Oinsá mak Testemuña ba Jeová sira hetan treinu?
Testemuña ba Jeová kontinua simu treinu iha sira-nia moris nuʼudar ema Kristaun, no neʼe inklui treinu kona-ba serbisu haklaken. Neʼe mak serbisu neʼebé Jesus haruka ninia dixípulu atu halo, neʼe mak haklaken no hanorin liafuan diʼak kona-ba Maromak nia Ukun. (Mateus 24:14; 28:19, 20) Ami simu treinu iha ami-nia reuniaun semana-semana no iha reuniaun boot no asembleia tinan-tinan. Testemuña ba Jeová neʼebé iha knaar iha kongregasaun ka iha organizasaun simu treinu liután iha eskola espesiál sira neʼebé bazeia ba Bíblia.
Iha informasaun neʼe
Treinu saida mak Testemuña ba Jeová simu?
Reuniaun sira. Kada semana, ami asiste reuniaun rua iha ami-nia fatin adorasaun neʼebé hanaran Reuniaun-Fatin. Baibain reuniaun ida halaʼo iha loron baileet; no reuniaun ida seluk halaʼo iha findesemana. Ema hotu bele asiste reuniaun neʼe no ami mós la husu ezmola.
Reuniaun loron baileet. Ami simu instrusaun kona-ba lee, dalan atu konversa ho diʼak, hatoʼo diskursu, no dalan atu haklaken no hanorin. Ami simu treinu liuhusi diskursu sira, diskusaun, drama, no vídeo sira. Treinu neʼe ajuda ami atu sai diʼak liu nuʼudar ami fahe Bíblia nia mensajen ba ema seluk no halaʼo estuda Bíblia ho ema neʼebé interese. Ema hotu neʼebé asiste reuniaun sira neʼe hetan benefísiu husi treinu neʼe. Importante liu mak, reuniaun sira hametin ami-nia fiar ba Maromak, no domin ba nia no ba ami-nia maluk fiar-naʼin sira.
Reuniaun findesemana. Reuniaun neʼe fahe ba parte rua, primeiru komesa ho diskursu husi Bíblia neʼebé fó sai ba ema hotu. Parte tuirmai mak diskusaun hodi husu pergunta no resposta hodi uza Livru Haklaken edisaun estudu nian.a Iha estudu neʼe, koʼalia no esplika kona-ba tópiku sira iha Bíblia no matadalan neʼebé ajuda ita iha serbisu haklaken no moris loroloron nian.
Asembleia no reuniaun boot sira. Kada tinan, ami halaʼo reuniaun boot dala tolu no ema husi kongregasaun barak mak mai asiste hamutuk. Eventu neʼebé lori ksolok neʼe tau fokus ba tema espesífiku ida neʼebé bazeia ba Bíblia no neʼe inklui diskursu sira, drama kiʼik, entrevista, no vídeo sira. Hanesan ho ami-nia reuniaun, asembleia no reuniaun boot sira mós ajuda ami hetan koñesimentu liután kona-ba Bíblia no sai haklaken-naʼin no mestre Bíblia neʼebé diʼak liután. Ema hotu bele asiste no ami mós la husu ezmola.
Eskola Bíblia ba Testemuña ba Jeová
Atu simu treinu liután, Testemuña ba Jeová balu simu konvite atu tuir eskola Bíblia oioin. Eskola hanesan saida? Saida mak objetivu ba eskola sira-neʼe no halaʼo ba tempu hira? No sé mak bele tuir?
Eskola Pioneiru
Objetivu: Atu fó treinu ba haklaken-naʼin tempu-tomak, neʼebé hanaran pioneiru,b atu sai diʼak liután iha serbisu haklaken no hanorin. Kursu neʼe inklui halo diskusaun iha klase laran, drama kiʼik, diskursu, no treinamentu.
Durasaun: Loron neen.
Sé mak bele tuir: Sira neʼebé serbí ona nuʼudar pioneiru ba tinan ida tomak, sei hetan konvite atu tuir eskola neʼe. Pioneiru sira neʼebé tuir ona eskola neʼe, bele hetan konvite atu tuir fali depois tinan lima.
Eskola ba Haklaken-Naʼin Tempu-Tomak
Objetivu: Atu fó treinu espesífiku ba haklaken-naʼin tempu-tomak neʼebé iha esperiénsia. Estudante sira bele aumenta liután sira-nia matenek atu haklaken no hanorin, no sira estuda kleʼan tópiku sira iha Bíblia. Depois gradua tiha, estudante sira-neʼe hetan konvite atu serbí iha fatin neʼebé presiza haklaken-naʼin.
Durasaun: Fulan rua.
Sé mak bele tuir: Pioneiru sira bele aplika atu tuir eskola neʼe se sira kumpre kritériu no prontu atu serbí iha fatin neʼebé presiza liu haklaken-naʼin.
Eskola ba Katuas Kongregasaun nian
Objetivu: Atu ajuda katuasc kongregasaun sira halaʼo sira-nia knaar iha kongregasaun laran, hanesan hanorin no tau matan ba Maromak nia bibi sira, no atu aumenta sira-nia domin ba Maromak no ba maluk fiar-naʼin sira.—1 Pedro 5:2, 3.
Durasaun: Loron lima.
Sé mak bele tuir: Irmaun neʼebé foin sai katuas kongregasaun no mós katuas kongregasaun sira neʼebé iha esperiénsia neʼebé tuir ona, sira bele tuir fali eskola neʼe depois tinan lima.
Eskola ba Katuas Área ho Sira-nia Feen
Objetivu: Atu treinu katuas neʼebé vizita kongregasaun sira, bolu nuʼudar katuas área,d atu halaʼo sira-nia knaar diʼak liután. (1 Timóteo 5:17) Treinu neʼe mós ajuda katuas Kristaun sira neʼe no sira-nia feen atu hetan koñesimentu liután kona-ba Eskritura sira.
Durasaun: Fulan ida.
Sé mak bele tuir: Katuas área foun sira no sira-nia feen sei hetan konvite atu tuir depois halo tiha sira-nia knaar ba tinan ida. Depois neʼe, sira sei hetan fali konvite atu tuir eskola neʼe maizumenus kada tinan lima.
Eskola ba Katuas no Atan ba Kongregasaun
Objetivu: Atu ajuda katuas no atan ba kongregasaun,e hodi halaʼo sira-nia knaar iha kongregasaun tuir situasaun, presiza no mudansa agora daudaun nian. (2 Timóteo 3:1) Eskola neʼe halaʼo kada tinan balu.
Durasaun: Depende, maibé baibain loron ida deʼit.
Sé mak bele tuir: Katuas área, katuas kongregasaun, no atan ba kongregasaun.
Eskola Betel
Objetivu: Atu ajuda membru Betelf hetan susesu iha sira-nia serbisu no atu hametin sira-nia domin ba Maromak no ba ema seluk.
Durasaun: Loron lima ho balu.
Sé mak bele tuir: Membru foun sira iha Betel presiza tuir. No membru Betel neʼebé serbí kleur ona bele tuir fali eskola neʼe, depois tinan lima liu tiha husi tempu neʼebé sira tuir.
Eskola Gilead
Objetivu: Atu ajuda estudante haburas liután domin kleʼan ba Maromak nia Liafuan, no ajuda sira aplika buat neʼebé sira aprende. (1 Tesalónika 2:13) Mane no feto Kristaun neʼebé maduru iha dalan espirituál neʼebé tuir Eskola Gilead sei ajuda boot loos ba Jeová nia organizasaun no ba serbisu hanorin iha mundu tomak. Graduadu sira karik hetan knaar atu haklaken ka serbí iha sukursál, dala ruma iha sira-nia nasaun rasik ka iha rai seluk.
Durasaun: Fulan lima.
Sé mak bele tuir: Sukursál konvida sira neʼebé serbí tempu-tomak atu aplika. Eskola neʼe halaʼo iha Estadus Unidus iha Watchtower Educational Center iha Patterson, Novaiorke.
Eskola ba Membru Komisaun Sukursál ho Sira-Nia Feen
Objetivu: Atu treinu membru husi Komisaun ba Sukursál g atu tau matan serbisu neʼebé halaʼo iha sukursál no atividade espirituál husi Testemuña ba Jeová iha nasaun sira neʼebé inklui iha sukursál neʼe nia área.
Durasaun: Fulan rua.
Sé mak bele tuir: Sede-Jerál husi Testemuña ba Jeová konvida membru husi Komisaun ba Sukursál neʼebé hili tiha ona no sira-nia feen atu tuir eskola neʼe, neʼebé halaʼo iha Watchtower Educational Center iha Patterson, Novaiorke.
Treinu neʼebé Testemuña sira hetan, bazeia ba saida?
Bíblia mak sempre sai buat importante liu neʼebé uza ba treinu neʼebé Testemuña ba Jeová simu. Ami fiar katak Bíblia mai husi Maromak no katak Bíblia iha matadalan neʼebé diʼak liu hotu ba ema Kristaun nia moris.—2 Timóteo 3:16, 17.
Testemuña ba Jeová tenke selu atu simu treinu ka lae?
Lae. Treinamentu sira-neʼe mak gratuitu. Testemuña ba Jeová nia atividade sira hetan apoia husi kontribuisaun neʼebé ema fó ho laran.—2 Korinto 9:7.
a Bíblia no ami-nia ekipamentu estuda Bíblia nian, inklui vídeo sira, bele hetan iha ami-nia sítiu jw.org.
b Pioneiru ida mak Testemuña ida neʼebé batizmu ona no hatudu ezemplu diʼak, sira mak mane ka feto neʼebé hakarak atu uza oras espesífiku balu kada fulan atu fahe Bíblia nia mensajen ba ema seluk.
c Katuas kongregasaun mak mane Kristaun sira neʼebé maduru neʼebé hanorin husi Eskritura no tau matan Jeová nia povu liuhusi ajuda no anima sira. Katuas sira la simu saláriu ba sira-nia serbisu.
d Katuas área mak haklaken-naʼin tempu-tomak neʼebé vizita kongregasaun oioin iha ninia área kada semana. Nia anima irmaun-irmán sira liuhusi diskursu sira neʼebé bazeia ba Bíblia no laʼo hamutuk ho sira iha serbisu haklaken.
e Atan ba kongregasaun halaʼo serbisu oioin atu ajuda irmaun-irmán sira. Hodi halo nuneʼe, sira fó tempu barak liu ba katuas sira atu hanorin no tau matan ba Maromak nia bibi sira.
f Betel mak naran ba sukursál husi Testemuña ba Jeová. Serbisu-naʼin tempu-tomak neʼebé serbí iha neʼebá halaʼo serbisu neʼebé apoia atividade sira neʼebé Testemuña halo iha área neʼebé sukursál neʼe tau matan.
g Komisaun ba Sukursál baibain mak mane naʼin-tolu ka liu neʼebé espiritualidade diʼak.