.

HAʼU BUKA MAROMAK

Bainhira sei joven, haʼu rona ona uitoan kona-ba lia-loos neʼebé Testemuña ba Jeová sira hanorin. Haʼu gosta tuur ho amá bainhira nia estuda ho Testemuña sira, maibé nia la laʼo bá oin no nunka hetan batizmu. No loron ida haʼu ho haʼu-nia apá-hakiak, liu husi Reuniaun-Fatin ida no haʼu husu ba nia, “Neʼe fatin saida?” Nia dehan, “Keta besik ba ema sira-neʼe!” Tanba haʼu hadomi no fiar nia, entaun haʼu rona ba ninia konsellu neʼe. Husi neʼe mak haʼu la hasoru malu tan ho Testemuña sira.

Fila husi Vietname, haʼu sente katak haʼu presiza tebes Maromak iha haʼu-nia moris. Buat neʼebé akontese iha Vietname halo haʼu-nia sentimentu toos tiha. Haʼu sente ema ladún komprende saida mak akontese iha Vietname. Haʼu sei hanoin-hetan iha neʼebá ema halo demonstrasaun beibeik hakilar katak soldadu Amerikanu oho bebé, neʼe tanba iha telejornál fó sai katak labarik barak neʼebé la sala mós sira oho hotu iha funu laran.

Atu buka Maromak, haʼu bá tuir misa iha igreja oioin. Haʼu sempre iha domin ba Maromak maibé igreja sira halo haʼu la gosta sira-nia hahalok. Ikusmai, iha domingu ida, iha Fevereiru 1971 haʼu tuir reuniaun ida husi Testemuña sira nian iha Delray Beach, Florida.

Bainhira haʼu toʼo Reuniaun-Fatin, diskursu públiku besik ona remata, entaun haʼu tuir deʼit estudu Livru Haklaken nian. Haʼu haluha tiha ona tópiku ba Livru Haklaken neʼe, maibé haʼu sei hanoin-hetan momoos labarik sira iha neʼebá makaʼas tebes. Sira bele loke hetan eskritura hotu. Neʼe halo haʼu gaba duni sira. Tuirmai haʼu tuur hakmatek hodi rona no haree ema sira-neʼe. Reuniaun hotu tiha, haʼu foin atu fila, irmaun ida naran Jim Gardner, maizumenus tinan 80 hakbesik haʼu. Nia fó livru ida mai haʼu ho títulu The Truth That Leads to Eternal Life no nia husu haʼu, “Se ó hakarak livru neʼe, foti bá.” Ami mós halo arranju atu hasoru malu fali iha kinta dadeer hodi estuda Bíblia ba dala primeiru.

Iha domingu kalan neʼe haʼu presiza bá serbisu. Haʼu serbisu iha ospitál ida iha Boca Raton, Florida. Haʼu serbisu iha sala emerjénsia nian. Haʼu tama iha tuku 11 kalan no sai iha tuku 7 dadeer. Tanba kalan neʼe ema ladún barak, entaun haʼu konsege lee livru neʼebé haʼu simu. Iha enfermeira ida laʼo besik mai no hadau livru neʼe husi haʼu-nia liman. Nia haree livru nia kulit deʼit, nia hakilar haʼu, “Ó la hanoin atu tuir sira, loos ka lae?” Haʼu hadau fali livru neʼe no dehan ba nia, “Maski haʼu foin lee toʼo klaran deʼit, maibé haree hanesan haʼu hakarak atu tuir duni sira!” Enfermeira neʼe mós la farigadu tan haʼu no iha kalan neʼe kedas haʼu lee hotu livru neʼe.

Bainhira haʼu hasoru irmaun Gardner atu hahú estuda Bíblia, pergunta primeiru neʼebé haʼu husu ba nia mak, “Ita atu estuda saida?” Nia hatán, “Ita uza livru neʼebé uluk haʼu fó ba ó.” Haʼu hatete ba nia, “Livru neʼe haʼu lee hotu ona.” Irmaun Gardner hatán fali haʼu ho didiʼak, “Se nuneʼe, mai ita estuda deʼit kapítulu primeiru.” Estuda tiha mak haʼu foin hatene buat barak mak haʼu seidauk komprende. Nia haruka haʼu loke haʼu-nia Bíblia rasik hodi haree eskritura hotu. Ikusmai, haʼu aprende duni kona-ba Jeová, Maromak neʼebé loos. Haʼu gosta tebes irmaun Gardner, haʼu bolu nia Jim deʼit. Iha dadeer neʼe ami estuda hamutuk kapítulu tolu husi livru neʼe. Kinta-kinta mós hanesan, ami estuda kapítulu tolu-tolu. Haʼu gosta tebes estuda buat sira-neʼe. Haʼu sente haʼu iha priviléjiu boot tebes tanba irmaun kose-mina ida neʼebé koñese mós irmaun Charles T. Russell mak estuda Bíblia ho haʼu!

Semana balu liutiha, haʼu sai haklaken-naʼin ida. Jim mak ajuda tebes haʼu-nia moris, inklui oinsá atu haklaken husi uma ba uma. (Apóstolu 20:20) Serbisu hamutuk ho Jim halo haʼu gosta bá haklaken. Toʼo agora mós haʼu sente haklaken mak priviléjiu boot liu hotu. Haʼu kontente tebes atu sai Maromak nia maluk serbisu-naʼin!—1 Korinto 3:9.

DOMIN ULUK NIAN BA JEOVÁ

Agora haʼu hakarak konta ba imi kona-ba haʼu-nia domin uluk nian ba Jeová. (Apokalipse 2:4) Haʼu-nia domin ba Jeová mak ajuda haʼu tahan bainhira haʼu hanoin fali buat neʼebé uluk akontese iha funu no susar seluk tan neʼebé haʼu hasoru iha haʼu-nia moris.—Isaías (Yesaya) 65:17.

Haʼu sei hanoin-hetan loron ida iha 1971. Haʼu-nia apá-hakiak foin duni sai haʼu husi uma ida neʼebé uluk haʼu hela ba, tanba nia lakohi haree Testemuña ida sama ninia uma! Iha tempu neʼebá haʼu ladún iha osan. Ospitál semana rua mak selu haʼu dala ida, no osan sira neʼebé haʼu simu, haʼu gasta hotu ba sosa roupa atu haʼu bele reprezenta didiʼak Jeová bainhira bá haklaken. Haʼu rai duni osan uitoan, maibé haʼu rai iha banku ida iha Michigan, distritu ida neʼebé haʼu moris. Tan neʼe, haʼu presiza toba no hela iha haʼu-nia karreta laran deʼit ba loron balu. Haʼu koir hasarahun ka harús uza deʼit pertamina nia hariis-fatin.

Loron ida haʼu fila serbisu husi ospitál, haʼu bá tuir grupu haklaken nian iha Reuniaun-Fatin. Iha tempu neʼebá haʼu sei hela iha karreta laran. Tanba haʼu toʼo sedu uitoan, entaun haʼu tuur iha kotuk para ema la bele haree haʼu. Bainhira haʼu tuur iha neʼebá, haʼu hanoin fali kona-ba buat sira neʼebé akontese uluk iha Vietname, hanesan iis husi ema nia isin neʼebé ahi han motuk ona, ema nia raan fakar, no raan maten kafuʼak-kafuʼak sira, neʼe halo haʼu kosar lotuk sai. Toʼo agora haʼu sente hanesan haʼu bele rona hela ho momoos joven sira-nia lian belit metin iha haʼu-nia neon bainhira sira husu haʼu atu ajuda, sira husu, “Haʼu sei bele moris ka lae? Haʼu sei bele moris ka lae?” Tuir loloos iha tempu neʼebá haʼu hatene katak sira sei mate, maibé haʼu koko koʼalia hodi fó kmaan sira dehan, lae. Nuʼudar haʼu tuur hela iha Reuniaun-Fatin, haʼu-nia neon susar no triste tebes.

Iha tempu neʼe, haʼu komesa halo orasaun toʼo haʼu-nia matan-been suli. (Salmo [Mazmur] 56:8) Hahú husi neʼe, haʼu komesa hanoin kleʼan kona-ba esperansa moris-hiʼas, no neʼe mak dala primeiru haʼu komprende katak esperansa moris-hiʼas iha folin boot tebes. Tanba liuhusi moris-hiʼas mak Maromak Jeová atu halakon hotu susar no terus neʼebé haʼu haree iha ema seluk nia moris, no halo joven sira neʼebé uluk mate mós moris-hiʼas fali hodi sira bele iha oportunidade atu aprende kona-ba nia. (Apóstolu 24:15) Iha momentu neʼe, haʼu-nia laran sai nakonu ho domin ba Jeová. Haʼu nunka haluha loron neʼe. Komesa husi loron neʼe haʼu sempre hakaʼas an atu haʼu la bele lakon domin uluk nian ba Jeová, liuliu iha tempu neʼebé haʼu hasoru susar sira.

JEOVÁ DIʼAK TEBES MAI HAʼU

Iha funu, ema halo buat aat tebes no haʼu mós halo ona buat aat ba ema. Maibé iha eskritura rua mak ajuda haʼu atu hatene katak Jeová fó ona perdua ba buat sira neʼebé uluk haʼu halo iha funu. Eskritura primeiru mak Apokalipse 12:10, 11. Eskritura neʼe dehan katak ita bele manán Satanás, laʼós liuhusi haklaken deʼit, maibé mós liuhusi Jesus nia raan. Eskritura segundu mak Galásia 2:20. Husi eskritura neʼe haʼu komprende katak Kristu Jesus mate “ba haʼu”. Jeová la haree haʼu hanesan uluk ona, maibé nia perdua ona haʼu liuhusi Jesus nia raan. Komprende kona-ba buat sira-neʼe ajuda haʼu atu iha konxiénsia neʼebé moos no neʼe book haʼu atu hakaʼas an ajuda ema seluk hatene kona-ba lia-loos no ita-nia Maromak laran-sadiʼa, Jeová!—Ebreu 9:14.

Se haʼu haree fali ba haʼu-nia moris, haʼu haree duni katak Jeová mak sempre tau matan ba haʼu. Porezemplu, iha loron neʼebé Jim hatene katak haʼu toba deʼit iha karreta laran, nia arranja kedas haʼu hela iha irmán ida nia uma kos. Haʼu fiar duni katak Jeová mak uza Jim ho irmán neʼe hodi fó fatin ba haʼu atu hela. Jeová laran-diʼak tebes! Nia tau matan ba ninia atan sira neʼebé laran-metin ba nia.

APRENDE HAKLAKEN HO MATENEK

Iha fulan-Maiu 1971 haʼu presiza bá Michigan atu trata buat ruma. Antes atu arranka husi kongregasaun Delray Beach iha Florida, haʼu enxe nakonu haʼu-nia karreta kotuk ho livru sira. Haʼu para iha fatin oioin hodi haklaken ba ema, hanesan iha prizaun sira, no bainhira atu bá uza hariis-fatin, haʼu sempre fahe tratu sira ba ema. Toʼo tiha iha distritu Georgia no atu sai fali husi Georgia, haʼu fahe hotu ona livru sira neʼebé haʼu lori. Toʼo agora haʼu sei duvida nafatin, la hatene ema naʼin-hira mak hatene ona lia-loos liuhusi livru sira-neʼe.—1 Korinto 3:6, 7.

Haʼu hatete loloos deʼit katak bainhira haʼu foin aprende kona-ba lia-loos, haʼu ladún uza matenek, maibé koʼalia nakloke deʼit ba ema, liuliu ho haʼu-nia família sira. Domin ba Jeová hanesan ahi ida iha haʼu-nia laran, neʼe halo haʼu laran-manas tebes atu haklaken nakloke ba sira. Haʼu obriga haʼu-nia maun naʼin-rua John no Ron atu simu lia-loos tanba haʼu hadomi tebes sira. Ikusmai haʼu tenke husu deskulpa ba haʼu-nia hahalok neʼe. Maibé haʼu nunka para atu halo orasaun hodi sira hakarak simu lia-loos. Jeová hanorin duni haʼu no agora haʼu komprende oinsá atu bele haklaken ka hanorin Bíblia ba ema ho matenek.—Koloso 4:6.

DOMIN BA EMA SELUK

Iha haʼu-nia moris, haʼu mós iha domin ida seluk, neʼe mak haʼu-nia domin ba haʼu-nia feen Susan. Uluk haʼu hanoin se haʼu buka feen, haʼu hakarak buka mak ema ida neʼebé hakarak apoia haʼu-nia serbisu ba Jeová. Susan mak ema neʼebé hadomi Jeová. Haʼu sei hanoin-hetan loron ida, tempu ami namora hela, haʼu bá vizita nia. Nia tuur hela iha ninia apá-amá nia varanda iha Cranston, Rhode Island, lee hela Livru Haklaken no kaer hela Bíblia. Buat ida halo haʼu gosta nia mak maski nia lee halimar deʼit mós nia loke eskritura sira. Haʼu dehan ba haʼu-nia an, ‘Feto neʼe hadomi tebes Maromak pá!’ Ami kaben iha fulan-Dezembru 1971, no haʼu agradese tebes tanba komesa husi ami kaben, nia sempre iha haʼu-nia sorin hodi apoia no ajuda haʼu. Buat seluk tan neʼebé haʼu gosta kona-ba nia mak nia hadomi Jeová liu fali hadomi haʼu.

Haʼu ho Susan iha oan-mane rua naran Jesse no Paulo. Sira hadomi tebes Jeová, no nuʼudar sira sai boot, Jeová sempre hamutuk ho sira. (1 Samuel 3:19) Tanba sira rasik mós hadomi lia-loos, neʼe lori naran diʼak ba haʼu ho Susan. Sira bele kontinua atu adora Jeová tanba sira sempre hanoin kona-ba sira-nia domin uluk nian. Sira naʼin-rua serbí tempu-tomak ba tinan 20 liu ona. Haʼu mós gosta tebes sira-nia feen Stephanie no Racquel, haʼu haree sira hanesan haʼu-nia oan-feto rasik. Sira hadomi tebes Jeová ho sira-nia laran no moris tomak.—Éfeso 6:6.

Husi tempu haʼu hetan tiha batizmu, haʼu haklaken iha Rhode Island ba tinan 16. Iha neʼebá haʼu serbí hamutuk ho katuas kongregasaun barak neʼebé iha esperiénsia barak no haʼu aprende ezemplu diʼak barak husi katuas área nian. Haʼu sente neʼe mós priviléjiu boot mai haʼu hodi bele serbí ho irmaun sira neʼebé kaer metin ba sira-nia domin uluk nian ba Jeová. Iha 1987 ami muda bá serbí iha fatin neʼebé presiza haklaken-naʼin iha Karolina-Norte. No iha neʼebá mós haʼu koñese ema barak.a

Iha fulan-Agostu 2002, haʼu no Susan simu konvite ida atu serbí iha Betel, iha Patterson, Estadus Unidus. Haʼu serbisu iha Departamentu Serbisu nian, no Susan serbisu iha fatin hamoos roupa nian no nia gosta tebes serbisu iha neʼebá. Depois, iha fulan-Agostu 2005 haʼu simu priviléjiu ida hodi serbí nuʼudar membru ida ba Grupu Administradór nian. Knaar neʼe halo haʼu haraik-an tebes. Haʼu-nia feen sente knaar neʼe todan tebes ba ami, tanba presiza kaer responsabilidade foun, serbisu barak, no presiza mós halai bá halai mai. Susan nunka gosta atu saʼe aviaun, maibé ami presiza duni semo tun-saʼe bá fatin oioin. Nia hatete katak buat neʼebé ajuda nia hodi bele apoia nafatin ho haʼu-nia knaar mak liafuan domin sira neʼebé Grupu Administradór nia feen sira seluk hatoʼo ba nia. Toʼo agora mós nia apoia nafatin haʼu, tan neʼe mak haʼu hadomi tebes nia.

Iha haʼu-nia serbisu fatin haʼu iha foto barak tebes neʼebé fó-hanoin haʼu kona-ba solok neʼebé haʼu hetan iha haʼu-nia moris. Haʼu hetan ona bensaun barak tebes husi haʼu-nia hakaʼas an atu hanoin nafatin domin uluk nian ba Jeová!