Lisaun 10
Hahalok sira neʼebé Maromak odi
Oinsá mak ita tenke sente kona-ba buat neʼebé Maromak dehan katak aat? (1)
Hahalok seksuál sira oin saida maka sala? (2)
Oinsá mak ema kristaun tenke hanoin kona-ba bosok (3), taru-osan (3), naʼok (3), violénsia (4), espiritizmu (5) no hemu-lanu? (6)
Oinsá mak ema ida bele husik hahalok sira neʼebé aat? (7 )
1. Maromak nia atan sira hadomi buat neʼebé maka diʼak. Maibé sira mós tenke aprende atu odi buat neʼebé mak aat. (Salmo[Mazmur] 97:10) Ida-neʼe signifika katak ita tenke sees an husi hahalok sira neʼebé Maromak odi. Saida maka hahalok aat balu neʼebé Maromak odi?
2. Sala-foʼer: Seksu antes kazamentu, adultériu, relasaun seksuál ho animál, relasaun seksuál ho ema ruma iha família, no omoseksualidade maka sala boot hotu neʼebé kontra Maromak. (Levítico[Imamat] 18:6; Roma 1:26, 27; 1 Korinto 6:9, 10) Se mane ho feto seidauk kaben maibé hela hamutuk, sira tenke haketak malu, selae tenke kaben loloos tuir lei. — Ebreu[Ibrani] 13:4.
3. Bosok, taru-osan, naʼok: Maromak Jeová la bosok. (Tito 1:2) Ema neʼebé hakarak atu Maromak simu sira tenkesér labele bosok. (Provérbios[Amsal] 6:16-19; Koloso 3:9, 10) Taru-osan iha buat ruma hatudu hahalok kaan-teen, ou karak-teen. Tan neʼe, kristaun sira la hola parte iha taru-osan ba buat ruma, hanesan dada rifa, kuda halai-taru, bingo, no futu-manu. (Efeso 5:3-5) Mós, kristaun sira la naʼok. Sira la sosa sasán neʼebé ema naʼok, no mós, sira la foti sasán ruma lahó lisensa. — Êxodo[Keluaran] 20:15; Efeso 4:28.
4. Hirus demais, violénsia: La kontrola hirus bele kria violénsia. (Gênesis[Kejadian] 4:5-8) Ema neʼebé uza violénsia la bele sai Maromak nia belun. (Salmo[Mazmur] 11:5; Provérbios[Amsal] 22:24, 25) Sala atu vinga ou selu fali aat ho aat neʼebé ema seluk karik halo mai ita. — Provérbios[Amsal] 24:29; Roma 12:17-21.
5. Maninga no espiritizmu: Ema balu hamulak atu hetan espíritu aat sira-nia forsa atu kura moras. Ema seluk uza maninga ou fekit ai-moruk ba sira-nia inimigu atu halo moras no mós atu oho sira. Satanás maka forsa iha hahalok sira-neʼe nia kotuk. Tan neʼe, kristaun sira labele hola parte iha buat sira-neʼe. (Deuteronômio[Ulangan] 18:9-13) Besik ba Jeová maka proteje ita didiʼak husi maninga neʼebé ema seluk halo mai ita. — Provérbios[Amsal] 18:10.
6. Hemu-lanu: La sala atu hemu tua, serveja, ou hemu alkol seluk. (Salmo[Mazmur] 104:15; 1 Timoteo 5:23) Maibé hemu demais no hemu-lanu maka sala iha Maromak nia oin. (1 Korinto 5:11-13; 1 Timoteo 3:8) Hemu barak bele estraga Ita-nia saúde no kria problema ba Ita-nia família. Ida-neʼe mós bele halo Ita monu lalais ba tentasaun seluk. — Provérbios[Amsal] 23:20, 21, 29-35.
7. Ema sira neʼebé halo buat neʼebé Maromak dehan katak aat “sei la simu Maromak nia reinu nudar liman rohan”. (Galasia 5:19-21) Se Ita hadomi tebes Maromak no hakarak halo nia kontente, Ita bele husik hahalok sira-neʼe. (1 Joao 5:3) Aprende atu odi buat neʼebé maka Maromak dehan katak aat. (Roma 12:9) Halibur hamutuk ho ema neʼebé iha hahalok tuir Maromak nia hakarak. (Provérbios[Amsal] 13:20) Maluk kristaun sira, neʼebé iha esperiénsia, bele ajuda. (Tiago[Yakobus] 5:14, 15) Liuliu, konfia ba Maromak nia ajuda liuhusi orasaun. — Filipe 4:6, 7, 13.
[Dezeñu sira iha pájina 20, 21]
Maromak odi hemu-lanu, naʼok, taru-osan, no hahalok ho violénsia