Lisaun 8
Moris família nian neʼebé halo kontente Maromak
Saida maka laʼen nia pozisaun iha família laran? (1)
Oinsá maka laʼen tenke trata nia feen? (2)
Responsabilidade sira saida deʼit mak aman ida iha? (3)
Iha família laran, feen hola parte saida? (4)
Saida maka Maromak hakarak inan-aman no oan sira atu halo? (5)
Saida maka Bíblia hateten kona-ba haketak malu no soe malu? (6, 7)
1. Bíblia hateten katak laʼen maka família nia ulun. (1 Korinto 11:3) Laʼen tenke iha feen ida deʼit. Sira naʼin-rua tenke kaben loloos tuir lei. — 1 Timoteo 3:2; Tito 3:1.
2. Laʼen tenke hadomi feen hanesan nia an rasik. Nia tenke trata nia feen hanesan Jesus trata ema neʼebé tuir nia. (Efeso 5:25, 28, 29) Laʼen nunka baku ou trata aat nia feen. Maibé, laʼen tenke hamtaʼuk no hatudu respeitu ba nia feen. — Koloso 3:19; 1 Pedro 3:7.
3. Aman ida tenke halo serbisu makaʼas atu tau matan ba nia família. Nia tenke tau matan hodi fó hahán, roupa, no uma ba nia feen no oan sira. Aman ida mós tenke fó buat espirituál nian ba ninia família. (1 Timoteo 5:8) Nia mak iha responsabilidade atu ajuda ninia família atu aprende kona-ba Maromak no buat neʼebé Maromak hakarak halo. — Deuteronômio[Ulangan] 6:4-9; Efeso 6:4.
4. Feen tenke ajuda diʼak nia laʼen. (Gênesis[Kejadian] 2:18) Nia tenke ajuda nia laʼen atu hanorin no eduka oan sira. (Provérbios[Amsal] 1:8) Jeová hakarak feen atu tau matan ba nia família ho domin. (Provérbios[Amsal] 31:10, 15, 26, 27; Tito 2:4, 5) Feen tenke hamtaʼuk no iha respeitu kleʼan ba nia laʼen. — Efeso 5:22, 23, 33.
5. Maromak hakarak oan sira atu halo tuir sira-nia inan-aman. (Efeso 6:1-3) Nia hakarak inan-aman atu hanorin no korrije sira-nia oan. Inan-aman tenke gasta tempu ho sira-nia oan no estuda Bíblia ho sira hodi fó buat espirituál no emosionál nian. (Deuteronômio[Ulangan] 11:18, 19; Provérbios[Amsal] 22:6, 15) Inan-aman nunka fó dixiplina ba sira-nia oan iha dalan neʼebé makaʼas demais ou fó terus. — Koloso 3:21.
6. Bainhira kaben-naʼin sira iha problema atu haree malu diʼak, sira tenke koko atu aplika konsellu husi Bíblia. Bíblia hakaʼas ita atu hatudu domin no atu perdua malu. (Koloso 3:12-14) Maromak nia Liafuan la haruka kaben-naʼin sira atu haketak malu nuʼudar dalan ida atu rezolve problema kiʼik sira. Maibé feen bele hili atu husik nia laʼen, se nia laʼen (1) lakohi ho ulun-fatuk toʼos atu tau matan ba nia família, (2) uza violénsia makaʼas toʼo halo perigu feen-nia saúde no moris, ou (3) kontra hasoru nia feen demais liu, toʼo nia feen la bele adora Jeová. — 1 Korinto 7:12, 13.
7. Kaben-naiʼn sira tenke fó-laran ba malu. Adultériu, ou sala-foʼer ho ema seluk, maka sala ida kontra Maromak no kontra ninia kaben. (Ebreu[Ibrani] 13:4) Relasaun seksuál neʼebé laʼós iha kaben laran maka razaun ida deʼit husi Bíblia neʼebé husik kaben-naʼin sira atu soe malu hodi bele kaben dala ida tan. (Mateus 19:6-9; Roma 7:2, 3) Jeová odi bainhira ema soe malu la uza razaun husi Bíblia no kaben fali ho ema seluk. — Malaquias 2:14-16.
[Dezeñu sira iha pájina 16, 17]
Maromak hakarak inan-aman atu hanorin no korrije sira-nia oan sira
[Dezeñu sira iha pájina 17]
Aman neʼebé hadomi nia família tau matan hodi fó buat materiál no espirituál nian