Lisaun 14
Oinsá maka Testemuña ba Jeová organiza an?
Horibainhira maka Testemuña ba Jeová komesa sira-nia serbisu iha tempu modernu? (1)
Oinsá maka Testemuña ba Jeová halaʼo reuniaun sira? (2)
Oinsá maka sira selu buat neʼebé sira gasta? (3)
Sé maka tau matan iha kongregasaun ida-idak? (4)
Reuniaun boot liu saida maka sira halaʼo tinan-tinan? (5)
Serbisu saida maka sira halo iha sira-nia sede-jerál no sukursál sira? (6)
1. Testemuña ba Jeová komesa sira-nia serbisu iha tempu modernu besik tinan 1870. Uluk, sira iha naran Estudante Bíblia nian. Maibé iha tinan 1931, sira hili naran Testemuña ba Jeová husi Bíblia. (Isaías 43:10) Maski komesa ho ema uitoan deʼit, organizasaun neʼe aumenta toʼo sai Testemuña rihun ba rihun. Sira badinas hodi haklaken iha rai 230 liu.
2. Kongregasaun barak husi Testemuña ba Jeová iha reuniaun dala tolu kada semana. Ami konvida Ita atu tuir reuniaun sira-neʼe. (Ebreu[Ibrani] 10:24, 25) Sira hanorin husi Bíblia deʼit. Reuniaun sira loke no taka ho orasaun. Iha reuniaun balu neʼe, sira mós kanta ho laran “knananuk” espirituál. (Efeso 5:18, 19) Ita la selu atu tuir reuniaun sira-neʼe, no ema la husu ezmola. — Mateus 10:8.
3. Kongregasaun barak halaʼo reuniaun iha Salaun Reinu husi Testemuña ba Jeová. Baibain, reuniaun-fatin sira-neʼe mak uma simples, neʼebé Testemuña voluntáriu sira maka halo. Iha reuniaun-fatin laran la iha imajen sira, krusifiksu ruma, no buat seluk hanesan neʼe. Sira selu buat neʼebé sira gasta ho osan neʼebé ema fó ho laran. Ba ema neʼebé hakarak fó osan ruma, bele tau iha kaixa kontribuisaun ida iha reuniaun-fatin. — 2 Korinto 9:7.
4. Iha kongregasaun ida-idak nia laran, iha katuas sira ou superintendente. Sira mak iha responsabilidade atu hanorin iha kongregasaun. (1 Timoteo 3:1-7; 5:17) Atan ministeriál mak ajuda katuas sira-neʼe. (1 Timoteo 3:8-10, 12, 13) Ema-mane sira-neʼe laʼós boot liu ema seluk iha kongregasaun nia laran. (2 Korinto 1:24) Sira la hetan títulu espesiál ruma. (Mateus 23:8-10) Sira la hatais oin-seluk husi ema seluk. Sira mós la simu osan ba sira-nia serbisu neʼe. Katuas sira prontu ho laran atu tau matan ba kongregasaun hodi fó buat espirituál neʼebé ema presiza. Sira bele ajuda ho domin no fó konsellu iha tempu susar nia laran. — Tiago[Yakobus] 5:14-16; 1 Pedro 5:2, 3.
5. Testemuña ba Jeová mós halaʼo asembleia boot tinan-tinan. Iha reuniaun boot sira-neʼe, kongregasaun barak halibur hamutuk atu rona pograma espesiál ida hodi simu hanorin husi Bíblia. Iha asembleia hotu, dixípulu foun sira bele hetan batizmu. — Mateus 3:13-17; 28:19, 20.
6. Testemuña ba Jeová nia sede-jerál ba mundu tomak mak iha Novaiorke. Iha-neʼebá maka Grupu Administradór nia fatin. Neʼe maka grupu sentrál ida ho katuas sira neʼebé tau matan ba kongregasaun iha mundu tomak. Iha mós sukursál 100 liu iha mundu tomak. Iha fatin sira-neʼe, iha ema voluntáriu neʼebé ajuda atu halo livru barak kona-ba Bíblia no haruka ba kongregasaun sira. Sukursál sira-neʼe mak organiza serbisu haklaken nian. Benvindu ba ema hotu atu vizita sukursál sira-neʼe.