Dalan oioin atu aumenta ita-nia serbisu haklaken

KUANDU Jesus haruka ninia dixípulu atu haklaken kona-ba Maromak nia Ukun, nia hatete: “Serbisu koʼa nian boot tebes, maibé serbisu-naʼin uitoan deʼit.” Tan neʼe Jesus hatutan tan: “Husu Toʼos-Naʼin atu haruka tan ema hodi halo serbisu koʼa nian.” (Mt 9:37, 38) Jesus esplika ba ninia dixípulu kona-ba oinsá atu haklaken. Jesus nia liafuan tuirmai neʼe hatudu katak serbisu haklaken mak urjente: “Antes imi remata imi-nia serbisu iha Izraél nia sidade hotu, Oan-Mane husi Ema sei mai.”​—Mt 10:23.

² Ohin loron, iha ema barak tan neʼebé presiza rona lia-loos. Ita tenke haklaken liafuan diʼak kona-ba Maromak nia Ukun antes mundu nia rohan toʼo mai, no tempu hela uitoan deʼit. (Mc 13:10) Jesus koʼalia kona-ba ema iha mundu tomak bainhira nia hatete “serbisu koʼa nian boot tebes”. Ohin loron, ita-nia serbisu haklaken mak boot liu se kompara ho serbisu haklaken neʼebé Jesus no ninia dixípulu sira halo. Maski ita mak ema uitoan deʼit se kompara ho mundu nia populasaun, maibé ita bele fiar katak Jeová sei ajuda ita. Ita sei haklaken liafuan diʼak kona-ba Maromak nia Ukun iha mundu tomak, no mundu nia rohan sei mai tuir tempu neʼebé Jeová deside ona. Ita hili atu tau uluk Maromak nia Ukun iha ita-nia moris hodi kumpre serbisu haklaken ka lae? Entaun, ita bele halo planu espirituál saida deʼit?

³ Jesus fó sai buat neʼebé Jeová hakarak ninia atan sira atu halo, hodi hatete: “Imi tenke hadomi Jeová imi-nia Maromak, ho imi-nia laran tomak, ho imi-nia moris tomak, ho imi-nia neon tomak no ho imi-nia kbiit tomak.” (Mc 12:30) Ita presiza serbí Maromak ho ita-nia laran tomak no moris tomak. Ita hatudu katak ita laran-metin no dedika an ona ba Maromak hodi halo buat hotu neʼebé ita bele halo atu serbí Jeová. (2 Tim 2:15) Iha dalan oioin atu serbí Maromak ho laran tomak tuir ita ida-idak nia abilidade no situasaun. Hanoin toʼok kona-ba dalan balu, no deside kona-ba planu espirituál saida mak ita hakarak kumpre.

SERBÍ NUʼUDAR HAKLAKEN-NAʼIN

⁴ Ema hotu neʼebé simu lia-loos iha priviléjiu atu haklaken liafuan diʼak. Neʼe mak serbisu neʼebé Jesus fó ba ninia dixípulu sira. (Mt 24:14; 28:19, 20) Kuandu ema ida foin rona lia-loos, baibain nia komesa koʼalia kedas ba ema seluk kona-ba neʼe. Ida-neʼe mak buat neʼebé dixípulu André, Filipe, Cornélio, no dixípulu seluk halo. (João 1:40, 41, 43-45; Após 10:1, 2, 24; 16:14, 15, 25-34) Neʼe katak ema ida bele koʼalia ba ema seluk kona-ba liafuan diʼak antes nia hetan batizmu ka lae? Bele! Bainhira ema ida kumpre ona kritéria atu sai haklaken-naʼin maski seidauk hetan batizmu, nia bele hola parte iha serbisu haklaken husi uma ba uma. Nia mós bele haklaken iha dalan seluk tan tuir ninia abilidade no situasaun.

⁵ Depois haklaken-naʼin ida hetan tiha batizmu, nia hakarak kontinua ajuda ema seluk atu aprende lia-loos. Ita hotu iha priviléjiu atu hola parte iha serbisu haklaken. Ita kontente atu apoia Maromak nia Ukun maski buat neʼebé ita halo mak kiʼik deʼit. Ita bele hetan ksolok boot hodi hakaʼas an atu haklaken iha dalan oioin.

SERBÍ IHA FATIN NEʼEBÉ PRESIZA LIUTÁN HAKLAKEN-NAʼIN

⁶ Ema barak iha Ita-nia haklaken-fatin karik rona beibeik ona liafuan diʼak. Tan neʼe, karik Ita hakarak muda ba fatin neʼebé presiza liután haklaken-naʼin hodi bele aumenta Ita-nia serbisu haklaken. (Após 16:9) Se Ita mak katuas ka atan ba kongregasaun, karik iha kongregasaun seluk neʼebé presiza Ita-nia ajuda. Karik katuas área sei fó sujestaun ba Ita kona-ba oinsá Ita bele ajuda kongregasaun seluk iha Ita-nia área. Se Ita hakarak serbí iha fatin seluk iha rai neʼebé Ita hela bá, Ita bele husu informasaun husi sukursál.

⁷ Ita hakarak serbí iha rai seluk ka lae? Se nuneʼe, Ita presiza hanoin didiʼak kona-ba neʼe. Diʼak atu koʼalia uluk ho katuas sira iha Ita-nia kongregasaun. Kuandu Ita muda ba rai seluk, neʼe bele fó impaktu ba Ita-nia moris no mós ba ema seluk neʼebé muda hamutuk ho Ita. (Lc 14:28) Maibé, se Ita-nia planu mak atu serbí iha rai seluk ba tempu uitoan deʼit, karik diʼak liu atu serbí deʼit iha Ita-nia rai rasik.

⁸ Iha rai balu, irmaun lokál sira neʼebé sai katuas ka atan ba kongregasaun seidauk iha esperiénsia barak. Irmaun lokál sira-neʼe prontu atu serbisu hamutuk ho katuas sira husi rai seluk neʼebé iha esperiénsia atu tau matan no dirije kongregasaun. Se Ita mak katuas ida no hanoin atu muda ba rai seluk, Ita presiza hanoin-hetan katak Ita-nia objetivu laʼós atu troka irmaun lokál sira-nia fatin. Maibé Ita hakarak serbí hamutuk ho sira no ajuda sira atu prontu simu responsabilidade iha kongregasaun. (1 Tim 3:1) Hatudu pasiénsia ba sira se sira ladún halo knaar ruma ho didiʼak tuir buat neʼebé irmaun sira halo iha Ita-nia rai. Ajuda irmaun sira hodi fahe Ita-nia esperiénsia nuʼudar katuas. Hodi halo nuneʼe, katuas lokál sira bele tau matan didiʼak ba kongregasaun se ikusmai Ita presiza fila fali ba Ita-nia rai.

⁹ Komisaun Administrasaun ba Kongregasaun presiza haruka uluk karta rekomendasaun ba sukursál, no tuirmai mak sukursál bele fó-hatene Ita kona-ba kongregasaun sira neʼebé presiza haklaken-naʼin liután. Komisaun Administrasaun ba Kongregasaun presiza haruka karta neʼe maski Ita mak katuas, atan ba kongregasaun, pioneiru ka haklaken-naʼin. Komisaun Administrasaun ba Kongregasaun sei haruka karta rekomendasaun no mós Ita-nia karta ba sukursál neʼebé tau matan ba rai neʼebé Ita hakarak serbí.

HAKLAKEN IHA LÍNGUA SELUK

¹⁰ Se Ita hakarak aumenta Ita-nia serbisu haklaken, karik Ita bele aprende língua seluk, neʼe inklui mós língua jestual. Se Ita planu atu aprende língua seluk, diʼak atu koʼalia ho katuas sira no katuas área. Sira bele fó sujestaun no anima Ita. Iha área balu, sukursál fó matadalan ba irmaun sira atu organiza kursu língua atu hanorin pioneiru no haklaken-naʼin sira hodi sira bele haklaken iha língua seluk.

SERBISU PIONEIRU

¹¹ Diʼak se haklaken-naʼin hotu hatene didiʼak kritéria atu sai pioneiru estra, regulár no pioneiru espesiál no mós kritéria atu serbí tempu-tomak iha dalan seluk tan. Pioneiru ida tenke hatudu ezemplu diʼak nuʼudar ema Kristaun neʼebé batizmu ona. No ninia situasaun permite atu kumpre oras haklaken neʼebé organizasaun deside ona fulan-fulan. Komisaun Administrasaun ba Kongregasaun mak aprova aplikasaun atu irmaun ka irmán ida bele serbí nuʼudar pioneiru estra no regulár, maibé sukursál mak fó knaar ba irmaun ka irmán ida atu serbí nuʼudar pioneiru espesiál.

¹² Irmaun ka irmán ida bele hili atu sai pioneiru estra ba fulan ida, ba fulan balu tuituir malu ka ba tempu kleur tuir ninia situasaun. Haklaken-naʼin barak hili atu serbí nuʼudar pioneiru estra durante tempu espesiál, hanesan tempu Memoriál ka durante fulan neʼebé katuas área vizita. Ema seluk hili atu serbí nuʼudar pioneiru estra durante tempu feriadu. Porezemplu, irmaun ka irmán neʼebé sei eskola karik bele hili atu serbí nuʼudar pioneiru estra durante tempu feriadu. Durante fulan espesiál iha fulan-Marsu, Abríl no fulan neʼebé katuas área vizita, haklaken-naʼin sira neʼebé hakarak serbí nuʼudar pioneiru estra bele hili atu hatama oras haklaken neʼebé hamenus ona tuir matadalan husi organizasaun. Maski Ita ida-idak nia situasaun la hanesan, maibé se Ita iha morál diʼak, toman diʼak, bele kumpre oras haklaken no sente katak Ita bele serbí nuʼudar pioneiru estra ba fulan ida ka liu, entaun Ita bele prenxe formuláriu atu sai pioneiru estra no katuas sira sei kontente atu simu Ita-nia formuláriu.

¹³ Atu bele serbí nuʼudar pioneiru regulár, Ita presiza buka-hatene se Ita bele kumpre oras haklaken tinan-tinan tuir kritéria husi organizasaun. Nuʼudar pioneiru regulár, Ita presiza apoia kongregasaun nia atividade. Pioneiru sira neʼebé hatudu laran-manas sei lori bensaun ba kongregasaun, anima irmaun-irmán sira atu haklaken liután, no mós book ema seluk atu serbí nuʼudar pioneiru. Maibé antes Ita bele serbí nuʼudar pioneiru regulár, Ita presiza hatudu ezemplu diʼak nuʼudar ema Kristaun, no hetan ona batizmu ba fulan neen ka liu.

¹⁴ Baibain sukursál mak hili pioneiru espesiál sira husi pioneiru regulár neʼebé iha matenek atu haklaken no hanorin. Sira tenke prontu atu serbí iha fatin naran deʼit neʼebé sukursál haruka sira bá. Dala barak sira simu knaar atu serbí iha fatin izoladu tanba karik sira bele hetan ema neʼebé interese no forma kongregasaun foun. Dala ruma pioneiru espesiál simu knaar atu serbí iha kongregasaun neʼebé presiza liután haklaken-naʼin. Pioneiru espesiál balu neʼebé mós serbí nuʼudar katuas kongregasaun hetan knaar atu ajuda kongregasaun kiʼik sira maski kongregasaun neʼe ladún presiza tan haklaken-naʼin. Pioneiru espesiál simu osan natoon fulan-fulan atu sustenta sira-nia presiza. Dala ruma irmaun-irmán balu simu knaar atu serbí nuʼudar pioneiru espesiál temporáriu.

MISIONÁRIU SIRA

¹⁵ Komisaun Serbisu nian husi Grupu Administradór mak fó knaar ba irmaun-irmán sira atu serbí nuʼudar misionáriu. Tuirmai, Komisaun ba Sukursál neʼebé tau matan ba misionáriu sira mak sei fó knaar ba sira atu serbí iha área neʼebé iha ema barak. Sira iha knaar importante atu ajuda no hametin kongregasaun no serbisu haklaken. Baibain misionáriu sira simu ona treinu husi Eskola ba Haklaken-Naʼin Tempu-Tomak. Sukursál sei arranja hela-fatin ba misionáriu sira no sira mós simu osan natoon fulan-fulan atu sustenta sira-nia presiza.

KATUAS ÁREA

¹⁶ Grupu Administradór mak fó knaar ba irmaun sira atu serbí nuʼudar katuas área. Antes sai katuas área, sira simu uluk treinu no hetan esperiénsia hodi serbí nuʼudar katuas área temporáriu. Irmaun sira-neʼe hafolin serbisu haklaken no hadomi sira-nia maluk Kristaun. Sira mak pioneiru neʼebé laran-manas, estudante Bíblia neʼebé badinas, oradór neʼebé hatoʼo diskursu ho didiʼak no hanorin ho matenek. Sira mak ezemplu kapás kona-ba hatudu hahalok neʼebé mai husi espíritu santu, la ulun-toos, no iha kbiit atu tetu didiʼak. Se katuas área mak kaben-naʼin, ninia feen mós presiza hatudu ezemplu diʼak, hatudu laran-diʼak ba ema seluk, no haklaken ho matenek. Nuʼudar feen Kristaun, nia respeitu arranju ulun nian no hakruʼuk ba ninia laʼen. Nia la koʼalia barak demais hodi domina ninia laʼen ka kuandu koʼalia ho ema seluk. Katuas área no ninia feen nia moris mak okupadu loos, tan neʼe sira neʼebé hakarak serbí nuʼudar katuas área tenke iha saúde diʼak. Se pioneiru ida hakarak sai katuas área, nia la presiza hatama formuláriu, maibé nia bele fó-hatene ninia hakarak neʼe ba katuas área, no katuas área bele fó-hatene nia buat neʼebé nia presiza halo.

ESKOLA TEOKRÁTIKU SIRA

¹⁷ Eskola ba Haklaken-Naʼin Tempu-Tomak: Ita-nia organizasaun presiza haklaken-naʼin barak liután atu haklaken iha área neʼebé kongregasaun sira la haklaken beibeik, no mós hametin kongregasaun sira. Tan neʼe, irmaun-irmán klosan sira no kaben-naʼin sira bele prenxe formuláriu atu tuir Eskola ba Haklaken-Naʼin Tempu-Tomak hodi hetan treinamentu espesiál. Bainhira eskola remata, sukursál sei haruka graduadu sira atu serbí nuʼudar pioneiru regulár iha fatin neʼebé presiza liután haklaken-naʼin iha sira-nia rai. Maibé graduadu balu neʼebé prontu atu aumenta sira-nia serbisu ba Maromak, dala ruma simu knaar seluk iha sira-nia rai rasik ka iha rai seluk. Graduadu balu karik simu knaar nuʼudar pioneiru espesiál neʼebé permanente ka temporáriu. Pioneiru neʼebé hakarak tuir eskola neʼe bele tuir enkontru ida iha reuniaun boot hodi buka-hatene kona-ba kritéria husi eskola neʼe.

¹⁸ Eskola Gilead: Irmaun-irmán klosan sira no kaben-naʼin sira neʼebé simu konvite atu tuir eskola neʼe presiza koʼalia lian Inglés no serbí nuʼudar pioneiru espesiál, misionáriu, katuas área, ka serbí iha Betel. Sira bele ajuda no hametin kongregasaun, serbisu haklaken, ka serbisu neʼebé halaʼo iha sukursál. Sira hatudu ona katak sira gosta serbí irmaun-irmán sira no ho laran-diʼak sira bele ajuda ema atu aprende no halo tuir matadalan husi Eskritura sira no Maromak nia organizasaun. Komisaun ba Sukursál sei konvida irmaun-irmán neʼebé bele tuir eskola neʼe atu hatama formuláriu. Graduadu sira husi eskola neʼe simu knaar atu apoia serbisu haklaken ka serbí iha sukursál iha sira-nia rai rasik ka iha rai seluk.

SERBÍ IHA BETEL

¹⁹ Serbí iha Betel mak priviléjiu espesiál. Betel signifika “Maromak nia uma”, no naran neʼe diʼak tanba iha Betel ema halo serbisu atu apoia Maromak nia Ukun. Irmaun-irmán sira neʼebé serbí iha Betel halo serbisu importante atu tradús, prodús, no haruka publikasaun sira kona-ba Bíblia. Grupu Administradór hafolin tebes ema neʼebé serbí iha Betel tanba neʼe ajuda Grupu Administradór atu tau matan no dirije kongregasaun sira iha mundu tomak. Ema Betel barak neʼebé serbí nuʼudar tradutór, hela no halo serbisu iha área neʼebé ema barak koʼalia língua neʼebé sira tradús. Hodi halo nuneʼe, sira bele rona ema koʼalia língua neʼe loroloron. Sira mós bele haree rasik se ema komprende informasaun neʼebé sira tradús ka lae.

²⁰ Maioria serbisu sira iha Betel mak todan. Tan neʼe, ema barak neʼebé hetan konvite atu serbí iha Betel mak irmaun sira neʼebé laran-metin, sei joven hela, saúde diʼak, no isin forte. Se Ita hakarak serbí iha Betel, Ita bele buka-hatene kona-ba kritéria atu serbí iha Betel hodi husu katuas sira iha Ita-nia kongregasaun.

SERBISU KONSTRUSAUN

²¹ Serbisu atu harii fatin adorasaun, sukursál, ka eskritóriu tradusaun sira mak serbisu sagradu, neʼe hanesan ho serbisu atu harii Salomão nia templu. (1 Reis 8:13-18) Irmaun-irmán barak hatudu laran-manas hodi fó sira-nia tempu no mós sasán atu ajuda halo serbisu neʼe.

²² Ita bele ajuda halo serbisu neʼe ka lae? Se Ita batizmu ona no prontu atu ajuda, irmaun sira neʼebé tau matan ba serbisu konstrusaun iha Ita-nia área sei kontente atu simu ajuda husi Ita no sira mós prontu atu fó treinu ba Ita. Diʼak atu fó-hatene katuas kongregasaun sira se Ita prontu atu halo serbisu konstrusaun. Irmaun-irmán balu neʼebé kumpre kritéria mós hetan oportunidade atu sai nuʼudar serbisu-naʼin voluntáriu hodi harii fatin adorasaun, sukursál, ka eskritóriu tradusaun iha rai seluk.

²³ Tuir loloos, ita iha oportunidade barak atu ajuda halo serbisu konstrusaun. Se ita mak batizmu ona, hatudu ezemplu diʼak, no mós iha matenek kona-ba konstrusaun, ita bele serbí nuʼudar serbisu-naʼin voluntáriu ba Planeamentu no Konstrusaun Lokál no bele ajuda ho projetu sira besik ita-nia área. Ita mós bele simu knaar husi sukursál nuʼudar voluntáriu ba konstrusaun hodi ajuda halo projetu iha fatin dook ba semana rua ka toʼo fulan tolu. Sira neʼebé simu knaar atu halo serbisu konstrusaun ba tempu naruk bolu nuʼudar serbisu-naʼin konstrusaun. No serbisu-naʼin konstrusaun neʼebé serbí iha rai seluk bolu nuʼudar serbisu-naʼin konstrusaun internasionál. Grupu Konstrusaun ida forma husi serbisu-naʼin konstrusaun no mós voluntáriu ba konstrusaun. Grupu neʼe sei dirije no tau matan projetu ida-idak, no mós simu ajuda husi serbisu-naʼin voluntáriu ba Planeamentu no Konstrusaun Lokál no voluntáriu seluk husi kongregasaun neʼebé hola parte iha projetu neʼe. Grupu Konstrusaun sira muda husi fatin ida ba fatin seluk atu halo projetu oioin iha sukursál ida nia territóriu.

ITA IHA PLANU ESPIRITUÁL SAIDA?

²⁴ Se Ita dedika ona Ita-nia moris ba Jeová, Ita hakarak atu serbí nia ba nafatin. Ita iha planu espirituál saida deʼit? Kuandu Ita iha planu espirituál, neʼe sei ajuda Ita atu uza didiʼak Ita-nia tempu no forsa. (1 Kor 9:26) No mós bainhira Ita hakaʼas an atu kumpre Ita-nia planu espirituál, neʼe sei ajuda Ita atu sai maduru no tau fokus ba buat neʼebé importante liu.​—Flp 1:10; 1 Tim 4:15, 16.

²⁵ Apóstolu Paulo hatudu ezemplu diʼak mai ita kona-ba serbí Maromak. (1 Kor 11:1) Paulo hakaʼas an atu halo Maromak nia serbisu. Nia komprende katak Jeová fó oportunidade barak ba nia. Paulo hakerek ba ema Kristaun iha Korinto: “Maromak loke tiha ona odamatan boot mai haʼu.” Ita mós iha oportunidade oioin atu serbí Jeová hamutuk ho kongregasaun, liuliu atu haklaken liafuan diʼak kona-ba Maromak nia Ukun. Maibé atu bele hetan oportunidade barak, ita presiza tahan hasoru “ema barak neʼebé kontra” ita, hanesan Paulo hasoru. (1 Kor 16:9) Paulo prontu atu kontrola ninia an. Nia hatete: “Haʼu kontrola haʼu-nia isin no ukun haʼu-nia an hanesan atan.” (1 Kor 9:24-27) Ita mós prontu atu halo nuneʼe ka lae?

²⁶ Mai ita hotu hakaʼas an atu kumpre planu espirituál sira tuir ita-nia kbiit no situasaun. Ohin loron, ema barak serbí Maromak tempu-tomak tanba sira halo planu espirituál husi kiʼik kedas. Karik sira-nia inan-aman no ema seluk anima sira atu halo planu. Tan neʼe, sira simu bensaun barak atu serbí Jeová, no sira nunka arrepende sira-nia desizaun. (Prov 10:22) Ita mós bele halo planu atu hola parte iha serbisu haklaken semana-semana, estuda Bíblia ho ema, ka uza tempu liután atu prepara ba reuniaun sira. Buat neʼebé importante liu mak ita laran-metin ba Maromak no kumpre didiʼak ita-nia serbisu ba Maromak. Se ita halo nuneʼe, ita fó glória ba Jeová, no kumpre ita-nia planu atu serbí Maromak ba nafatin.​—Lc 13:24; 1 Tim 4:7b, 8.